Proverbios 29 - Bible in Quechua of South Conchucos（qxo）

1Yachatsiyanqanta mana cäsuq runaqa illaqpitam ushakanqa.

2Alli ruraq runa autoridä kaptinqa runakuna kushikuyanmi.

Peru mana alli ruraq runa autoridä kaptinmi sïqa runakuna llakikuyan.

3Tsurin tantiyakuq kaptinmi papänin kushikun.

Prostitütawan kakurqa qellaynintam ushan.

4Nacionpa mandaqnin rey alli mandaptinqa llapanpis tranquïlum kawayan.

Peru imallapitapis impuestuta cobraptinmi sïqa chipyaq pobriyäyan.

5Amïgun mana allita ruraptin corriginanpa rantin alabarqa jutsa ruraymanmi jitarpun.

6Mana alli ruraq runaqa jutsata ruranqanpitam ñakan.

Peru alli ruraq runam sïqa imaypis kushishqa cantar kawan.

7Alli ruraq runaqa pobrikunapa janan shärirmi respitatsin.

Peru mana alli ruraq runam sïqa ñakatsiyanqanta rikarpis kuyapantsu.

8Wajukuq runaqa pïmaytapis ajanätsirmi purin.

Peru yachaq runam sïqa rabyashqatapis kushitsin.

9Yachaq runa mana yachaq runawan rimanakurmi arreglayta puëdinqatsu.

Ollqutupaptinpis y alli shimillanpa parlapaptinpis manam cäsunqatsu.

10Wanutsikuq runaqa jutsaynaq runakunatam pasaypa chikin.

Peru alli ruraq runam sïqa runa mayinta kuyapan.

11Mana yachaq runaqa imapitapis llutallam rabyakun.

Peru yachaq runam sïqa pacienciakun.

12Llullakuqkunata cäsuq autoridäqa yanapaqninkunatapis llutan ruraymanmi jitarpun.

13Pobripis y ñakatsiqpis Tayta Diospitam kawayta chaskiyan.

14Pobrikunata kuyapaq reytaqa manam pipis mandaq kanqanpita jipinqatsu.

15Wamrapis castigar corrigiptinrämi yachakun.

Mana corrigishqaqa mamantam penqakuyman churan.

16Diosta mana cäsuqkuna atskaq kayaptinmi jutsa ruraykuna maytsaychöpis kaykan.

Tsay runakuna fracasayanqantam alli runakuna rikayanqa.

17Tsurikita corrigirqa tranquïlum kawanki.

Alli kawaptinqa kushikunkim.

18Diospa willakuyninta mana cäsukurqa mana allim runakuna kawayan.

Peru Tayta Diospa leyninkunata cäsurmi sïqa alli kawayan.

19Sirviq llutanta ruraptinqa shumaq corriginki.

Alli shimillaykipa tantiyatsiptikiqa manam cäsushunkitsu.

20Llutalla imatapis parlaq runapitaqa mana tantiyakuq runallapis mas yärakuypämi.

21Sirviqnikita wamra kanqanpita mana corrigirqa waray warantinmi pësakunki.

22Imallapitapis rabyaq runaqa piwanpis tinkuypam tinkun.

Wajukuq runaqa imayka jutsamanmi ishkin.

23Runa tukuqtaqa pïmaypis penqakatsinmi.

Peru llänu shonqu runatam sïqa pïmaypis respitar alabanqa.

24Suwapa cumpinchin runaqa declarananpä mayjina juratsiptinpis manam willakuntsu.

Musyaykar mana willakunqanpitam castigashqa kanqa.

25Mantsallïshu runaqa mana allimanmi chan.

Peru Tayta Diosman yärakuqkunam sïqa tranquïlu kawayan.

26Pïmaymi mandaqnin yanapananta munayan.

Peru tsaynö kaptinpis Tayta Diosrämi alli arreglutaqa ruran.

27Diosta cäsuq runakunaqa jutsa ruraq runakunata manam chaskiyantsu.

Jutsa ruraq runaqa alli runakunatam pasaypa rabyapan.