Salmo 68 - Bible in Quechua of South Conchucos（qxo）

Salmo 68 (67)Contrankunata Tayta Dios vincinqanpita alabanqan 1 (1) Cantaqkunapa mandaqninpämi. David qellqanqan salmu. Cantanantsikpämi.

1 1 (2) Tayta Dios, janäkuna shäriykullay.

Contraykikuna mashtakaypa mashtakar qeshpiyätsun.

Chikishuqnikikunapis puntaykipita qeshpir aywakuyätsun.

2 2 (3) Vientuwan qoshni illakaqnö illakäyätsun.

Ninachö cëra tsulluqnö ushakäyätsun.

Jutsa ruraqkunapis puntaykichö ushakäyätsun.

3 3 (4) Peru alli ruraq runakuna sïqa kushikuyätsun.

Ñöpaykichö kushishqa kawayätsun.

Kushikuypita saltaykachäyätsun.

4 4 (5) Tayta Diosta alabayay.

Himnukunata cantar jutinchö alabayay.

Paymi pukutaynin muntashqa purin.

Paypa jutinqa Yahwehmi.

¡Paypa puntanchö kushikuyay!

5 5 (6) Tayta Diosqa sagrädu templunchömi taykan.

Paymi waktsakunapa papänin.

Paymi viüdakunapa favornin.

6 6 (7) Tayta Diosmi castaynaqkunata yanapan castayuqnö kayänanpä.

Prësukunata jipiskirmi imaykayuqpis kayänanpä yanapan.

Peru mana cäsukuq runakunatam sïqa desiertuchö taykaqtanö ñakatsin.

7 7 (8) Tayta Dios, kuyanqayki runakunatam Egiptupita yarqayämunanpä yanaparqayki.

Tsaypitam desiertupa pushamurqayki. Selah

8 8 (9) Patsapis pasaypam kuyurqan.

Tamyapis palchachayparämi tamyamurqan.

Tayta Dios tsaychö kaptinmi Sinaí jirkapis kuyurqan.

Payqa Israel runakunata kuyaq Tayta Diosmi.

9 9 (10) Tayta Dios, tamyatapis allim tamyatsimurquyki.

Qachpayashqa chakratapis alli wayuq chakramanmi tikratsirquyki.

10 10 (11) Kuyanqayki runakuna kayaptïmi tsaychö täyänäpä churayämarquyki.

Kuyayämarmi imäkuna faltaptinpis yanapayämarquyki.

11 11 (12) Tayta Dios mandaptinmi atskaq warmikuna willakur niyarqan:

12 12 (13) <<¡Contrantsik reykunapis soldädunkunawan qeshpirmi aywakuyashqa!>>

Contrankunapita apayanqantam wayinkunachö warmikuna rakipänakuyarqan.

13 13 (14) Ashmankunata cuidar quëdaqkunapis palumanö adornukunatam chaskiyashqa.

Tsay adornukuna kaykan yuraq qellaypita rurashqa älayuq y qoripita rurashqa plümayuqmi.

14 14 (15) Llapanpä poderyuq Tayta Dios mantsakätsiptinmi tsay reykuna qeshpir aywakuyarqan.

Tsaynö qeshpiyanqanmi Salmón jirkachö rashtata vientu apanqannö karqan.

15 15 (16) Basán jirkakunaqa pasaypam lliwlliwyaykan.

Puntankunapis pasaypa altum.

16 16 (17) Altu jirkakuna, ¿imanirtä chikir rikaraykäyanki Tayta Dios täkunqan Sión jirkanta?

¡Tsaychömi Tayta Dios imayyaqpis täkunqa!

17 17 (18) Tayta Diospa guërra carrëtankunaqa yupaytapis mana atipaypämi.

Tsay carrëtankunawanmi Sinaí jirkapita templunman shamushqa.

18 18 (19) Tayta Dios, prësukunata apamurmi witsämurquyki.

Runakuna apayämunqan qaraykunatam chaskirquyki.

Mana cäsukuq runakunapis podernikichönam kaykäyan.

Paykuna täyanqanchönam taykanki.

19 19 (20) ¡Salvakuq Tayta Dios alabashqa kaykullätsun!

Paymi qoyay qoyay yanapamantsik. Selah

20 20 (21) Tayta Diosnintsikqa imaykapitapis salvakuq Diosmi.

Wanuypitapis paymi salvamantsik.

21 21 (22) Tayta Diosqa contrankunapa umantam pakinqa.

Jutsa rurayllachö kawaqkunapa umantam pakinqa.

22 22 (23) Tayta Diosmi nin:

<

Lamar rurinpitapis jipimushämi.

23 23 (24) Tsaynö rurashä yawarninwan chakikikunata mayllayänaykipä

y allquykikunapis yawarninta laqwayänanpämi>>.

24 24 (25) Mandamaqnï Tayta Dios, atskaq runakunam adorayäshunki.

Fïlayllapam templuykiman yaykuykäyan.

25 25 (26) Puntatam cantaqkuna aywaykäyan.

Qepantanam tukaqkuna aywaykäyan.

Chawpintanam jipashkuna panderëtakunata tukaraykar aywaykäyan.

26 26 (27) ¡Llapayki Tayta Diosta alabayay!

¡Israel runakuna, llapayki qorikaykur alabayay!

27 27 (28) Puntantam qepa kaq Benjamín trïbu runakuna aywaykäyan.

Paykunawanmi aywaykäyan Judá, Zabulón y Neftalí trïbukunapita atskaq mandaqkuna.

28 28 (29) Tayta Dios, poderyuq kanqaykita tantiyaykatsiyällämay.

Ñöpata yanapayämanqaykinö yapay yanapaykayällämay.

29 29 (30) Jerusalén templuykimanmi reykuna qaraykunata apayämunqa.

30 30 (31) Guërrallapä yarparaq runakunata castigaykullay.

Paykunaqa ututukunachö pakakuykur atacakuq ashmanömi kayan.

Tsaynöllam chucaru törukunanö kayan.

Rïcu kayta munarmi nacionkunata vinciskir imaykantapis apakuyan.

Tsaynö kaqkunataqa llapanta ushakaykatsillay.

31 31 (32) Egiptupitam Faraón mandamunqan runakuna shayämunqa.

Etiopía nación runakunam Tayta Diosta alabayanqa.

32 32 (33) Kay patsachö llapan nación runakuna, Tayta Diosta alabayay.

Himnukunata cantar alabayay. Selah

33 33 (34) Tayta Diosqa muntashqam ciëlupa purin.

Parlamunqanpis maytsaymanmi wiyakämun.

34 34 (35) Tayta Dios poderösu kanqanpita alabayay.

Payqa poderösu karmi Israel runakunata yanapan.

Azulyaraykaq ciëluchöpis poderösum kaykan.

35 35 (36) Templunchöpis Tayta Diosqa espantaypämi kaykan.

Kuyanqan Israel runakunatam poderösu kayninwan yanapan.

¡Tayta Dios alabashqa kaykullätsun!