Oseas 5 - Bible in Quechua of South Conchucos（qxo）

Israel runakunata castigananpä ninqan

1<

Israel mayor runakuna, ninqäta shumaq tantiyakuyay.

Mandaq rey, qampis castaykikunapis ninqäta shumaq cäsukuyay.

Mana cäsuyämanqaykipitam qamkunata juzgashayki.

Runakunata ishkitsiyänaykipä waskata sutaqnömi Mizpachö kayarquyki.

Tabor jirkachöpis atarräyanömi kayarquyki.

2Sitim partichöpis runakunata imayka pözuman jitarpuqnömi kayanki.

Tsaynö kayanqaykipitam llapaykita castigayäshayki.

3Israel runakuna, imanö kayanqaykitapis musyämi.

Runanta warmi dëjaskir jukwan kakuqnömi qamkunapis juk dioskunamanna yärakuykäyanki.

Tsaynöpam pasaypa penqakuypä kaykäyanki.

4Llutankunaman umayki churakashqa karmi perdonta mañakamaytapis yarpäyankitsu.

Manam ichikllapis reqiyämankitsu>>.

5Israel runakuna allish tukuyanqanqa mana alli kayanqantam willakuykan.

Paykuna jutsayuq karmi castigashqa kayanqa.

Judá runakunapis tsaynöllam jutsata rurayanqanpita ushakäyanqa.

6Üshankunata y wäkankunata sacrificiupä rupatsir Tayta Diosta ashirpis manam tariyanqatsu.

Tayta Diosqa paykunapita witikushqanam.

7 Tayta Diosllaman imaypis yärakuyänanpä awnirpis manam cumpliyantsu.

Tsurinkunapis jäpa dioskunamannam yärakuykäyan.

Jutsayuq kayanqanpitam juk killallachö ushakäyanqa.

Herenciankunatapis jäpa runakunam duëñu tukuyanqa.

8Guërra qallaykunanpä Gabaachö waqrata tukayay.

Ramáchöpis alistakuyänanpä cornëtata tukayay.

Bet-avénchöpis maya mayalla kayänanpä willakuyay.

Benjamín trïbu runakunatapis alcäbu kayänanpä musyatsiyay.

9Tayta Dios castiganan junaqmi Efraín runakuna ushakätsishqa kayanqa.

Rasunpa tsaynö päsananpä kanqantaqa llapan trïbu Israel runakunatam willaykä.

10 Tayta Diosmi nin:

<Tsaynö kayanqanpita rabyakurmi atskayashqa mayunö paykunata ushakätsishä.

11Efraín runakunaqa ïdulukunata adorayanqanpitam pasaypa ñakayanqa.

12Millwata puyu ushanqannömi Efraín runakunata ushakätsishä.

Judá runakunatapis qeruta puyu ushaqnömi ushakätsishä.

13<

Judá runakunapis pasaypa maqashqa runanömi kaykäyan.

Tsaynö kayanqanta tantiyaskirmi Asiria nacionpa mandaqnin reyman aywaykur Efraín runakuna mañakuyashqa yanapananpä.

Peru tsay reyqa qeshyaqta allïtsiyta ni jampiyta mana puëdiqnömi yanapayta puëdishqatsu.

14Ima ashmatapis tsariskir león ushanqannömi Efraín runakunata y Judá runakunata ushakätsishä.

Ushakätsiptï manam pipis salvanqatsu.

Tsaynö ushakaskatsirmi aywakushä.

15Täkunäman kutiskirmi täkushä jutsayuq kayanqanta tantiyakur perdonta mañakayämanqanyaq.

Paykunaqa pasaypa llakikurrämi ashiyämanqa>>.