Isaías 19 - Bible in Quechua of South Conchucos（qxo）

Egipto nación imanö kananpäpis ninqan

1Kaychömi qellqashqa kaykan Egipto nación imanö kananpä Tayta Dios revelanqan.

Ras aywaq pukutay jananchömi Egiptuman Tayta Dios shamuykan.

Egiptuchö ïdulukunapis paypa lädunchöqa tsuktsukyäyanmi.

Pasaypa mantsariywanmi Egipto runakunapa shonqunkunapis ushakaykan.

2Tayta Diosmi nin:

<

Chikinakurmi wawqinwan y runa mayinwanpis pelyayanqa.

Juk markachö täraqkunawan juk markachö täraqkunapis pelyayanqam.

Juk nación runakunapis juk nación runakunawanmi guërrata rurayanqa.

3Egipto runakunam mantsakashqa kayanqa.

Imata rurayänanpä yarpäyanqantapis manam rurayanqatsu.

Tsaymi imata rurayänanpäpis ïdulukunata, brüjukunata, wanuqkunapa almanta y adivïnukunata tapukuyanqa.

4Tsaynöllam juk reypa poderninman Egipto runakunata churashä.

Tsay reyqa pasaypa mana allim kanqa>>.

Llapanta mandaq Tayta Diosmi tsaynö nin.

5Nilo mayu tsakiptin raqrapis yakuynaqmi kanqa.

6Sikyakunachö qocharaq yakupis asyanqam.

Raqrakunapa aywaq yakupis tsakinqam.

Carrïzukuna y ututukunapis tsakinqam.

7Nilo mayu kuchunkunapis tsakinqam.

Lädunkunachö kaykaq qewapis tsakirmi ushakanqa.

Llapan muruyanqankunapis chipyaqmi tsakir ushakanqa.

8Nilo mayuchö anzuëluwan pescaqkunapis llakikurninmi waqayanqa.

Atarräyawan pescaqkunapis pasaypam llakikuyanqa.

9Lïnu putskaqkunapis lïnu manana kaptinmi ima ruraytapis puëdiyanqanatsu.

10Tëla awaqkunapis lïnu ushakaptinmi pasaypa llakikuyanqa.

Arupakuqkunapis pasaypam mantsakäyanqa.

11¡Zoán markapa autoridäninkunaqa yarpayniynaq upa runakunam!

¡Rey Faraónta yätsiqkunapis upayashqam kaykäyan!

¡Imanirtä Faraónta niyanki tantiyaq runakuna casta kayanqaykita!

¡Imanirtä payta niyanki unay reykuna casta kayanqaykita!

12Faraón, ¿maytä yachaq runaykikuna? Rasunpa yachaq karqa mä musyatsiyäshuy llapanta mandaq Tayta Dios Egiptuta imanö rurananpäpis yarpanqanta.

13Zoán markapa autoridäninkunaqa upanömi kaykäyan. Menfis markapa autoridäninkunapis llutantam criyiyan. Provinciakunapa mandaqninkunapis Egipto runakunata llutantam criyitsiyashqa.

14Egipto runakunataqa Tayta Diosmi pantakätsishqa. Tsaymi lanzanqanyaq machashqa runa tsankapaqnö imata rurayänanpäpis tantiyayantsu.

15Egipto nación ushakänan junaq chämuptinqa manam mandaqnin reypis, ni común runapis, ni rïcupis ni pobripis salvanqanatsu.

Egipto runakuna Tayta Diosta sirviyänanpä ninqan

16Llapanta mandaq Tayta Dios castiganan junaqmi Egipto runakuna warminö mantsariyanqa. Paykunata castigananpä makin joqarishqa kaykanqanta musyarmi pasaypa mantsarir tsuktsukyäyanqa.

17Judá runakunatapis pasaypam mantsayanqa. Judá runakunapita parlaptillanmi yarpäyanqa llapanta mandaq Tayta Dios castigananpä kanqanta. Tsayta yarparmi pasaypa mantsariyanqa.

18Tsay junaqmi Egiptuchö pitsqa markachö hebreo idiömata parlayanqa. Tsaychö täraqkunaqa llapanta mandaq Tayta Diosllata sirviyänanpämi awniyanqa. Tsay pitsqa markakunapita jukpa jutinmi kanqa Herez.

19Tsay junaqmi jinan Egiptuchö Tayta Diospä juk altarta pirqayanqa. Lindërunchönam Tayta Diosta yarpäyänanpä juk juytu rumita ichïtsiyanqa.

20Tsayta rurayanqa llapanta mandaq Tayta Diosta Egiptuchö sirviyanqanta pïmaypis musyayänanpämi.

Pipis ñakatsiptinqa Tayta Diostam mañakuyanqa. Tsaymi juk salvakuqta mandamunqa ñakaypita jipinanpä.

21Tsaynöpam Egipto runakunata Tayta Dios musyatsinqa llapanpä poderyuq kanqanta. Tsayta tantiyarmi Egipto runakunapis sacrificiukunata y tsaki mikuy ofrendakunata awniyanqannölla templuman apayämunqa.

22Mana cäsukuq kayanqanpita Egipto runakunata castigarpis Tayta Dios yanapanqanam. Tsaynö yanapanqa paykunapis Tayta Dios ninqanta cäsuyaptinmi.

23Tsay witsanqa jatun nänim Egiptupita Asiriayaq chanqa. Tsaymi Asiria runakuna Egiptuman aywayanqa y Egipto runakunapis Asiriamanmi aywayanqa. Egipto runakunawan Asiria runakuna juntakaykurmi Tayta Diosta sirviyanqa.

24Israel runakunapis Egipto runakunawan y Asiria runakunawanmi juntakäyanqa. Tsaynöpam maytsaychö täraqkunapä bendición kanqa.