Josué 12 - Bible in Quechua of South Conchucos（qxo）

Moisés wanutsinqan reykuna pï kayanqanpis

1Jordán mayuta manarä päsarmi ishkay reykunata wanutsir nacionninkunata Israel runakuna qechuyarqan. Tsay reykunaqa mandayarqan Arnón mayupita hasta Hermón jirkayaqmi. Tsayqa Arabá pampa tsimpan rupay yarqamunan kaq lädupam karqan.

2Juk wanutsinqan reyqa amorreo runakunapa mandaqnin Sehónmi karqan. Payqa Hesbónchömi täkurqan. Rey Sehónqa mandarqan Arnón mayu ñöpanchö kaykaq Aroerpita hasta Jaboc mayuyaqmi. Jaboc mayu amonita runakunapa lindërun kaptinmi pullan Galaadpis paypa poderninchö karqan.

3Tsaynöllam Sehónpa poderninchö karqan Jordán mayu ñöpan pampakuna Cineret qochapita hasta Arabá Lamaryaq (Arabá Lamarqa Kachi Lamarmi) y Bet-jesimotpita sur kaq lädupa aywar hasta Pisga niyanqan jirka chakinyaq. Tsaykuna karqan Arabá pampa tsimpan rupay yarqamunan kaq läduchömi.

4Jukaq wanutsinqan reynam Basán partipa mandaqnin rey Og karqan. Payllanam refaíta runaqa karqan. Ogqa täkurqan Astarotchö y Edreichömi.

5Ogpa poderninchömi karqan Hermón jirkapita hasta Salcayaq, entëru Basán partipita hasta Gesur lindëruyaq y Maaca lindëruyaq. Pullan Galaadpis Hesbónchö täraq rey Sehónpa lindërunyaqmi paypa poderninchö karqan.Núm. 21.21-35; Deut. 2.26—3.11.

6Tsay ishkay reykunatam Tayta Diospa sirviqnin Moisés Israel runakunawan vinciyarqan. Tsay partikunatam herenciata rakipurqan Rubén trïbuta,Núm. 32.33; Deut. 3.12. Gad trïbuta y pullan Manasés trïbuta.

Josué wanutsinqan reykuna pï kayanqanpis

7Israel runakunawan Jordán mayuta päsaskirmi atska reykunata Josué wanutsirqan. Tsay reykuna mandayanqan partikunam karqan Líbano pampachö kaq Baal-gadpita hasta Seir partiman aywaq Halac jirkayaq. Tsay partikunatam Israel trïbukunata Josué rakipurqan herencian kananpä.

8Tsaymi Israel runakuna chaskiyanqan partikuna karqan jallqakuna kanqan partikuna, Sefela, Arabá pampa, lamar kuchun pampakuna, desiertukuna y Neguevpis. Tsay partikunaqa heteo runakunapa, amorreo runakunapa, cananeo runakunapa, ferezeo runakunapa, heveo runakunapa y jebuseo runakunapam karqan.

9Wanutsinqan reykunam karqan:

Jericó markapa mandaqnin rey,

Bet-elpa ñöpanchö kaykaq Hai markapa mandaqnin rey,

10Jerusalén markapa mandaqnin rey,

Hebrón markapa mandaqnin rey,

11Jarmut markapa mandaqnin rey,

Laquis markapa mandaqnin rey,

12Eglón markapa mandaqnin rey,

Gezer markapa mandaqnin rey,

13Debir markapa mandaqnin rey,

Geder markapa mandaqnin rey,

14Horma markapa mandaqnin rey,

Arad markapa mandaqnin rey,

15Libna markapa mandaqnin rey,

Adulam markapa mandaqnin rey,

16Maceda markapa mandaqnin rey,

Bet-el markapa mandaqnin rey,

17Tapúa markapa mandaqnin rey,

Hefer markapa mandaqnin rey,

18Afec markapa mandaqnin rey,

Sarón markapa mandaqnin rey,

19Madón markapa mandaqnin rey,

Hazor markapa mandaqnin rey,

20Simron-merón markapa mandaqnin rey,

Acsaf markapa mandaqnin rey,

21Taanac markapa mandaqnin rey,

Meguido markapa mandaqnin rey,

22Cedes markapa mandaqnin rey,

Carmeluchö kaykaq Jocneam markapa mandaqnin rey,

23Dor provinciachö kaykaq Dor markapa mandaqnin rey,

Gilgalchö kaykaq Goim markapa mandaqnin rey

24y Tirsa markapa mandaqnin rey.

Tsay llapan wanunqan reykuna kimsa chunka jukmi (31) kayarqan.