Proverbios 12 - Bible in Quechua of South Conchucos（qxo）

1Tantiyakuq runaqa pipis corrigiptin chaskikunmi.

Peru mana tantiyakuq runam sïqa corrigiptinpis chaskikuntsu.

2Alli runataqa Tayta Diosmi yanapan.

Peru mana alli ruraq runatam sïqa castigan.

3Mana alli ruraq runataqa pïmaypis chikinmi.

Peru alli ruraq runatam sïqa pïmaypis kuyan.

4Alli warmiqa runantam kushikatsin.

Peru respëtuynaq warmim sïqa runanta qallayätsin.

5Alli ruraq runaqa allita rurananpämi yarpachakun.

Peru mana alli ruraq runam sïqa pitapis engañananpä yarpachakun.

6Mana alli ruraq runa parlanqanqa pitapis wanutsinanpä trampanömi kaykan.

Peru alli ruraq runa yätsinqanmi sïqa alli kawananpä kaykan.

7Mana alli ruraq runakunaqa mana allita ruraykäyanqallanchömi ushakäyan.

Peru alli ruraq runakunam sïqa kikinpis y castankunapis atska wata kawayanqa.

8Yachaq runataqa pïmaypis respitanmi.

Peru mana tantiyakuq runatam sïqa pïmaypis mana alli rikan.

9Imanpis mana kaykaptin allish tukunqanpitaqa mas allim kanman pobrilla karpis amïguyuq kanqan.

10Alli tantiyakuq runaqa ashmantapis kuyapanmi.

Peru mana tantiyakuq runam sïqa kuyapaytapis yachantsu.

11Arukuq runapaqa mikuyninpis atskam.

Peru qela runakunawan qorikaq runaqa yarpayniynaqmi kaykan.

12Mana alli ruraq runaqa jukpa kaqtam munapan.

Peru alli ruraq runam sïqa kikin tarinqanwan kushish kawakun.

13Mana alli ruraq runaqa kikinpa shiminpitam imaykamanpis ishkin.

Peru alli ruraq runam sïqa imayka problëmapitapis allilla yarqun.

14Pï runapis parlanqanpitam alli rikashqa o mana alli rikashqapis kanqa.

Tsaynöllam imatapis ruranqanpita alli rikashqa o mana alli rikashqapis kanqa.

15Mana yachaq runaqa llutanta rurarpis alli kanqantam yarpan.

Peru yachaq runam sïqa yätsiyanqanta chaskikun.

16Mana tantiyakuq runaqa imallapitapis rasmi rabyanan.

Peru tantiyakuq runam sïqa ashlliyaptinpis upällakun.

17Alli testïguqa rasun kaqllatam parlan.

Peru mana alli testïgum sïqa imaykatapis llullakur parlan.

18Mana yachaq runakuna parlanqanqa cutsillunörämi shonqunman chan.

Peru yachaq runa parlanqanmi sïqa jampinö kaykan.

19Rasun kaqta parlaq runaqa atska watam kawan.

Peru llullakuq runam sïqa manaräpis höranchö ushakan.

20Mana alli ruraq runaqa pitapis llullapänanpämi yarpachakun.

Piwanpis alli kawaq runa yätsiptinqa pïmaypis kushikunmi.

21Alli ruraq runataqa manam imapis päsantsu.

Peru mana alli ruraq runatam sïqa imayka desgraciapis päsan.

22Llullakuq runataqa Tayta Dios manam rikaytapis munantsu.

Peru mana llullakuq runatam sïqa kuyan.

23Tantiyakuq runaqa yachaq kanqanpita manam alabakuntsu.

Peru mana tantiyakuq runam sïqa llutanta rurarpis alabakun.

24Arukuq runaqa mandaqmi tikran.

Peru qela runam sïqa jukta sirvin.

25Pasaypa llakikurmi kuyapaypä purin.

Peru pillapis alli shiminpa parlapaptinqa kushikunmi.

26Alli ruraq runaqa runa mayinta shumaqmi tantiyatsin.

Peru mana alli ruraq runam sïqa llutankunaman pushan.

27Qela runaqa manam imatapis tarintsu.

Peru arukuq runam sïqa imaykayuqpis tikran.

28Alli ruraq runaqa imaypis allim kawan.

Peru juiciuynaq runam sïqa wanuytapis kikin ashin.