Salmo 139 - Bible in Quechua of South Conchucos（qxo）

Salmo 139 (138)Tayta Dios llapanta musyanqanpita alabanqan 1a (1a) Cantaqkunapa mandaqninpämi. David qellqanqan salmu.

1 1 (1b) Tayta Dios, imanö kanqätapis reqimankim.

2Musyankim imay jamanqäta y imay shärinqätapis.

Karupitapis yarpanqäkunatam musyanki.

3Wäray shärikunqäpita paqas pununqäyaqmi llapan ruranqätapis musyanki.

Maypa aywaptïpis rikaykämankim.

4 Tayta Dios, manarä parlaptïmi imata ninäpä kanqantapis musyanki.

5Maychö kaptïpis rikaykämankim.

Makikiwanmi tsapaykämanki.

6Tsaynö kanqaykiqa pasaypa kushikuypämi.

Manam imanöpapis tantiyayta puëdïtsu.

7Espïrituyki rikaykämaptinqa ¿mayllamanrä pakaküman?

Puntaykipita ¿mayparä qeshpïman?

8Qoyllurkuna kaqman witsaptïpis tsaychömi kaykanki.

Patsa ruriman pakakuptïpis tsaychömi kaykanki.

9Rupay yarqamunan lädupa pärir aywakuptïpis y lamar tsimpanchö täkuptïpis

10ñöpächömi kaykanki.

Maychö kaykaptïpis derëcha makikiwanmi jancharämanki.

11Alläpa tsakayman pakakurpis

12qampita manam pakakuyta puëdïtsu.

Paqaspapis junaqpanöllam rikanki.

Qampäqa paqaspis y junaqpis iwalllam.

13Qammi mamäpa pachanchö llapan cuerpüta kamamarqayki.

14Espantaypä kamamanqaykipitam alabä.

Ruranqaykikunaqa pasaypa kushikuypämi kaykan.

Tsaynö kanqantam llapan shonqüwan criyï.

15Mamäpa pachanchö kaykaptï manam ni pipis rikamashqatsu.

Tullükuna yurinqanta qamllam rikarquyki.

Patsa rurinchönö mana rikakaptinpis qammi kamamarqayki.

16Tsayrä rurakaykaptïmi rikamarqayki.

Manarä juk junaqyuq kaykaptïmi ayka wata kawanäpäpis libruykiman qellqashqana karqayki.

17Tayta Dios, noqapä yarpanqaykikunaqa pasaypa kushikuypämi.

Tsay yarpanqaykikunaqa atskam kaykan.

18Yupayta munaptïpis arënapita mas atskam.

Pununqäpita rikcharkurpis qamwanmi imaypis kaykä.

19Tayta Dios, mana alli ruraq runakunataqa llapanta ushakaykatsillay.

Wanutsikuq runakunata ñöpäpita qarquykullay.

20Paykunam contrayki parlayan.

Jutikitapis llutallam joqariyan.

21 Tayta Dios, chikishuqnikikunata rikaytapis mana munanqätam musyanki.

Mana cäsushuqnikikunatam pasaypa rabyapä.

22Paykunatam pasaypa chikï.

Paykunaqa noqapapis conträmi kaykäyan.

23Tayta Dios, imanö kawanqätapis rikaykullay.

Shonqü allita o mana allita yarpanqantapis musyaykullay.

24Yarpanqäpis, parlanqäpis o ruranqäpis mana alli kaptinqa tantiyaykatsillämay.

Qamwan imayyaqpis kawanäpä yachaykatsillämay.