1 1 (1b) Tayta Dios, qammi imayyaqpis pakakuyänä kanki.
2Jirkakuna manarä kaptinpis y kay patsa manarä kaptinpis unaypita imayyaqpis qamllam Dios kanki.
3Qam permitiptikim runakuna wanuyan.
Qam niptikim wanur allpaman tikrayan.
4Qampäqa waranqa (1,000) watapis juk junaqnöllam kaykan.
Paqaspa juk ishkay höra päsaqnöllam kaykan.
5Illaqpitam runakunata yaku apaqnö apanki.
Runakunaqa juk qemtsiynöllam kaykäyan.
Llullu qewanöllam kaykäyan.
6Waytaykar warämurpis tardipaqa ajusyar tsakiqnömi kaykäyan.
7Rabyarqa rasmi ushakätsiyämanki.
Ajanaptikiqa alläpam mantsayä.
8Llapan jutsa rurayanqätam musyanki.
Pakayllapa mana allita rurayanqätam rikaykanki.
9Pasaypa rabyaptikim chipyaq ushakäyäshä.
Imayka jamaynöllam kawaynïkunapis kaykan.
10Wakinnïqa qanchis chunka (70) watayaqllanam kawayä.
Mas fuerti kaqkunallam puwaq chunka (80) watayaq kawayan.
Tsaynö atska wata kawarpis aruywan ñitipakashqallam kawayä.
Watakuna ras päsanqannömi noqakunapis ushakäyä.
11Imanö rabyanqaykita manam pipis musyantsu.
Pasaypa ajananqaykita manam ni pipis tantiyantsu.
12Yupashqa watalla kawayänäpä kanqanta tantiyaykatsiyällämay.
Tsaynöpam tantiyayäshä munanqaykinö kawayänäpä.
13Tayta Dios, yapay yanapaykayällämay.
¡Imayyaqrä qonqaykayämanki!
Sirviqniki kaykäyaptïqa kuyapaykayällämay.
14Kuyakuynikiwan cada wäray yanapaykayällämay.
Tsaynöpam wanuyanqäyaq imaypis kushishqa alabayäshayki.
15Atska wata yarpachakur kawayänäpämi ñakayman churayämarquyki.
Tsaynölla atska wata kushishqa kawayänäpä yanapaykayällämay.
16Sirviqniki kaykäyaptïqa noqakunata y tsurïkunatapis yanapamar espantaypä kaqkunata ruraykullay.
17 Tayta Diosllä, kuyakuq kanqaykita tantiyaykatsiyällämay.
Llapan aruynïkunamanpis bendicionnikita churaykallämuy.
Who We AreWhat We EelieveWhat We Do
2025 by iamachristian.org,Inc All rights reserved.
