1¡Allaw, yanapayäshunaykipä Egiptuman rugakuq aywaqkuna!
Qamkunaqa Egipto runakunapa caballunkunaman,
atska carrëtankunaman
y caballun muntashqa soldädunkunamanmi yärakuyanki.
Israel runakunapa santu Diosninmanqa manam yärakuyankitsu.
Tayta Diostaqa manam tapukuyllapis tapukuyankitsu.
2Egipto runakuna yachaq kayanqanman yärakuyaptikipis Tayta Diosmi mas yachaq kaykan.
Payqa runakunata imanöpa castigaytapis yachanmi.
Ninqantaqa imaypis cumplinmi.
Mana alli runakunatam cumpinchinkunatawan castiganqa.
3Egipto runakunaqa manam diostsu kayan, sinöqa runallam.
Caballunkunapis manam poderyuq angeltsu kayan, sinöqa ashmallam.
Tsaymi Tayta Dios castigaptin Egipto runakuna y paykunata minkakuqkunapis awantayanqatsu.
Paykunaqa llapanmi ushakäyanqa.
4 Tayta Diosmi nimarqan: <<Üshata león wanutsiptin llapan mitsikuqkuna qorikaykur qayaräyaptinpis león manam mantsantsu. Noqapis tsay leonnömi kashä. Tsaymi kuyanqä runakunata Sión jirkanchö salvaptï pipis mantsatsimanqatsu.
5Pushapanta pishqu tsapaqnömi noqapis Jerusalénta tsapashä. Imapis mana päsananpämi shumaq cuidashä. Ima peligrupitapis salvashämi>>.
6Israel runakuna, Tayta Diosta alläpanam rabyatsiyarquyki.
Tsaynö kayanqaykipita arrepentikur paypa poderninchöna yapay kawayay.
7Payta rabyatsirmi qoripita qellaypita ïduluykikunata rurayarquyki.
Diospa poderninchö yapay kawarnam tsaykunata jitariyanki.
8Asiria runakunataqa Tayta Dios manam runakunapa espädanwantsu wanutsinqa, sinöqa kikinpa espädanwanmi.
Espädapita jövinkuna qeshpiyaptinpis paykunata tsariskirmi esclävunpä apayanqa.
9Mantsarirmi mandaqnin reypis qeshpinqa.
Capitanninkunapis bandërankunata dëjaskirmi mantsakashqa qeshpir aywakuyanqa.
Tsaynö kananpä kanqantam Tayta Dios nin.
Contrankunata ushakätsinanpämi Sión jirkanchö ninata tsariykätsin.
Jerusalénchömi jornuntapis wayllaykätsin.
Who We AreWhat We EelieveWhat We Do
2025 by iamachristian.org,Inc All rights reserved.
