1Judá provinciapa mandaqninkunaqa llapanpis Jerusalénchömi täyarqan. Wakin runakunam suertiyayarqan cada chunka castapita juk casta Tayta Dios akranqan Jerusalénchö täyänanpä. Suertiyaptin mana yarqamuqkunanam jinan markankunallachö täyarqan.
2Wakinnam voluntäninpita Jerusalénchö täyänanpä aywayarqan. Paykunatam runakuna kushikurnin chaskiyarqan.
3Judá provinciachö quëdaqkunaqa kikinkunapa chakrankunachö y markankunachömi täyarqan. Tsay runakunam kayarqan sacerdötikuna, levitakuna, templuchö aruqkuna, Salomónpa sirviqninkunapita miraqkuna y wakin Israel runakunapis.
Jerusalénchö täyänanpä markankunapita aywaq runakuna mayqan mayqan kayanqanpis kaychömi qellqashqa kaykan. Paykunaqa cada ünunkunam castanpa mandaqnin kayarqan.
4(Jerusalénchömi Judá trïbu runakuna y Benjamín trïbu runakuna täyarqan.)
Judá trïbu runakunapita Jerusalénman aywaq runakunam kayarqan:
Ataías (Payqa Uzíaspa tsurinmi karqan. Uzíasqa Zacaríaspa tsurinmi karqan. Zacaríasqa Amaríaspa tsurinmi karqan. Amaríasqa Sefatíaspa tsurinmi karqan. Sefatíasqa Mahalaleelpa tsurinmi karqan. Mahalaleelqa Fares castam karqan)
5y Maasías. (Payqa Barucpa tsurinmi karqan. Barucqa Colhozipa tsurinmi karqan. Colhoziqa Hazaíaspa tsurinmi karqan. Hazaíasqa Adaíaspa tsurinmi karqan. Adaíasqa Joiaribpa tsurinmi karqan. Joiaribqa Zacaríaspa tsurinmi karqan. Zacaríasnam karqan Judápa tsurin Sela casta.)
6Judápa tsurin Fares casta runakuna Jerusalénchö täyarqan chusku pachak joqta chunka puwaq (468) runakunam. Paykuna llapanpis allish chölu kaqllam kayarqan.
7-8Benjamín trïbu runakunapita Jerusalénman aywaq runakunam kayarqan Salú, Gabai y Salai. Salúqa Mesulampa tsurinmi karqan. Mesulamqa Joedpa tsurinmi karqan. Joedqa Pedaíaspa tsurinmi karqan. Pedaíasqa Colaíaspa tsurinmi karqan. Colaíasqa Maasíaspa tsurinmi karqan. Maasíasqa Itielpa tsurinmi karqan. Itielqa Jesaíaspa tsurinmi karqan.
Jerusalénman aywaq Benjamín trïbu runakunam isqun pachak ishkay chunka puwaq (928) kayarqan.
9Paykunapa mandaqninmi karqan Zicripa tsurin Joel. Joeltanam tsay markachö mandar yanaparqan Senúapa tsurin Judá.
10Jerusalénman aywaq sacerdötikunam kayarqan Joiaribpa tsurin Jedaías, Jaquín
11y Seraías. Seraíasqa Hilcíaspa tsurinmi karqan. Hilcíasqa Mesulampa tsurinmi karqan. Mesulamqa Sadocpa tsurinmi karqan. Sadocqa Meraiotpa tsurinmi karqan. Meraiotqa Ahitobpa tsurinmi karqan. Ahitobqa mandaq sacerdötim karqan.
12Jedaías casta sacerdötikunam kayarqan puwaq pachak ishkay chunka ishkay (822) runakuna. Paykunaqa templuchömi Tayta Diosta sirviyarqan.
Paykunawanmi sacerdöti Adaías kaykarqan. Adaíasqa Jerohampa tsurinmi karqan. Jerohamqa Pelalíaspa tsurinmi karqan. Pelalíasqa Amsipa tsurinmi karqan. Amsiqa Zacaríaspa tsurinmi karqan. Zacaríasqa Pasurpa tsurinmi karqan. Pasurqa Malquíaspa tsurinmi karqan.
13Adaías castachö mandaqkunallata yupayaptinmi ishkay pachak chusku chunka ishkay (242) runakuna kayarqan.
Paykunawanmi sacerdöti Amasai karqan. Amasaiqa Azareelpa tsurinmi karqan. Azareelqa Azaipa tsurinmi karqan. Azaiqa Mesilemotpa tsurinmi karqan. Mesilemotqa Imerpa tsurinmi karqan.
14Amasai casta sacerdötikunam kayarqan pachak ishkay chunka puwaq (128) runakuna. Paykunaqa llapanpis allish chölu kaqllam kayarqan. Mandaqninmi Gedolimpa tsurin Zabdiel karqan.
15Jerusalénman aywaq levitakunam kayarqan:
Semaías (Payqa Hasubpa tsurinmi karqan. Hasubqa Azricampa tsurinmi karqan. Azricamqa Hasabíaspa tsurinmi karqan. Hasabíasqa Bunipa tsurinmi karqan),
16Sabetai, Jozabad (paykunaqa levitakunapa mandaqnin karmi Diospa templun waqtanchö aruqkunapa capatazninkuna kayarqan),
17Matanías (Payqa karqan Micaíapa tsurinmi. Micaíaqa Zabdipa tsurinmi karqan. Zabdiqa Asafpa tsurinmi karqan. Asaf karqan Tayta Diosta mañakunqan höra alabaqkunapa directorninmi),
Bacbuquías (Payqa karqan Mataníasta mandar yanapaqmi)
y Abda (Payqa Samúapa tsurinmi karqan. Samúaqa Galalpa tsurinmi karqan. Galalqa Jedutúnpa tsurinmi karqan).
18Tayta Dios akranqan sagrädu Jerusalénchö täraq levitakunam kayarqan ishkay pachak puwaq chunka chusku (284).
19Jerusalén punku cuidaq runakunam kayarqan Acub, Talmón y castankuna. Paykunaqa Jerusalénman aywayarqan pachak qanchis chunka ishkay (172) runakunam.
20Tsaypita kaqqa Israel runakuna, sacerdötikuna y levitakunapis täyarqan Judáchö kaykaq kikinkunapa markankunachönam.
21Diospa templunchö aruqkunam Ofel barriuchö täyarqan. Paykunapa mandaqninkunam kayarqan Zihawan Gispa.
22Jerusalénchö täraq levitakunapa mandaqninmi karqan Uzi. Uziqa Banipa tsurinmi karqan. Baniqa Hasabíaspa tsurin karqan. Hasabíasqa Mataníaspa tsurin karqan. Mataníasqa Micaíapa tsurin karqan. Micaíaqa Asaf castam karqan. Paykunaqa Tayta Diospa templunchö cantaqkunapa directorninmi kayarqan.
23Templuchö cantaqkuna qoyay qoyay churanakuypa cantayänanpäqa reymi ordenashqa karqan.
24Mesezabeelpa tsurin Petaíastam rey churashqa karqan runakuna quejakuyanqanta arreglananpä. Mesezabeelmi karqan Zera casta. Zeraqa Judápa tsurinmi karqan.
25Wakin kaq Judá trïbu runakuna täyarqan Quiriat-arba partichö y caseriunkunachö, Dibón partichö y caseriunkunachö y Jecabseel partichö y caseriunkunachö.
26Tsaynöllam täyarqan Josué markachö, Molada markachö, Bet-pelet markachö,
27Hazar-sual markachö, Beerseba partichö y caseriunkunachö,
28Siclag markachö, Mecona partichö y caseriunkunachö,
29En-rimón partichö, Zora partichö, Jarmut partichö,
30Zanoa partichö, Adulam partichö y caseriunkunachö, Laquis partichö y Azeca partichö y caseriunkunachö. Tsaymi Judá trïbu runakunaqa täyarqan Beersebapita hasta Hinom raqrayaq.
31Benjamín trïbu runakunam täyarqan Geba markachö, Micmas markachö, Aía markachö, Bet-el partichö y caseriunkunachö,
32Anatot markachö, Nob markachö, Ananías markachö,
33Hazor markachö, Ramá markachö, Gitaim markachö,
34Hadid markachö, Seboim markachö, Nebalat markachö,
35Lod markachö, Ono markachö y Artesänukuna Täyanqan Pampa niyanqanchöpis.
36Wakin levitakunaqa Judá trïbu runakuna täyanqanpita aywakuyarqan Benjamín trïbu runakuna täyanqanchö täyänanpämi.
Who We AreWhat We EelieveWhat We Do
2025 by iamachristian.org,Inc All rights reserved.
