Isaías 53 - Bible in Quechua of South Conchucos（qxo）

1Willakuyanqäta ¿pirä criyishqa?

Tayta Dios imanö salvamanqantsikta musyatsiptinpis ¿pirä tantiyashqa?

2Tayta Diospa sirviqnin paypa puntanchömi jatunyarqan.

Tsaki patsachö matsükur tseqllimuq jachanömi wiñarqan.

Payqa manam kuyayllapätsu ni rikay munaytsu karqan.

3Runakuna payta manakaqman churarmi chaskiyarqantsu.

Pasaypa nanaywanmi ñakarqan.

Manam pipis rikayta munarqantsu.

Payta chikirmi pipis cäsurqantsu.

4Paymi qeshyantsikkunata apashqa.

Paymi nanaynintsikkunatapis jipishqa.

Jutsata ruranqanpita Tayta Dios castiganqantam yarparqantsik.

5Tsaynö yarpashqapis noqantsik mana cäsukuq kanqantsikpitam tuksishqa karqan.

Jutsata ruranqantsikpitam wanutsishqa karqan.

Tayta Dioswan alli kawayta tarinantsikpämi castigashqa karqan.

Yawarninta jicharmi allïtsimarquntsik.

6Llapantsikmi oqrakashqa üshanö kaykantsik.

Tayta Diospita witikushqa karmi munanqantsiknö kawaykantsik.

Tsaynö kaykashqapis llapan jutsantsiktam Tayta Dios payman churashqa.

7Pasaypa maqayaptinpis manam imatapis parlakurqantsu.

Üshata pishtayänanpä apaqnömi payta apayarqan.

Millwanta rutuyaptin üsha wiyaräkunqannömi upällalla wiyaräkurqan.

Tsaynö upälla kakurmi ni juk shimillapis parlakurqantsu.

8Imayka jutsayuqtanömi juzgayänanpä prësu apayarqan.

Payta wanutsiyaptin tsurinpis manam karqantsu.

Kuyanqä runakunapa jutsankunapitam pasaypa ñakarqan.

9Payqa manam ima jutsatapis rurarqantsu ni pitapis llullaparqantsu.

Tsaynö kaptinpis jutsasapakuna y rïcukuna pampakuyänanmanmi pampayarqan.

10Tsaynö ñakanantam Tayta Dios munarqan.

Consagratsina sacrificiunö wanuptinmi miraqninkuna atskaq kayanqa.

Tsaypitam atska wata kawanqa.

Pay raykurmi Tayta Dios munanqannö llapanpis kanqa.

11Ñakanqan allipä kanqanta rikarmi kushikunqa.

Tayta Diosmi nin:

<

Wanurmi atskaqta perdonanqa.

Jutsa rurayanqankunata paymi apanqa.

12Kikin salvakunanpa rantinmi jutsayuq runanölla wanurqan.

Runakuna raykur wanurmi paykunata perdonanäpä mañakamarqan.

Tsaymi payta churashä mas respitashqa kananpä.

Guërrachö vinciqkuna imaykatapis chaskiyanqannömi paypis premiuta chaskinqa>>.