Habacuc 3 - Bible in Quechua of South Conchucos（qxo）

Tayta Diosta Habacuc yapay mañakunqan

1Profëta Habacuc Tayta Diosta cantapayllapa mañakurmi nirqan:

2 Tayta Dios, Israel mayïkunata unay yanapanqaykitam willayämashqa.

Llapan ruranqaykikunata musyarmi pasaypa kushikü.

Taytay, unay yanapanqaykinölla kananpis yanapaykayällämay.

Tsaynöpam noqakunapis ruranqaykikunata rikayäshä.

Jutsata rurayanqäpita rabyashqa karpis kuyapaykayällämay.

3Temán markapitam Tayta Dios shamun.

Parán jirkanpitam santu Dios shamun. Selah

Entëru ciëluchömi poderösu kanqan rikakan.

Entëru patsachömi payta alabayan.

4Chipipiyninpis empañakuyparämi atsikyämun.

Makinpitapis illaqukuynörämi atsikyay rikakämun.

Poderösu kanqanqa maytsaychöpis musyakanmi.

5Contrankunata castigananpä shamuptinmi mantsariypä pesti qeshya puntanta shamun.

Qepantanam fiebri qeshya shamun.

6Tayta Dios ichiskiptinmi patsapis pasaypa kuyun.

Rikaraptinmi maytsay markakunapis pasaypa mantsakäyan.

Unay jirkakunapis chipyaqmi juchun.

Tsaynöllam jirkankunapitapis teqi aywan.

Peru Tayta Diosmi sïqa mana ushakaq kaykan.

7Cusánchö täraq runakunatam pasaypa desgraciachö kaykaqta rikarqü.

Madiánchö täraq runakunatapis pasaypa mantsakar siksikyaykäyaqtam rikarqü.

8Tayta Dios, ¿mayukunawanku o lamarwanku rabyashqa kaykanki?

¿Tsaytsurä caballuyki muntashqa y guërra carrëtaykiwan llapanta vincir puriykanki?

9Flëchawan flëchanaykipäpis listullanam kaykanki.

Flëchaykitapis jitan jitanllanam kaykanki. Selah

Mayukunawanmi kay patsatapis raqratsarquyki.

10Jirkakunapis rikashurnikim mantsarirnin kuyuyan.

Mangäda tamyapis pasaypam tamyamun.

Lamarpis bunyaypa bunyarmi qayaran.

Yakupis pasaypam pullchaqyan.

11Flëchaykita y lanzaykita jitaptikim pasaypa chipipirrä aywan.

Aywaykaqta rikarmi rupaypis killapis päraskiyan.

12Contraykikunata castiganaykipämi pasaypa rabyashqa kay patsachö maytsaypapis purinki.

Castigarmi nacionkunatapis lanqur ushanki.

13Kuyanqayki runakunata salvanaykipämi yarqamurquyki.

Akranqayki reyta yanapanaykipämi shamurquyki.

Contrayki shäriq reykunatam ushakätsirquyki.

Paykuna mandayanqan nacionkunatam ushakätsirquyki. Selah

14Tsay nacionkunapita shamuq soldädukunam mangäda tamyanö wakpa kaypa qarqayämänanpä shayämurqan.

Mana alli ruraq runa jäkuqchö asaltar kushikunqannömi paykunapis atacayämar kushikuyarqan.

Peru qammi sïqa kikinpa flëchankunawan flëchar ushakätsirquyki.

15Bunyaypa bunyaykaq lamar jananpam caballuyki muntashqa purinki.

16Shamunqaykita wiyarmi pasaypa mantsarirqü.

Wirpäpis pasaypam siksikyashqa.

Tullükunapis chipyaqmi qotukashqa.

Kallpäpis chipyaqmi ushakashqa.

Tsaynö kaptinpis conträkunata ushakätsinaykipä kanqanta musyarmi qamman yärakamü.

17Hïguskuna mana tuktuptinpis,

üvakuna ni olïvuskuna mana wayuptinpis,

chakrachö ima cosëcha mana kaptinpis

y üshakuna y wäkakuna ushakaptinpis

18 Tayta Diosman yärakurmi kushikushä.

Salvamänanpä kanqanta musyarmi payta imaypis alabashä.

19Tayta Diosmi valuratsiman imanö karpis payman yärakunäpä.

Pay yanapamaptinmi imayka lluytsunö cörrï.

Jirkakunapa purirpis mana llutskaypam purï.

(Kay salmuqa cantaqkunapa mandaqninpämi. Cuerdayuq instrumentuta tukar cantayanki.)