1Kaychömi qellqashqa kaykan Moab nación imanö kananpä Tayta Dios revelanqan.
Moab nacionchö kaykaq Ar markataqa juk paqasllachömi ushakätsiyanqa.
Moab nacionchö kaykaq Kir markatapis juk paqasllachömi ushakätsiyanqa.
2Tsaynö kaptinmi Dibón markachö täraq runakuna pasaypa llakikuyanqa.
Templunman y altarkunamanmi pasaypa llakikur waqayänanpä aywayanqa.
Nebo y Medeba markakunatam ushakätsiyanqa.
Chipyaq ushakaskatsiyaptinmi moabita runakuna pasaypa llakikur waqayanqa.
Tsaynö llakikurmi aqtsankunata y shaprankunatapis rutukuyanqa.
3Lütu röpan jatishqam cällikunapapis puriyanqa.
Wayin janankunachö y pläzankunachöpis llapanmi llakikur waqayanqa.
4Hesbónchö y Elealichö täraqkuna ausiliuta mañakurmi qayaräyanqa.
Qayaräyanqanqa Jahaza markayaqmi wiyakanqa.
Atacayaptinmi moabita soldädukunapis mantsariyanqa.
Mas valienti soldädukunapis pasaypa mantsarirmi tsuktsukyäyanqa.
5Moabita runakuna tsaynö ñakayänanpä kaptinmi shonqü pasaypa llakinan.
Paykunam Zoaryaq y Eglat-selesiyáyaq qeshpir aywayanqa.
Luhitman witsänan cuestapam waqaraykar witsäyanqa.
Horonaimman aywaq nänipa aywarmi pasaypa waqayanqa.
6Nimrimchö yaku pözukuna y qewakunam tsakinqa.
Llapan tseqllimuq jachakunapis chipyaqmi ushakanqa.
Manam ima qorapis verdiranqanatsu.
7Tsaymi imayka qoriyanqantapis Sauci Raqraman apayanqa.
8Tsaychö waqayanqanmi entëru Moab nacionchö wiyakanqa.
Eglaimyaq y Beer-Elimyaqmi wiyakanqa.
9Atskaq wanuyaptinmi Dimónchö yakukunamanpis yawar tallukanqa.
Leonkunatapis Dimónmanmi Tayta Dios mandamunqa.
Tsay leonkunam Moabpita qeshpiqkunata mikur ushayanqa.
Who We AreWhat We EelieveWhat We Do
2025 by iamachristian.org,Inc All rights reserved.
