1Moisésta Tayta Dios ninqannöllam Tinkuna Sagrädu Tolduman sacerdöti yaykunanpä röpata rurayarqan azul, granäti y puka millwa jïlukunapita. Tsaynöllam Aarónpä sagrädu röpatapis rurayarqan.
Efodta ruranqan Éxodo 28.6-142 Efodtam rurayarqan qori jïlupita, azul, granäti y puka millwa jïlukunapita y llanulla putskashqa lïnu jïlupitapis.
3Qoripita jïluta rurayänanpämi qorita takaypa llapshatsaskir llanullata rutuyarqan. Tsay jïlupita, azul, granäti y puka millwa jïlukunapita y llanulla putskashqa lïnu jïlupitam efodta shumaq awayarqan.
4Efodpa ishkan kuchunchömi tirantikunata rurayarqan umrunchö warkaränanpä.
5Efodwan wachukupis tsay piëzallam karqan. Tsaytam rurayarqan qori jïlupita, azul, granäti y puka millwa jïlukunapita y llanulla putskashqa lïnu jïlupita. Llapanta rurayarqan Moisésta Tayta Dios ninqannöllam.
6Tsaynöllam ónice rumikunata alistaskir tsaraqninkunata qoripita ruraykur sigurayarqan. Tsaypitanam rumipita sëlluta ruraqnö tsay rumikunaman Israelpa tsurinkunapa jutinkunata qellqayarqan.
7Tsay rumikunatam efodpa tirantinkunaman churayarqan Israel trïbukunapa jutinkunata imaypis yarparänanpä. Moisésta Tayta Dios ninqannöllam llapan tsaykunata rurayarqan.
Pectoralta rurayanqan Éxodo 28.15-308Tsaynöllam kuyayllapä awashqa pectoraltapis rurayarqan. Efodta rurayanqannöllam qori jïlupita, azul, granäti y puka millwa jïlukunapita y llanulla putskashqa lïnu jïlupitapis rurayarqan.
9Pectoralta ruraskirmi doblayarqan bolsanö cuadrädu kananpä. Largunpis anchunpis ishkay chunka ishkay (22) centïmetrum karqan.
10Pectoral jananmannam churayarqan chusku fïla kuyayllapä rumikunata. Punta kaq fïlamanmi churayarqan sárdica rumita, topacio rumita y carbunclo rumita.
11Ishkay kaq fïlamanmi churayarqan esmeralda rumita, zafiro rumita y diamanti rumita.
12Kimsa kaq fïlamanmi churayarqan jacinto rumita, ágata rumita y amatista rumita.
13Chusku kaq fïlamannam churayarqan berilo rumita, ónice rumita y jaspe rumitapis. Tsay rumikuna mana shushunanpämi qoriwan tsaraqninkunata ruraskir sigurayarqan.
14Fïlakunaman churayanqan rumikunam chunka ishkay karqan. Israelpa tsurinkuna chunka ishkay kayaptinmi tsaynö chunka ishkay karqan. Cada rumimanmi juk tsurinpa jutinta qellqayarqan rumipita rurashqa sëllunö kananpä.
15Tsaynöllam pectoralpä cordonkunata qori jïlupita pilltayarqan.
16Tsaynöllam rumikunata sigurayänanpä ishkay tsaraqninkunata y ishkay taksha argöllankunata qoripita rurayarqan. Tsay argöllakunatam pectoralpa jana kaq ishkan kuchunman churayarqan.
17Tsay argöllakunamanmi qoripita pilltashqa cordonta ullutsiyarqan.
18Cordonpa ishkan puntankunatanam sigurayarqan umrunchö kaq tsaraqninkunaman. Tsayqa pëchunchömi watararqan.
19Tsaynöllam ishkay taksha argöllakunata qoripita ruraskir pectoralpa ura kaq kuchunkunaman churayarqan. Tsay argöllakunaqa pectoral rurinchö karmi efod jananchö karqan.
20Tsaynöllam ishkay taksha argöllakunata qoripita ruraykur efodpa wachukun jana lädunman churayarqan. Tsaykunam efodpa tirantinkunachö kar pectoralpa costüranman tinkurqan.
21Pectoralpa y efodpa argöllankunatam azul cordonwan watayarqan efodpita mana yarqunanpä. Moisésta Tayta Dios ninqannöllam llapanta rurayarqan.
Sacerdötipa wakin röpankunata rurayanqan Éxodo 28.31-4322Tsaynöllam efodpa rurinman jatikunanpä azul jïlupita sotänata rurayarqan.
23Uman yaykunanpä kunkayuqta ruraskirmi sotänapa kunkan mana rachinanpä rebëtita jirayarqan. Tsay rebëtiqa qara casäcapa kuchun jirashqanömi karqan.
24Sotänapa ura kuchunpam llanulla putskashqa lïnu jïluwan y azul, granäti y puka millwa jïlukunawan granadïllatanö bordayarqan.
25Tsaynöllam tsay kuchunpa qoripita rurashqa campanillakunata churayarqan. Tsaynöpam sotäna kuchunman granadïllakunatawan qori campanillakunata tumaypa churayarqan.
26Tsay sotänachöqa entëru kuchunpam tumaypa karqan juk granadïlla, juk qori campanilla, juk granadïlla, juk qori campanilla. Moisésta Tayta Dios ninqannöllam Tinkuna Tolduman yaykur jatikunanpä tsay sotänata rurayarqan.
27Aarónpä y tsurinkunapämi tünicakunatapis llanulla putskashqa lïnu jïlupita awayarqan.
28Tsaynöllam llanulla putskashqa lïnu jïlupita rurayarqan görrata, görrapa adornunkunata y calzoncïllukunata.
29Wachukutapis awayarqan llanulla putskashqa lïnu jïlupita y azul, granäti y puka millwa jïlukunapitam. Awaskirnam wachukuman kuyayllapäta bordayarqan. Moisésta Tayta Dios ninqannöllam llapanta rurayarqan.
30Tsaynöllam qoripita sagrädu vinchata ruraykur rumipita rurashqa sëllunö kananpä tsayman qellqayarqan: <
31Moisésta Tayta Dios ninqannöllam tsay vincha azul cordonwan görraman watayarqan.
Sagrädu Tolduta rurar ushayanqan Éxodo 35.10-1932Tsaynömi Tinkuna Sagrädu Toldu rurayta ushayarqan. Moisésta Tayta Dios ninqannöllam Israel runakunaqa llapantapis rurayarqan.
33Tsaymi Sagrädu Tolduta y llapan manëjunkunata Moisésman apayarqan. Tsaymi apayarqan Sagrädu Toldupä rurayanqan ganchukunata, marcukunata, traviskunata, jorcunkunata, jawiräkunanta,
34Tinkuna Tolduta qatananpä pukaman tiñishqa üsha qaratsata, fïnu qarakunata, babulta tsaparaq cortïnata,
35Pactu Babulta, babulta puritsikuyänan qerukunata, babulpa tsapananta,
36mësata, mësapa manëjunkunata, Tayta Diospa puntanchö churaränanpä kaq tantata,
37qoripita rurayanqan candelëruta, candelërupa puntankunaman churayänanpä kaq mechërukunata, candelërupa manëjunkunata, aktsi tsarinanpä aceitita,
38qoripita rurashqa altarta, sagrädu aceitita, mushkuq inciensiuta, Tinkuna Toldupa punkunta tsaparaq cortïnata,
39broncipita rurashqa altarta, broncipita rurashqa rejïllata, altarta puritsikuyänan qerukunata, altarpa manëjunkunata, lavatoriuta jamakunantinta,
40patiupa cortïnankunata, patiupa jorcunninkunata, jorcunkunapa jawiräkunanta, patiupa punkunta tsaparaq cortïnata, patiupa estäcankunata waskantinta y Tinkuna Sagrädu Toldupa llapan manëjunkunatapis.
41Tsaynöllam apayarqan Tinkuna Sagrädu Tolduchö sacerdöti jatikunanpä kaq röpata. Tsay röpakunaqa karqan sacerdöti Aarónpa sagrädu röpankunawan tsurinkuna jatikuyänanpä röpakunam.
42Moisésta Tayta Dios ninqannöllam Israel runakunaqa llapantapis rurayarqan.
43Tayta Dios ninqannö llapantapis rurayanqanta rikarmi Moisés paykunata bendisarqan.
Who We AreWhat We EelieveWhat We Do
2025 by iamachristian.org,Inc All rights reserved.
