Salmo 109 - Bible in Quechua of South Conchucos（qxo）

Salmo 109 (108)Chikiqninkunata juzgananpä Tayta Diosta mañakunqan 1 (1) Cantaqkunapa mandaqninpämi. David qellqanqan salmu.

1 1 (1b) Tayta Dios, qamtam alabä.

Mañakamuptï ama upälla kaytsu.

2Llulla runakuna y mana alli ruraq runakunam conträ parlayan.

Mana parlanqätam tumpayäman.

3Nanaq shiminpam imatapis niyäman.

Imatapis mana nikaptïmi atacayäman.

4Kuyaykaptïmi chikiyäman.

Tsaymi qamta imaypis mañakamü.

5Llakipar yanapaykaptïmi conträ shäriyan.

Kuyaykaptïmi chikiykäyäman.

6Chikimaqnïta juzgananpä mana alli ruraq runata churaykullay.

Kikinpa abogädullan acusatsun.

7Demandakuptinpis kikin jutsayuq kanqanta niyätsun.

Kikinpa shimillan condenatsun.

8Manaräpis höranchö wanutsun.

Pay rurananpä kaqta jukna ruratsun.

9Tsurinkunapis waktsa quëdayätsun.

Warminpis viüda quëdatsun.

10Tsurinkuna limushnata mañakur puriyätsun.

Juchutsishqa wayinkunapita mikuyta ashiyänanpä karuparä aywayätsun.

11Prestaqninkuna imantapis prenda apayätsun.

Ñakarrä arur tarinqantapis jäpa runakuna qechur apayätsun.

12Payta y waktsa quëdaq tsurinkunatapis ama ni pipis kuyapätsuntsu.

13Paypita miraqkunapis llapan ushakäyätsun.

Tsay apellïduqa chipyaq ushakätsun.

14Papänin mana allita ruranqanta Tayta Dios ama perdonatsuntsu.

Maman jutsata ruranqantapis ama perdonatsuntsu.

15Jutsata rurayanqanta Tayta Dios imaypis ama qonqätsuntsu.

Kay patsachöqa jutintapis amana yarpäyätsuntsu.

16Tsay runaqa manam imaypis kuyapäkuyta yachashqatsu.

Pobrikunata, humildikunata y llakikuychö kaqkunatapis wanutsinqanyaqmi qatikachashqa.

17Maldicionakuq kanqanpita kikinman maldición chätsun.

Runa mayinpä bendición kananta mana munanqanpita kikinpäpis bendición ama katsuntsu.

18Imayka ruranqanpis maldicionashqa katsun.

Maldicionqa pachanmanpis yakunö yaykutsun.

Tullunmanpis aceitinö chätsun.

19Maldicionashqa imaypis kawatsun.

Alläpa chachak watashqa wachukunö imaypis ñakatsitsun.

20Conträkunatawan wasä rimaqkunata Tayta Dios tsaynö castigatsun.

21 Tayta Dios, kuyakuq kanqaykita pïmaypis tantiyananpä yanapaykallämay.

Kuyapäkuq kaynikiwan salvaykallämay.

22Noqaqa llakishqa karmi ima ruraytapis puëdïtsu.

Shonqüpis llakikuypitam pasaypa nanaykan.

23Llantuy illakaqnömi kallpäpis ushakan.

Chukllushta vientu apakunqannömi kaykä.

24Mana mikuptïmi qonqurnïpis tsuktsukyaykan.

Custilläkunapis yupanakuykanmi.

25Pïmaypis asipäyämanmi.

Rikaskamarmi umankunata awirrä kushipäyäman.

26 Tayta Diosllä, yanapaykallämay.

Kuyapäkuq kaynikiwan salvaykallämay.

27Pïmaypis tantiyatsun kikiki salvamanqaykita.

28Runakuna maldicionayämaptinpis bendicionnikita noqaman churaykallämuy.

Chikimaqnï runakuna pasaypa penqakuyätsun.

Noqaqa sirviqniki karmi pasaypa kushikushä.

29Chikimaqnïkunataqa pïmaypis penqakatsiyätsun.

Pasaypa penqakuywan cärankunapis pukayätsun.

30 Tayta Dios, qamtam imaypis agradëcikushayki.

Atskaq runakunawan qorikaskirmi alabashayki.

31Qammi pobrikunapa janan kanki.

Chikiqninkunapitapis qammi salvanki.