1Maytsay nacionchö täraqkuna, wiyayämänaykipä shayämuy.
Maytsay markachö täraqkunapis, qorikäyämuy.
Kay patsa y kay patsachö kaqkunapis, llapaykikuna wiyayämay.
2Llapan nacionkunapäpis Tayta Dios rabyashqam kaykan.
Nacionkunapa soldädunkunapäpis rabyashqam kaykan.
Paymi llapan nacionkunata chipyaq ushakätsinqa.
3Wanuqkunapa ayankuna ismurmi pasaypa asyar jitaräyanqa.
Jirkakunapis yakunörämi yawar aywanqa.
4Ciëluchö kaqkunapis tsullurmi ushakäyanqa.
Röllu lluyllukaqnömi ciëlupis lluyllukanqa.
Qoyllurkunapis tsakishqa rapranömi shushuyämunqa.
Üvapa y hïguspa tsakishqa raprannömi shushuyämunqa.
5Tayta Diospa espädan ciëlupita shamurmi Edom nación runakunata ushakätsinqa.
Paykunata castigar ushakätsinanpämi Tayta Dios destinashqa.
6Runakunata ushakätsirmi Tayta Diospa espädan yawarllana y wirallana kanqa.
Bosra markachö runakunata wanutsirmi Tayta Diospä sacrificiuta pishtaqnö kanqa.
Tayta Diospa espädanqa üshakunapa y chïvukunapa yawarninwanmi pasaypa pichushqa kanqa.
Carnërukunapa rurunninpa wiranwanmi pichushqa kanqa.
7Tsaychömi törunörä kallpasapa runakunapis ushakäyanqa.
Torïtunö kallpasapa jövinkunapis chipyaqmi wanuyanqa.
Maytsaychömi yawar mashtaranqa.
Allpapis wirawan pichukashqam kanqa.
8Tsay witsanmi Sión runakunapa chikiqninkunata Tayta Dios ushakätsinqa.
9Ushakätsiptinmi chikiqninkuna täyanqan nacionchö raqrakunaman yaku aywananpa rantin breana aywanqa.
Allpapis azufrimanmi tikranqa.
Chakrakunapis breanörämi rupanqa.
10Paqaspa junaqpapis mana upiypa rupaptinmi qoshnilla shäriykanqa.
Tsaynö ushakätsiptinmi imayyaqpis tsunyaqllana kanqa.
Tsaypaqa mananam pipis purinqanatsu.
11Tsaychöqa pelïcanuwan erïzullam kayanqa.
Tukuwan killikshallanam qeshunkunata tsaychö rurayanqa.
Tayta Dios chipyaq ushakätsiptinmi imapis tsay nacionchö kanqanatsu.
12Manam reypis ni autoridäkunapis mandayänanpä kayanqanatsu.
13Palaciukunachöpis shirakallanam kanqa.
Murallashqa markakunachöpis ishankawan cardón kashakunallanam juntanqa.
Chacalkuna täkuyänan y avestruzpa pushapankuna punukuyänallannam kanqa.
14Jirka ashmakunawan hienakunam tsaychö kayanqa.
Tsaychömi chucaru cabrakunapis waqapänakuyanqa.
Chusiqkunallanam pipis mana mantsatsishqa tsaychö kayanqa.
15Tukukunapis tsaychömi oqllayanqa.
Pashtatsiyanqan pushapankunatapis tsaychömi oqllaräyanqa.
Wiskurkunapis chinan orqum tsaychö qorikäyanqa.
16Tsayta musyayänaykipä Tayta Dios qellqatsinqan rölluta liyiyay.
Tsaychö qellqashqa kanqannöllam llapanpis chinan orqu kayanqa.
Tayta Dios ninqannöllam tsay ashmakuna tsaychö kayanqa.
Tsaychö kayänanpämi Espïritun qonqa.
17Kikinmi tsaychö täyänanpä tsay ashmakunata churanqa.
Tsaymi imaypis tsaychö kayanqa.
Who We AreWhat We EelieveWhat We Do
2025 by iamachristian.org,Inc All rights reserved.
