Salmo 64 - Bible in Quechua of South Conchucos（qxo）

Salmo 64 (63)Chikiqninkunapita tsapänanpä Tayta Diosta mañakunqan 1 (1) Cantaqkunapa mandaqninpämi. David qellqanqan.

1 1 (2) Tayta Dios, llakikur rugakamunqäta wiyaykallämay.

Mantsaypä chikimaqnïkunapita tsapaykallämay.

2 2 (3) Mana alli ruraq runakuna atacayämänanpä willanakuyaptin pakaykallämay.

Conträ shäriyänanpä willanakuyanqanpita salvaykallämay.

3 3 (4) Conträ parlayanqanqa fïlu espädanörämi shonqüman chaykun.

Venënuyuq flëchawan flëchaqnömi imaykatapis niyäman.

4 4 (5) Jutsaynaq runatam manakaqkunata tumpayan.

Pitapis mana mantsaypam llutalla tumpayan.

5 5 (6) Mana allita rurayänanpämi kikinkunapura willanakur parlapänakuyan.

Pitapis trampata churapäyänanpämi willanakuyan.

Paykunaqa pipis mana rikanqantam yarpäyan.

6 6 (7) Tsaynöllam yarpäyan pipis mana tarinanpä kanqanta.

¡Paykunaqa pasaypa mana allitam yarpäyan!

7 7 (8) Tsaymi Tayta Dios flëchanwan flëchanqa.

Paykunataqa illaqpitam castiganqa.

8 8 (9) Kikinkunapa shiminkunapitam chikishqa kayanqa.

Tsaynö kaykaqta rikarmi paykunata kushipäyanqa.

9 9 (10) Tayta Dios castiganqanta musyarmi llapan mantsariyanqa.

Tsaymi Tayta Dios imata ruranqantapis willakuyanqa.

Llapantapis Tayta Dios kamanqantam musyayanqa.

10 10 (11) Alli ruraq runaqa Tayta Dios yanapanqanpitam kushikunqa.

Imaykapita tsapänanpämi payllaman yärakunqa.

Tayta Dios munanqannö kawaq runakunam kushikuyanqa.