Salmo 73 - Bible in Quechua of South Conchucos（qxo）

Libru 3 Salmo 73—89Salmo 73 (72)Tayta Diosman yärakunqan llapanpitapis mas alli kanqan 1a (1a) Asaf qellqanqan salmu.

1 1 (1b) Israel runakunataqa Tayta Diosmi kuyan.

Limpiu shonquyuqkunataqa shumaqmi yanapan.

2Tsaynö kaptinpis noqaqa cäsi cäsim Tayta Diosman yärakunqäpita witikurqü.

3Jutsa ruraq runakuna rïcuyäyanqanta rikarmi pasaypa envidiakurqä.

4Paykunataqa manam qeshyapis tsarintsu.

Wanuytapis manam yarpäyantsu.

5Wakin runakunanöqa manam ñakayantsu.

Manam ima desgraciapis päsantsu.

6Runa tukurmi puriykäyan.

Runa mayinta atacayänanpäpis listum kaykäyan.

7Imankunapis kaptinmi werayaywan ñawinkunapis saltananrä.

Mana alli rurayllapämi imaypis yarparäyan.

8Pïmaytapis manakaqmanmi churayan.

Pitapis maqayänanpä o wanutsiyänanpämi jurar puriyan.

9Tayta Diospa contranmi parlayan.

Runa mayinpapis contranmi shäriyan.

10Tsaynö kayaptinpis paykunataqa runakuna alabayanmi.

Imata niyanqantapis criyiyanmi.

11Tsay mana alli ruraq runakunam niyan:

<<¿Imanöpatä llapantaqa Dios musyanqa?

¿Imanöpatä ciëluchö kaykarqa rikanman?>>

12Tsaynömi mana alli ruraq runakuna kayan.

Paykunaqa mana ñakayllapam rïcuyäyan.

13Noqaqa manakaqllapämi jutsata mana rurar kawaykä.

Manakaqllapämi allita rurar kawaykä.

14Qoyay qoyaymi mana allikuna päsaman.

Cada wäraymi ñakaykä.

15Tsaynö kaptinpis tsay yarpanqäkunata manam parlätsu.

Tsaykunata parlarqa kuyanqayki runakunatam rabyanätsïman karqan.

16Mana alli ruraq runakuna imanir alli kawayanqanta manam tantiyätsu.

17Tayta Diospa templunman aywarrämi tantiyarqü.

Tsaychörämi tsay runakuna imanö ushakäyänanpä kanqanta tantiyarqü.

18Paykunaqa pasaypa peligruchömi kaykäyan.

Ushakashqa kayänanpämi Tayta Dios destinashqa.

19Paykunaqa illaqpitam ushakäyanqa.

Mantsariyllawanmi ushakäyanqa.

20Sueñunqanta runa qonqanqannömi paykunapis qonqashqa kayanqa.

Tayta Dios, castigaptikim tsaynö kayanqa.

21Shonqü pasaypa rabyashqa kaptinmi qallayashqa karqä.

22Mana tantiyakuq karmi puntaykichö imayka ashmanö karqä.

23Tsaynö kaptïpis qammi yanapamanki.

Derëcha kaq makïpitam jancharämanki.

24Yätsimarmi shumaq tantiyatsimanki.

Tsaypitam gloriaman pushamanki.

25Ciëluchöpis salvamaqnï qamllam kanki.

Kay patsachöpis makikichö karmi contentu kawashä.

26Kallpä ushakaptinpis y shonqü pasaypa llakikuptinpis qammi imaypis valuratsimanki.

Kikikim imayyaqpis herenciä kaykanki.

27Qampita witikuqkunataqa chipyaqmi ushakätsinki.

Mana cäsukuqkunatapis chipyaqmi illakätsinki.

28Peru noqam sïqa imaypis qamllaman yärakamushä.

Qamman yärakamunqäqa llapanpitapis mas allim.

Qammi kanki tsapämaqnï, Tayta Dios.

Yanapamanqaykitam pïmaytapis willashä.