Proverbios 10 - Bible in Quechua of South Conchucos（qxo）

Salomón parlanqan yachatsikuykuna

1Kaychömi qellqashqa kaykan Salomón parlanqan yachatsikuykuna.

Tsurin yachaq kaptinqa maman y papäninpis kushikunmi.

Peru mana yachaq kaptinmi sïqa llakikun.

2Suwakuypa rïcuyaqkunaqa manaräpis probicharmi wanuyanqa.

Arukur shumaq kawakuqkunam sïqa wanuypitapis salvakuyanqa.

3Alli ruraq runataqa hambrünachö mana kananpämi Tayta Dios yanapan.

Peru mana alli ruraq runatam sïqa munanqanta tarinanpäpis yanapantsu.

4Mana arukuq qela runaqa pobriyanqam.

Arukuq runam sïqa imaykayuq kanqa.

5Usya witsan mikuyninta churakuq runaqa tantiyakuqmi kaykan.

Peru cosëcha witsan punukuq runam sïqa penqakuypä kaykan.

6Alli ruraq runaqa bendiciontam chaskin.

Mana alli ruraq runam sïqa alli shimillanpa parlarpis shonqunchöqa mana allita rurananpä yarpaykan.

7Alli ruraq runapäqa pipis yarpaskinmi.

Peru mana alli ruraq runapämi sïqa ni pipis yarpantsu.

8Yachaq runaqa mandaqninta cäsunmi.

Manakaqkunata parlaq runaqa chikishqam kanqa.

9Allillata ruraq runaqa tranquïlum kawan.

Peru mana allita ruraq runam sïqa mana allichö ushakanqa.

10Llutanta ruranqanta tsapänanpä runa mayinta qemtsipaq runaqa llakikuymanmi chanqa.

Llutanta parlaq runaqa chikishqam kanqa.

11Alli runa yätsiptinqa pipis kushishqam kawan.

Peru mana alli ruraq runa willapaptinmi sïqa pipis rimanakur kawan.

12Chiki runaqa pïmaytapis rimanakatsinmi.

Peru kuyakuq runam sïqa imata rurayaptinpis perdonan.

13Yachaq runaqa imatapis allim tantiyatsin.

Mana tantiyaq runaqa maypis wiruy munaymi kaykan.

14Yachaq runaqa manam imatapis llutallaqa parlantsu.

Peru mana yachaq runam sïqa llutalla parlar pïmaytapis rabyanätsin.

15Rïcu runaqa riquëzanwanmi defiendikun.

Peru pobri runapam sïqa defiendikunanpä imanpis kantsu.

16Alli ruraq runaqa pïmaywanpis allim kawan.

Peru mana alli ruraq runam sïqa jutsa rurayllachö kawan.

17Yachatsinqanta cäsukuq runaqa alli kawaytam tarin.

Yachatsinqanta mana wiyakuq runam sïqa mana alli kawan.

18Chikiykarpis allitupayllapa parlaparqa llullapaykanmi.

Mana tantiyaq runaqa cuentullawanmi willapakur purin.

19Alläpa parlaq runaqa manakaqtapis parlanmi.

Shumaq tantiyaq runam sïqa allillata parlan.

20Alli ruraq runa parlanqanqa imayka yuraq qellaynömi välin.

Peru mana alli ruraq runa parlanqanmi sïqa ni imapäpis välintsu.

21Alli ruraq runa yätsiptinqa pïmaypis alli kawananpämi tantiyan.

Peru mana alli ruraq runam sïqa mana tantiyakuq kanqanpita wanun.

22Tayta Diospa bendicionninwanmi imaykayuqpis kantsik.

Bendicionninta chaskirmi kushikuntsik.

23Mana tantiyaq runaqa llutanta rurarpis kushikunmi.

Peru yachaq runam sïqa allita rurarnin kushikun.

24Mana alli ruraq runataqa mantsarinqan kaqmi imapis päsan.

Alli ruraq runam sïqa imatapis munanqanta tarin.

25Mana alli ruraq runataqa ñakaykuna shukukuy vientunö shamurmi ushakätsin.

Peru alli ruraq runam sïqa imanö ñakarpis salvakun.

26Kiruta vinagri jimpätsinqannö y ñawita qoshni nanatsinqannömi qela runapis mandaqninpä uma nanatsiqnin kaykan.

27 Tayta Diosta mantsapakuq runaqa rukuyanqanyaqmi kawanqa.

Peru llutan ruraq runam sïqa manarä rukuyar wanunqa.

28Alli ruraq runakunataqa kushikuymi shuyaran.

Mana alli ruraq runakunatam sïqa llakikuy shuyaran.

29 Tayta Diosmi pay munanqannö kawaqkunata imaykapitapis tsapan.

Peru llutan ruraq runakunatam sïqa ushakätsin.

30Alli ruraq runaqa ñakay shamuptinpis manam fracasanqatsu.

Peru mana alli ruraq runam sïqa ushakanqa.

31Alli ruraq runaqa pitapis shumaqmi yätsin.

Peru mana alli ruraq runam sïqa llutanta parlanqanpita castigashqa kanqa.

32Alli ruraq runaqa allikunallatam parlan.

Peru mana alli ruraq runam sïqa llutankunallata parlan.