1 Tayta Dios, contraykikunata castigaq kaykarqa yanapaykallämay.
2Kay patsachö llapan runakunata juzgaq juezmi kanki.
Runa tukuqkunata juzgar castigaykullay.
3 Tayta Dios, ¡imayyaqrä mana alli ruraq runakuna kushipayämanqa!
4¡Imayyaqrä jutsata rurayanqanpita allish tukur puriyanqa!
¡Imayyaqrä runa tukuyanqa!
5 Tayta Dios, paykunaqa kuyanqayki runakunatam manakaqman churayan.
Herenciaykipä akranqayki runakunatam ñakatsiyan.
6Viüdakunata, jäpakunata y waktsakunatam wanutsiyan.
7Paykunam burlakur niyan:
<
Jacob yärakunqan Diosqa manam cuentatapis qokuntsu>>.
8Mana tantiyakuq upa runakuna, ¿imanirtä tantiyayankitsu?
¡Imayrä tantiyayanki Tayta Dios poderyuq kanqanta!
9Rinritapis ruraykarqa ¿manatsurä wiyamäshun?
Ñawitapis ruraykarqa ¿manatsurä rikamäshun?
10Wakin nacionkunachö täraqkunatapis castigaykarqa ¿manatsurä qamkunatapis castigayäshunki?
Runakunata yachatsinanpä llapantapis musyaykarqa ¿manatsurä rurayanqaykitapis musyan?
11Tayta Dios musyanmi runakuna mana allikunata yarpäyanqanta.
12 Tayta Dios, corriginqayki runam kushishqa kawanqa.
Leynikikunata yachatsinqayki runam kushishqa kawanqa.
13Tsay runaqa desgracia päsaptinpis tranquïlum kawanqa.
Peru mana alli ruraq runakunam sïqa kikinkuna wanuytapis ashiyan.
14Kuyanqan runakunataqa Tayta Dios manam imaypis jaqinqatsu.
Payman yärakuq runakunataqa imaypis yanapanqam.
15Juezkunapis shumaqnam runakunata arreglayanqa.
Tsaynö juzgaptinmi alli ruraq runakunapis kushikuyanqa.
16Mana alli runakuna conträ shäriyaptin ¿pirä favornï shärinqa?
Llutan ruraq runakuna conträ shäriyaptin ¿pirä yanapamanqa?
17 Tayta Dios mana yanapamaptinqa unaynam wanur ushakäman karqan.
18 Tayta Dios, ima ruraytapis mana puëdirmi yanapamänaykipä mañakurqü.
Kuyapäkuq karmi yanapamarquyki.
19Pasaypa llakishqa kaykaptïmi imaypis valuratsimarquyki.
20¿Mana alli juezkunapa amïguntsurä kankiman?
Paykunaqa leykunata mana cäsurmi runakunata ñakatsiyan.
21Paykunaqa jutsaynaq runakunapa contran shäriyänanpämi willanakuyan.
Alli ruraq runakunata wanutsiyänanpämi awniyan.
22Tsaynö kaptinpis Tayta Diosmi noqataqa tsapäman.
Amparakunä qaqam payqa kaykan.
23Mana alli ruraq runakunataqa paymi castiganqa.
Tayta Diosnintsikmi paykunata ushakätsinqa.
Who We AreWhat We EelieveWhat We Do
2025 by iamachristian.org,Inc All rights reserved.
