Salmo 86 - Bible in Quechua of South Conchucos（qxo）

Salmo 86 (85)Kuyapänanpä Tayta Diosta mañakunqan 1a (1a) Kay salmuqa Tayta Diosta David mañakunqanmi.

1 1 (1b) Tayta Dios, rugakamunqäta wiyaykallämay.

Noqaqa pasaypa llakikurmi ima ruraytapis puëdïtsu.

2Qam munanqaykinö kawarmi wanuypita salvamänaykipä mañakamü.

Sirviqniki karmi imaykapitapis tsapämänaykipä rugakamü.

Diosnï kaptikim qamman yärakamü.

3Tayta Dios, kuyapaykallämay.

Imay hörapis qamtam mañakamü.

4Sirviqniki karmi valuratsimänaykipä mañakamü.

Qamllamanmi imay hörapis yärakamü.

5Qamqa allillata ruraqmi y perdonakuqmi kanki.

Qamman yärakamuqkunatam kuyapanki.

6 Tayta Dios, mañakamunqäta wiyaykallämay.

Rugakamunqäta chaskiykallämay.

7Imaypis wiyamanqaykita musyarmi llakikunqä höra mañakamü.

8Tayta Dios, manam qamnöqa ima diospis kantsu.

Qam ruranqaykitanöqa manam ni pipis rurantsu.

9Qammi llapan nacionkunata kamarqayki.

Llapan nación runakunam adorayäshunaykipä shayämunqa.

Ñöpaykiman qonqurikamurmi jutikichö adorayäshunki.

10Qam japallaykim Dios kanki.

Poderösu karmi espantaypä milagrukunatapis ruranki.

11 Tayta Dios, alli kawanäpä nänikita reqiykatsimay.

Tsay nänipam imaypis purishä.

Llapan shonqüwan qamta mantsapakunäpä yanapaykamay.

12 Tayta Dios, llapan shonqüwanmi alabashayki.

Qamtam imaypis adorashayki.

13Noqataqa pasaypam kuyamanki.

Wanuypitapis salvamarquykim.

14Tayta Dios, yaqa runakunam conträ shärir wanutsimayta munayan.

Tsay runakunaqa manam imapäpis cuentayäshunkitsu.

15Tayta Dios, qamqa alli shonqu y kuyapäkuqmi kanki.

Rasqa manam rabyakunkitsu.

Kuyapäkuq y rasun kaqllata parlaqmi kanki.

16Mañakamunqäta wiyamar kuyapaykallämay.

Sirviqniki kaykaptïqa kallpata qaraykallämay.

Sirvishuqniki warmipa wamran kaykaptïqa salvaykallämay.

17Conträkuna penqakuyänanpä paykuna rikananchö yanapaykallämay.

Tayta Dios, qamllam yanapamanki y kushikatsimanki.