1 Corintios 11 - Bible in Quechua of South Conchucos（qxo）

1Jesucristo kawanqannö kawanqäta rikayämanqaykinö qamkunapis kawayay.Iglesiachö warmikuna shukutakuyänanpä yätsinqan

2[Wawqikuna y panikuna,] qamkuna imaypis yarparäyämaptiki y yachatsinqäta mana qonqayaptikim kushikü.

4Wawqikuna y panikuna qorikäyanqanchö mayqan runapis Tayta Diosta mañakur o willakuyninta willakur manam shukutakunmantsu. Shukutakurqa Jesucristutam manakaqman churaykan.

5Peru warmim sïqa Tayta Diosta mañakur o willakuyninta willakur shukutakunman. Mana shukutakurqa runantam manakaqman churan. Tsaynö rurarqa aqtsanta warmi rutukuskir penqakuypä kanqannömi kaykan.

6Shukutakuyta mana munaq warmiqa mejor aqtsanta qara putuypa rutukutsun. Aqtsanta rutukuyta penqakurqa umanta shukutakutsun.

7Runata kamar Tayta Dios kikin niraqtam kamarqan. Tsaymi qorikäyanqanchö Tayta Dios respitashqa kananpä runakunaqa shukutakuyanmantsu. Peru warmikunam sïqa runan alli rikashqa kananpä umankunata shukutakuyanman.Gén. 1.26-27.

8Manam warmipitatsu runata Tayta Dios kamarqan, sinöqa runapitam warmita kamarqan.

9Tsaynölla manam warmi japallan kaptintsu runata kamarqan, sinöqa runa japallan kaptinmi warmita kamarqan.Gén. 2.18-23.

10Tsaymi warmikunaqa runantapis y angelkunatapis respitar umanta shukutakuyanman.

11Peru tsaynö kaptinpis warmi mana kaptinqa runa manam yurinmantsu. Runa mana kaptinqa manam warmipis kamashqatsu kanman karqan. Tsaynö kananpämi Tayta Dios permitirqan.

12Musyantsikmi ollqupita warmita Tayta Dios kamanqanta. Tsaynöllam musyantsik warmipita ollqupis yurinqanta. Warmipis ollqupis Tayta Diospitam kayan.

13Mä, qamkuna yarpachakuyay. ¿Allitsurä kaykan warmikuna umanta mana shukutakuyllapa Tayta Diosta mañakuyaptin?

14¿Manatsurä maytsaychöpis penqakuypä kaykan runa aqtsanta wiñatsiptin?

15Peru warmikunam sïqa jatusaq aqtsayuq kar kuyayllapä kayan. Warmikunapa aqtsanqa umanta shukutaraqnömi kaykan.

16Tsaykunapä capaz wakikiqa masta parlayta munaykäyanki. Peru noqakuna kaqchö y maytsaychöpis wawqikuna y panikuna qorikäyanqanchömi panikuna umanta imaypis shukutakuyan.

Santa Cënachö qallayätsinakuyanqan

17Qamkuna qorikäyanqaykichö allita rurayänaykipa rantinmi mana allita ruraykäyanki.

18Qorikäyanqaykichö qallayätsinakuykäyanqaykitam willayämashqa. Qamkunaqa quizás rasunpapis tsaynö kaykäyanki.

19Tsaynö qallayätsinakur kawarqa Tayta Dios munanqannöchi kawaykäyanki ¿aw?

20Tsaynö qallayätsinakushqa kaykar Santa Cënata mikuyanqaykipis manakaqllapämi kaykan.

21Santa Cënata mikuyänaykipä qorikarshi wakikiqa alli mikuyta apaykur mikuykäyanki. Wakikish mallaqaykäyanki. Wakikinash machäyanqaykiyaq upuykäyanki.

22Tsaynö rurarqa Tayta Dios salvanqan kaqkunatam manakaqman churaykäyanki y pobri kaqkunatam penqakuyman churaykäyanki. ¿Imanirtä wayillaykikunachö mikuyankitsu y upuyankitsu? Tsaynö rurar mana allitam ruraykäyanki.

Santa Cënapä yachatsinqan Mateo 26.26-29; Marcos 14.22-25; Lucas 22.14-20

23Señor Jesucristo Santa Cënapä yachatsinqallantam noqapis yachaykätsï. Wanutsishqa kananpä entreganan paqasmi Señor Jesucristo tantata aptarkur

24Tayta Diosta agradëcikurqan. Tsaypitam tantata pakiskir nirqan: <<[Mikuyay.] Kay tantaqa cuerpümi. Qamkuna raykur wanurmi cuerpüta Tayta Diosta entregashä. Kay tantata mikur imaypis yarpäyämanki>>.

25Tsaynöllam mikuyta ushaskir vïnuyuq väsuta aptarkur nirqan: < rurananpä jichanqä yawarnïmi.Éxo. 24.6-8; Jer. 31.31-34. Kay vïnuta upur imaypis yarpäyämanki>>.

26Jesucristo tsaynö nishqa kaptinmi cada vez Santa Cënachö tantata mikur y vïnuta upur yarpantsik noqantsik raykur Jesucristo wanunqanta. Tsaynölla imaypis rurashun Jesucristo kutimunqanyaq.

Imanö kawayanqanta yarpachakuskirrä Santa Cënata mikuyänanpä yätsinqan

27Tsaynö kaykaptinqa pipis qallayätsinakushqa o jutsata rurashqa kaykar Santa Cënachö tantata mikur o vïnuta upurqa Jesucristo wanunqanta y yawarninta jichanqantam manakaqman churaykan.

28Tsaynö kaykaptinqa imanö kawaykäyanqaykitapis shumaq yarpachakuskirrä tantata mikuyanki y vïnuta upuyanki.

29Señor Jesucristupa cuerpunta mana respitar tantata mikuqta y vïnuta upuq kaqtaqa Tayta Diosmi castiganqa.

30Tsaynö upuyanqaykipitash wakiki mana alliypa qeshyaykäyanki y wakikinash wanushqana kayanki.

31Tsaynö kaykaptinqa imanö kawaykäyanqaykitapis shumaqrä yarpachakuyay. Tayta Dios munanqannö kawayaptikiqa manam castigayäshunkitsu.

32Castigamarnintsikpis jutsa rurayta dëjanantsikpämi corrigimantsik.Deut. 8.5; Heb. 12.5-11. Tsaynöpam jutsa ruraqkunata infiernuman qaykurpis noqantsiktaqa qaykamäshuntsu.

33Wawqikuna y panikuna, tsaynö kaykaptinqa Santa Cënata mikuyänaykipä qorikar jukniki juknikipis shuyänakuyanki.

34Mayqaykipis mallaqarqa wayikikunachö imallatapis puntata mikuyanki. Tsaynöpam Santa Cënachö llutanta mana rurayaptiki Tayta Dios castigayäshunkinatsu.

Shamurnam wakin arreglaypä kaqtaqa arreglayäshayki.