1Kaychömi qellqashqa kaykan Damasco marka imanö kananpä Tayta Dios revelanqan.
Damasco marka chipyaq ushakarmi raqällana quëdanqa.
2Aroer partichö kaykaq markakunachö manam täyanqanatsu.
Qewallana junta kaptinmi pipis mana qarqushqa ashmakuna kayanqa.
3Efraín runakuna täyanqanchö corralashqa markakunapis manam kanqanatsu.
Damasco markachöpis rey manam kanqanatsu.
Siria nacionchö quëdaq runakunapis Israel nacionchö wallkaqlla kayanqannömi kayanqa.
Llapanta mandaq Tayta Diosmi tsaynö nin.
Israel nación castigashqa kananpä willakunqan4Tsay witsanmi Israel nacionpis poderniynaq kanqa.
Tsay nacionqa uyu runanöllam kanqa.
5Refaim pampachö trïguta segaskiptin raströjullana quëdanqannömi kanqa.
6Olïvusta tapsir wayuyninta qoriyaptin juk ishkayllana quëdaqnömi quëdanqa.
Mas rämasapa kaqkunachö kimsa chuskulla quëdanqannömi quëdanqa.
Israel runakunata kuyaq Tayta Diosmi tsaynö nin.
7Tsay witsanmi kamaqnin Tayta Diosta rugakuyanqa.
Israel runakunapa santu Diosninmanmi yärakuyanqa.
8Juk dioskunata mañakuyänanpä pirqayanqan altarkunaman manam aywayanqanatsu.
Manam kikinkuna rurayanqan Asera diösamanpis yärakuyanqanatsu
ni altarkunachö diosninkunaman inciensiuta qoshnitsiyanqanatsu.
9Tsay witsanqa Israelchö corralashqa markakunachöpis manam täyanqanatsu. Heveo runakunata y amorreo runakunata Israel runakuna ushakätsiyanqannö ushakätsiyaptinmi pasaypa raqällana quëdanqa.
10Tsaynö kayanki imaykapitapis salvashuqniki Tayta Diosta qonqayanqaykipitam.
Imapitapis tsapäshuqniki Tayta Diostam qonqayarqayki.
Tsaymi juklä nacionpita apatsimur ras poquq mikuykunata muruyaptikipis
11y muruyanqayki junaqlla jeqarkamur warayllan waytaptinpis manam ima cosëchapis kanqatsu.
Tsay junaq pasaypa ñakar waqayaptikim shonquykikunapis pasaypa nananqa.
12Lamar bunyaqnörämi contrantsik nacionkuna ollqüyanqan wiyakämun.
Ollqutupar qayaykachäyanqanpis mayu atskayar bunyaypa bunyar aywaqnörämi wiyakämun.
13Tsaynö qayarar shayämuptinpis Tayta Dios ollqutupaptinqa karupam qeshpir aywakuyanqa.
Jirkachö oqshata vientu apanqannö y polvuta shukukuy apanqannömi aywakuyanqa.
14Tsay runakunaqa patsa tsakaskiptin pasaypa mantsakashqam kaykäyan.
Patsa waränanpaqa manam kayannatsu.
Tsaynömi illakäyanqa imantsiktapis apaqkuna y markantsikta ushakätsiqkuna.
Who We AreWhat We EelieveWhat We Do
2025 by iamachristian.org,Inc All rights reserved.
