Eclesiastés 7 - Bible in Quechua of South Conchucos（qxo）

Alli kawanantsikpä yätsinqankuna

1Alli runa kanqantsikta pïmaypis parlanqanqa chanin perfümipitapis mas allim kaykan.

Wanunqantsik junaqmi yurinqantsik junaqpitapis mas alli.

2Ushakaqlla kaykarqa kawanqantsikyaq yarpäshun wanukuqlla kanqantsikta.

Fiestaman aywanantsikpa rantinmi mas alli kaykan runa wanuptin vëlakuq aywanqantsik.

3Asikunqantsikpitaqa mas allim waqanqantsik.

Llakikurqa cärantsik jukläyaptinpis shonquntsikchömi alli kawanantsikpä yarpachakuntsik.

4Yachaq runaqa wanuqllapä kanqantam tantiyan.

Peru mana yachaq runam sïqa imatapis mana yarpachakuypa fiestan fiestan purikun.

5Mana yachaq runa alabamanqantsikpitaqa mas allim kaykan yachaq runa yätsimanqantsik.

6Mana yachaq runaqa shiraka lunyar pashtaqnömi llutalla imapitapis asikun.

Tsaynö kanqanpis manakaqllapämi.

7Yachaq kanqantsikta yarparpis runa mayintsikta ñakatsirqa mana yachaqmi kaykantsik.

Pipis qarayta chaskipakurqa llutan ruraymanmi chan.

8Aruyta qallar kushikunqantsikpitapis ushaskirqa masrämi kushikuntsik.

Imapitapis ras rabyakunaykipa rantinqa mas allim pacienciakunqayki.

9Imapitapis rasqa ama rabyakunkitsu.

Mana yachaq runakunallam tsaynö rabyakuyan.

10Ama ninkitsu: <<¿Imanirrä unayqa imapis mas alli karqan?>>

Tsaynö nirqa mana yachaq runanömi parlaykanki.

11Kay patsachöqa yachaq kanqayki allim.

Peru yachaq kanqayki y rïcu kanqaykim sïqa mas alli kaykan.

12Yachaq kaypis y rïcu kaypis ima peligrupitam tsapäshunki.

Tsaymi yachaq runaqa rïcu runapitapis mas alli kawayta tarin.

13Tayta Dios wiksutsinqantaqa manam pipis derechayta puëdintsu.

Tsaynö kaykaptinqa Tayta Dios permitinqanta shumaq tantiyakunki.

14Tranquïlu kawanaykipä destinashqa kaykaptinqa kushishqa kawanki.

Ñakaychö kanaykipä destinashqa kaykaptinqa tantiyakunki kushikuypis llakikuypis Tayta Diospita kanqanta.

Waray warantin imanö kanaykipä kanqantapis manam musyankitsu.

15Kay vïdächömi rikarqü alli runa kaykarpis manarä höranchö wanunqanta.

Tsaynöllam rikarqü mana alli runa kaykarpis atska wata kawanqanta.

16Ama jutsaynaq tukunkitsu ni yachaq tukunkitsu.

Tsaynö karqa kikillaykim mana alliman chanki.

17Tsaynölla jutsata ama rurankitsu ni upaqa ama kankitsu.

Tsaynö karqa kikillaykim wanuyta ashiykanki.

18Tsay ninqäkunata cäsukuy.

Tsaynöpam jutsaynaq tukunkitsu ni jutsata rurankitsu.

Tayta Diosta mantsapakur tsaynö kawaptikiqa llapan ruranqaykipis allim kanqa.

19Yachaq karqa ima peligrupitapis qeshpintsikmi.

Tsaymi markata mandaq chunka runakunapitapis yachaq runa mas alli kaykan.

20Kay patsachöqa manam pipis kantsu allillata ruraq y jutsata imaypis mana ruraqqa.

21Runakuna llapan niyanqanta ama cäsunkitsu.

Mana cäsurqa sirviqniki wasayki rimanqantapis manam musyankitsu.

22Qampis atska kutim jukpa wasanta rimarquyki.

Tsayta manam ñëgankimantsu.

Yachaq kananpä yarpachakunqan

23Kay patsachö imanir llapan päsanqankunata tantiyanäpämi yarpachakurqü. Imanö yarpachakurpis manam tantiyayta puëdirqütsu.

24Tantiyanapäqa pasaypa ajam. Tsaytaqa manam pipis tantiyayta puëdintsu.

25Tsaynö kaptinmi yachaq kanäpä y llapan päsanqankunata tantiyanäpä masrä yarpachakurqü. Tsaynöpam tantiyarqü mana alli kay y mana yachaq kay mana alli kanqanta.

26Tsaynöllam tantiyakurqü mañösa warmi wanuypitapis mas mantsaypä kanqanta. Tsay warmipa shonqunqa trampanömi y rikrankunapis waskanömi kaykan. Tayta Dios munanqannö kawaq runaqa tsay niraq warmipita witikunmi. Peru jutsa ruraq runam sïqa tsay warmiwan kakun.

27Yachatsikuq karmi shumaq yarpachakunqäta kanan nishayki:

28Kay patsachö imanir llapan päsanqankunata tantiyanäpä mayjina yarpachakurpis manam shumaq tantiyayta puëdïtsu. Imanö kaptinpis tantiyarqü Tayta Dios munanqannö kawaq runakuna wallkalla kayanqantam. Waranqa (1,000) runakunapita jukllayllatam tarirqü Tayta Dios munanqannö kawaqta. Waranqa warmikunapitaqa manam ni jukllayllatapis tarirqütsu Tayta Dios munanqannö kawaqta.

29Tsaynöllam tantiyakurqü jutsaynaq kawanantsikpä Tayta Dios kamamanqantsikta. Tsaynö kawanantsikpä kamashqa kaykarmi llutan rurayman churakarquntsik.