2 Crónicas 31 - Bible in Quechua of South Conchucos（qxo）

1Fiesta rurayta ushaskirmi Jerusalénman qorikaq Israel runakuna Judá nacionchö kaq markakunaman aywar runakuna adorayanqan juytu rumikunata chipyaq pakir ushayarqan. Tsaynöllam Asera diösapä jawiyanqan raku qerukunata tseqtaskir markakunachö kaq altarkunata juchutsir ushayarqan. Tsaynömi ushayarqan Judá trïbukuna, Benjamín trïbukuna, Efraín trïbukuna y Manasés trïbukuna täyanqanchöpis. Tsaynö llapanta pakir ushaskirmi markankunapa y wayinkunapa kutikuyarqan.

Levitakunata y sacerdötikunata templuchö aruyänanpä Ezequías churanqan

2Tsaypitanam rey Ezequíasqa sacerdötikunata y levitakunata churarqan habilidänin kanqanman trocanakuypa templuchö aruyänanpä. Paykunapitam wakinta churarqan sacrificiuta rupatsiyänanpä y wakintana churarqan alli päsakuy sacrificiuta rupatsiyänanpä. Tsaynöllam wakinta churarqan Tayta Diosta agradëcikur alabayänanpä y wakintana churarqan templu punkuta cuidayänanpä.

3Tsaynöllam rey Ezequíasqa kikinpa ashmankunapita sacrificiuta rupatsiyänanpä churarqan. Tsay sacrificiukunatam Tayta Diospa leyninkunachö ninqannö rupatsiyarqan cada wäray, cada tardi, cada jamay junaq, cada llullu killa y diyawardakunachöpis.

4Tsaypitanam Jerusalénchö täraq runakunata rey Ezequías nirqan sacerdötikunapa y levitakunapa derëchunta apayämunanpä. Tsaynö nirqan sacerdötikuna y levitakuna Tayta Diospa leyninkunachö ninqannö turnun töcaptin templuchö aruyänanta munarmi.

5Apayämunanpä willakatsiptinmi Israel runakunaqa chakrankunapa punta wayuyninta llapan voluntäninwan apayarqan trïguta, vïnuta, aceitita, abëjapa mishkinta y wakin mikuytapis. Tsaynöllam cosechayanqankunapita diezmutapis atskata apayarqan.Núm. 18.12-13, 21.

6Wäkankunapita, üshankunapita y cabrankunapitam Israel runakuna y Judá runakuna diezmuta apayarqan. Tayta Diospä wakin rakiyanqan diezmukunatapis apayaptinmi muntun muntunta qoriyarqan.

7Kimsa kaq killachö apar qallaykurmi qanchis kaq killachörämi ushayarqan.

8Runakuna apayanqanta rikaykurmi rey Ezequías autoridäninkunawan Tayta Diosta adorayarqan. Tsaynöllam Tayta Dios kuyanqan Israel runakunata kushishqa agradëcikuyarqan.

9Tsaypitam rey Ezequíasqa sacerdötikunata y levitakunata tapurqan imanir mikuy muntunaraykanqanta.

10Tsaymi Sadoc castapita mandaq sacerdöti Azarías nirqan: < churamuptinmi templunman atskata apayämushqa. Apamuyta qallayanqanpitam mikuyänäpä llapanpis sobray sobray kaykällan. Kay muntunaraykaqkunaqa sobraqkunam kaykan>>.

11Tsayta rikaykurmi rey Ezequías Tayta Diospa templun patiuchö mikuy churakuna wayikunata ruratsirqan. Tsay wayikunamanmi

12qoriyanqan primiciakunata, diezmukunata y Tayta Diospä runakuna awniyanqankunata churayarqan. Tsaykunata cuidananpämi Leví trïbu Conaníasta churarqan. Payta yanapananpämi wawqin Simeita churarqan.

13Conaníasta y wawqin Simeita yanapayänanpämi rey Ezequías y mandaq sacerdöti Azarías churayarqan Jehielta, Azazíasta, Nahatta, Asaelta, Jerimotta, Jozabadta, Elielta, Ismaquíasta, Mahatta y Benaíata.

14Leví trïbupita Imnapa tsurin Corétam churayarqan runakuna voluntäninpita Tayta Diospä apayämunqankunata chaskinanpä. Tsay chaskinqankunatam templuchö aruqkunata aypuq. Tsaynöllam Coréqa rupay yarqamunan kaq lädupa punku kichaq karqan.

15Coréta yanapananpämi kayarqan Edén, Miniamín, Jesúa, Semaías, Amarías y Secanías. Paykunam sacerdötikuna täyanqan markakunachö qoriyanqankunata levita mayinkunata aypuyaq. Tsaymi trocanakuypa rukukunatapis jövinkunatapis aypuyaq.

16Tsaynöpam padronashqa kaq levitakuna kimsa watayuqpita janaman kaqkuna chaskiyarqan runakuna apayämunqanta. Tsay aypukuqkunam Tayta Diospa templunchö qoyay qoyay töcanqan kaq aruykunata trocanakuypa aruyarqan.

17Tsaypitanam sacerdötikunatawan levitakunata castanpa castanpa padronayarqan imachö arunqanman y turnun imay töcanqanman. Levitakunatam padronayarqan ishkay chunka (20) watayuqpita janaman kaqkunata.

18Tayta Diosta sirviyänallanpä kayaptinmi cada castata padronayarqan warminkunatapis, pishi wamrakunatapis, ollqu wamrakunatapis y warmi wamrakunatapis. Tsaynöpam sacerdötikunatawan levitakunata y wayinkunachö llapan castankunata padronayarqan.

19Tsaynöllam rey Ezequías cada markachö runakunata churarqan padronashqa kaq Aarón casta sacerdötikunata y levitakunata mikuykunata aypuyänanpä. Tsaymi chakrachö täraq levitakunapis mikuyta chaskiyarqan.

20Entëru Judá nacionchö mikuyta tsaynö aypuyänanpämi runakunata Ezequías churarqan. Ezequías llapan ruranqankunaqa Tayta Dios munanqannömi karqan.

21Tayta Diospa leyninkunata y mandamientunkunata cumplirmi templuchö ima ruraykunatapis llapan shonqunwan ruratsirqan. Tsaynö ruratsiptinmi llapanpis alli karqan.