Romanos 13 - Bible in Quechua of South Conchucos（qxo）

Autoridäkunata cäsunapä ninqan

1Llapan autoridäkunata Tayta Dios churashqa kaykaptinqa paykunata cäsuyay.

2Autoridäkunata mana cäsurqa Tayta Diostapis manam cäsuyantsu. Autoridäkunata mana cäsuq kaqtaqa Tayta Diosmi juzganqa.

3Autoridäkunata cäsuqkunaqa manam mantsapakurtsu puriyan. Peru mana cäsuqkunam sïqa mantsapakur puriyan. Tsaynö mana puriyänaykipä autoridäkunata cäsuyay. Cäsuyaptikiqa paykuna allim rikayäshunki.

4Llutanta rurashqaqa autoridäkunam castigamäshun. Paykunataqa Tayta Diosmi churashqa alli ruraqkunapa favornin shäriyänanpä y llutan ruraqkunata castigayänanpä. Manam por gustutsu autoridäqa kaykäyan.

5Tsaynö kaptinqa autoridäkuna ninqankunata cäsushun. Manam castigamänantsikpä kanqallanpitatsu cäsushun, sinöqa Tayta Diosta respitarmi.

6Runakunata yanaparqa Tayta Diostam autoridäkuna sirviyan. Paykunata Tayta Dios churashqa kaykaptinqa impuestukunatapis pägashun.

7Cumpliyänaykipä kaqkunata llapanta cumpliyay. Impuestuta pägayänayki kaptinqa pägayay. Pitapis respitayänayki kaptinqa respitayay. Pitapis alabayänayki kaptinqa alabayay.Kuyanakunapä ninqan

8Pipapis jaqan karqa pägayay. Jaqa kaynikita pägayänaykipä yarpachakuyanqaykinölla kuyanakuyänaykipäpis yarpachakuyay. Runa mayintsikta kuyarqa Tayta Diospa llapan leyninkunatam cumplintsik.

9Tsay leykunachömi nin:

<Ama runa mayikita wanutsinkitsu.

Ama suwakunkitsu.

[Ama manakaqkunata pitapis tumpankitsu.]

Ama runa mayikipa imaykankunatapis munapankitsu>>.

<> ninqan mandamientuta cumplirqa llapan mandamientukunatam cumpliykantsik.Lev. 19.18.

10Runa mayintsikta kuyarqa manam contran shärintsiktsu. Tsaynöpam Tayta Diospa llapan leyninkunata cumplintsik.

Jutsa ruraykunata dëjanapä ninqan

11Jesucristo kutimur salvamänantsikpä junaq cercachönam. Tsaynö kaykaptinqa punukashqanö kanqantsikpita rikchashun.

12Patsa waränanpänöna kaykaptinqa jutsa ruraykunata dëjar Tayta Dios munanqannö kawanantsikpä shumaq yarpachakushun. Tsakäpakushqanö kawanantsikpa rantinqa aktsichönöna kawashun. Espädan alistakushqa soldädunö noqantsikpis kaykäshun.

13Aktsichönö kawaykarqa jutsata mana ruraypana kawashun. Wakin runakuna qorikaykur mikur upyar kakuyaptinpis noqantsikqa ama tsaynö kashuntsu. Tsaynölla adulteriu jutsata ama rurashuntsu ni majaynaq karpis jukwan jukwan kakushuntsu. Ama qayapänakushuntsu ni chikinakushuntsu.

14Tsaypa rantinqa qanra röpata lloqtir jaqiyanqaykinö jutsaykikunata dëjar Jesucristupa poderninchö kawayay. Llutanta rurayta munarpis ama rurayaytsu.