2 Crónicas 17 - Bible in Quechua of South Conchucos（qxo）

Judá nacionchö Josafat rey kanqan

1Asa wanuskiptinmi tsurin Josafatna rey karqan. Payqa Israel nacionta pärapunanpämi alistakurqan.

2Tsaymi Judáchö alli murallashqa markakunaman y wakin markakunamanpis soldädukunata churarqan. Tsaynöllam papänin Asa qechunqan Efraínchö kaykaq markankunamanpis soldädukunata churarqan.

3Unay castan David cäsunqannö Tayta Diosta cäsuptinmi Josafatta Tayta Dios yanaparqan. Josafatqa Baal dioskunatapis manam adorarqantsu.

4Israel nación runakuna jutsata rurayaptinpis payqa manam jutsata rurartsu kawarqan. Tsaypa rantinqa papänin yärakunqan Tayta Diospa mandamientunkunata cäsurmi kawarqan.

5Tsaymi Tayta Dios yanaparqan Judá nación runakuna llapanpis paypa poderninchö kayänanpä. Tsaynöllam Judá runakunaqa imaykatapis mandaqnin rey Josafatpä apayaq. Tsaynöpam Josafat rïcuyarqan y pïmaypis payta kuyar respitarqan.

6Llapan voluntäninwan Tayta Dios munanqannö kawarmi markakunachö kaq altarkunata y Asera diösapä jawiyanqan raku qerukunatapis Judá nacionchö llapanta ushakätsirqan.

7Kimsa watana rey kaykarmi Judáchö kaq markakunaman yanapaqninkunata Josafat mandarqan Tayta Diospa mandamientunkunata yachatsiyänanpä. Paykunam kayarqan Ben-hail, Abdías, Zacarías, Natanael y Micaías.

8Paykunawan aywayänanpämi levitakunata Josafat mandarqan. Tsay runakunam kayarqan Semaías, Netanías, Zebadías, Asael, Semiramot, Jonatán, Adonías, Tobías y Tobadonías. Paykunawanmi sacerdöti Elisama y sacerdöti Joram aywayarqan.

9Paykunam marka marka purir Judá nacionchö täraq runakunata Tayta Diospa leyninkuna qellqashqa kaykaq librupita yachatsiyarqan.

10Judá nacionpa ñöpanchö kaq nacionkunapis Tayta Diosta mantsarmi Josafat mandanqan markakunata atacayarqannatsu.

11Tsaypa rantinmi wakin filisteo runakunapis qaraykunata y qellaykunata apamur Josafatta entregayarqan. Arabia nación runakunapis rey Josafatta qarayänanpämi qanchis waranqa qanchis pachak (7,700) üshakunata y qanchis waranqa qanchis pachak (7,700) chïvukunata apayämurqan.

12Tsaynöpam Josafatqa mas poderyuq kar Judá nacionchö shäritsirqan amparakuna törrikunata y mikuy churakuna markakunata.

13Tsaynöpam Judá nacionchö kaq markakunata mejoratsirqan.

Jerusalénmanpis valienti soldädunkunatam Josafat churarqan.

14Tsay soldädunkunata castanpa castanpa apuntatsiptinmi Judá trïbupita kimsa pachak waranqa (300,000) soldädukuna kayarqan. Cada batallonchömi waranqa (1,000) soldädukuna kayarqan. Llapan batallonpa capitanninkunapa mandaqninmi Adna karqan.

15Juk capitán Johanánpa poderninchömi ishkay pachak puwaq chunka waranqa (280,000) soldädukuna kayarqan.

16Zicripa tsurin capitán Amasíaspa poderninchömi ishkay pachak waranqa (200,000) valienti soldädukuna kayarqan. Payqa kikinpa voluntäninpitam yaykurqan Tayta Diosta sirvir capitán kananpä.

17Benjamín trïbupitam ishkay pachak waranqa (200,000) soldädukuna kayarqan. Cada ünunkunapam escüdunkuna y flëchankunapis karqan. Paykunapa capitanninmi Eliada karqan. Payqa pelyayta yachaq allish chölum karqan.

18Juk capitannam Jozabad karqan. Paypa poderninchömi kayarqan pelyayänanpä alistakushqalla pachak puwaq chunka waranqa (180,000) soldädukuna.

19Llapanpis tsay soldädukunaqa Jerusalénchö rey Josafat ninqanta rurayänanpämi kayarqan. Tsayqa karqan Judá nacionchö corralashqa markakunachöpis kaykaq soldädukunata mana yupaykäyaptinmi.