Salmo 18 - Bible in Quechua of South Conchucos（qxo）

Salmo 18 (17)Chikiqninkunapita salvaptin Tayta Diosta alabanqan 2 Samuel 22 1-2a (1-2a) Cantaqkunapa mandaqninpämi. Tayta Diospa sirviqnin David qellqanqan salmu. Saúlpita y llapan contrankunapita salvaskiptinmi Tayta Diosta David kay salmuta cantar alabarqan.

1 1 (2b) Tayta Dios, qamtam pasaypa kuyä.

Qammi kallpatapis qaramanki.

2 2 (3) Tayta Diosqa tsapämaq qaqam.

Paymi pakakunä y salvamaqnï.

Pay japallanmi Diosnï.

Amparakunä qaqam kaykan.

Paymanmi yärakü.

Escüdü karmi tsapäman.

Poderösu karmi imaypis salvaman.

Paymi altuchö pakakunä machay.

3 3 (4) Tayta Diostam imaypis alabashä.

Mañakuptïmi conträkunapita imaypis salvaman.

4 4 (5) Runata prësu tsariskir wataqnömi wanuypis tsarimayta munarqan.

Imaykatapis apaq lloqllanömi ushakätsimänanpä karqan.

5 5 (6) Wanuypis waskanwanmi watamarqan.

Wanutsikuq trampatam churapämarqan.

6 6 (7) Wanunäpäna kanqäta yarparmi Tayta Diosta mañakurqä.

Yanapamänanpämi Diosnïta rugakurqä.

Rugakuptïmi templunpita wiyamarqan.

Pasaypa llakikur mañakunqätam wiyamarqan.

7 7 (8) Patsapis pasaypam kuyurqan.

Jirkakunapa cimientunpis alläpam tsuktsukyäyarqan.

Tayta Dios rabyaptinmi llapanpis kuyurqan.

8 8 (9) Senqanpitam qoshnipis yarqamurqan.

Shiminpitam lunyaykaq ninapis yarqamurqan.

Rawraykaq shanshatam aqtumurqan.

9 9 (10) Ciëlu punkuta kichaskirmi urämurqan.

Chakin jawanchöpis yana pukutaymi karqan.

10 10 (11) Querubín angelnin muntashqam pärimurqan.

Vientu jananchömi cörrilla shamurqan.

11 11 (12) Paypa pakakunanqa pasaypa tsakaymi karqan.

Yana pukutaymi payta tsapaskirqan.

12 12 (13) Illaqukuynö chipipiyllam puntanpita yarqamurqan.

Runtu tamyawan rawraykaq shanshallam tamyamurqan.

13 13 (14) Tayta Dios ciëlupita parlamunqanmi maqakuynörä wiyakämurqan.

Ciëlupitam poderösu Diospa vozninpis wiyakämurqan.

Runtu tamyawan rawraykaq shansha chawpinpitam wiyakämurqan.

14 14 (15) Illaqukuyninta flëchatanörä mandamuptinmi conträkuna wakpa kaypa qeshpir aywakuyarqan.

15 15 (16) Tayta Dios ollqutupämuptinmi lamar rurinpis alayri rikakarqan.

Rabyar pükamuptinmi kay patsata tukmaraqkunapis rikakäyarqan.

16 16 (17) Tayta Diosmi ciëlupita makinta makyamarqan.

Lamar rurinchö jitarpukashqanö kaykaptïmi makinwan jipimarqan.

17 17 (18) Munayyuq conträkunapa makinpitam salvamarqan.

Noqapita mas poderyuq kayaptinpis paymi libramarqan.

18 18 (19) Pasaypa desgraciachö kaykaptïmi conträkuna atacayämarqan.

Tsaynö kaykaptïmi Tayta Dios yanapamarqan.

19 19 (20) Yanapamarmi alliman churamarqan.

Kuyamarmi salvamarqan.

20 20 (21) Munanqannö kawaptïmi jipimarqan.

Allillata ruraq kaptïmi salvamarqan.

21 21 (22) Tayta Dios munanqannöllam imaypis kawaykä.

Jutsata mana ruraypam payta imaypis qatiraykä.

22 22 (23) Ninqankunataqa llapantam yarparaykä.

Estatütunkunataqa imaypis cumpliykämi.

23 23 (24) Noqaqa pay munanqannömi kawarqü.

Llutan ruraykunapitapis witikurqümi.

24 24 (25) Allillata ruraq kaptïmi imaykapitapis Tayta Dios salvamashqa.

Jutsaynaq kanqäta musyarmi yanapamashqa.

25 25 (26) Tayta Dios, kuyapäkuqkunataqa kuyapankim.

Allillata ruraqkunataqa yanapankim.

26 26 (27) Alli kawaqkunataqa allim rikanki.

Peru trampösu kaqkunatam sïqa castiganki.

27 27 (28) Humildikunataqa salvankim.

Peru runa tukuqkunatam sïqa penqakuyman churanki.

28 28 (29) Tayta Diosllä, noqapä aktsinömi kanki.

Tsakäpakushqanö kaptïpis qammi tantiyatsimanki.

29 29 (30) Yanapamaptikim atska soldädukunawanpis pelyashä.

Markapa murällan altu kaptinpis achpaypam yaykushä.

30 30 (31) Tayta Dios munanqannö kawayqa imaypis allim.

Llapan awninqantapis payqa cumplinmi.

Payman yärakuqkunataqa escüdunömi tsapan.

31 31 (32) Tayta Diospita mas juk Diosqa manam kantsu.

Tayta Diosnintsiknöqa manam pipis tsapämantsiktsu.

32 32 (33) Tayta Diosqa kikinmi kallpatapis qaraman.

Paypa poderninchö karmi munanqannö alli kawä.

33 33 (34) Pay yanapamaptinmi imayka lluytsunö cörrï.

Jirkakunapa purirpis mana llutskaypam purï.

34 34 (35) Guërrachö alli pelyaq kanäpäpis paymi yachatsiman.

Bronci flëchata sutar wiksutsinäpäpis paymi kallpata qaraman.

35 35 (36) Qamqa escüdü karmi imaykapitapis tsapämar salvamarquyki.

Derëcha makikiwanmi tsararämarquyki.

Kuyapämarmi llapanchöpis yanapamarquyki.

36 36 (37) Qammi shumaq tantiyatsimarquyki maypa aywarpis munanqaykinö kawanäpä.

37 37 (38) Chikimaqnïkunatapis qati qatiykurmi ushakätsirqü.

Llapanta wanuskatsirrämi jamarqü.

38 38 (39) Paykunataqa chipyaqmi wanutsirqü.

Vinciskirmi mashtaraykaqta dëjarqü.

Manam paykunaqa yapay conträ shäriyashqatsu.

39 39 (40) Qammi guërrachö pelyanäpä kallpata qaramarquyki.

Conträkunata vincinäpämi makïman churamurquyki.

40 40 (41) Vincinäpä yanapamaptikim kunkapita jarurqü.

Chikimaqnïkunataqa chipyaqmi ushakätsirqü.

41 41 (42) Paykunataqa qayakuyaptinpis manam pipis yanapashqatsu.

Tayta Diosta mañakuyaptinpis manam cäsushqatsu.

42 42 (43) Polvuta vientu ushakätsinqannömi paykunatapis ushakätsirqü.

Cällichö mituta lanquqnömi paykunatapis lanqurqü.

43 43 (44) Israel nacionchö conträ shäriyaptinpis qammi salvamarquyki.

Juk nacionkunapa mandaqnin kanäpämi churamarquyki.

Jäpa runakunam kanan sirviyäman.

44 44 (45) Juklä nación runakunapis podernïchömi kayan.

Mandaptïqa rasmi paykuna cäsuyäman.

45 45 (46) Tsay jäpa runakunaqa mantsayämanmi.

Qayaptïpis pakaräyanqanpita tsuktsukyarrämi yarqayämun.

46 46 (47) ¡Tayta Dios alabashqa kaykullätsun!

¡Tsapämaqnï alabashqa kaykullätsun!

¡Salvamaqnï alabashqa kaykullätsun!

47 47 (48) Qammi conträ shäriqkunata castigarquyki.

Llapan nación runakunatapis podernïmanmi churamurquyki.

48 48 (49) Qammi chikimaqnïkunapita salvamarquyki.

Conträ shäriqkunapitam libramarquyki.

Wanutsikuq runakunapitapis tsapämarquykim.

49 49 (50) Tsaymi may nacionchö karpis adorashayki.

Llapan shonqüwan cantarmi alabashayki.

50 50 (51) Akranqayki reytaqa llapanchömi yanapaykanki.

Davidta y paypita miraqkunatam imaypis kuyapaykanki.