Salmo 78 - Bible in Quechua of South Conchucos（qxo）

Salmo 78 (77)Kuyanqan runakunata Tayta Dios alli rikanqan 1a (1a) Asaf qellqanqan salmum.

1 1 (1b) Marka mayikuna, yachatsinqäta shumaq wiyayämay.

Parlapanqäta shumaq cäsukuyay.

2Imamanpis iwalatsiypam yachatsishayki.

Unay ima päsanqankunata musyayänaykipämi willashayki.

3Awiluntsikkuna willamanqantsikpitam tsaykunata musyantsik.

4Tsaykunataqa wamrantsikkunata willashun.

Tayta Dios poderösu kanqanta musyatsishun.

Poderösu kayninwan espantaypä ruranqankunata willashun.

5Jacobpita miraqkunatam leyninkunata Tayta Dios entregarqan.

Tsay leykunachömi Israel runakuna imanö kawayänanpä kanqantapis tantiyatsirqan.

Paykunatam ordenarqan wamrankunata yachatsiyänanpä.

6Tsaynöpam qepa yuriqkunapis musyayanqa.

Tsay qepa yuriqkunapis wamrankunatam yachatsiyanqa.

7Tsaynö yachatsishqam wamrantsikkunapis Tayta Diosman yärakuyanqa.

Tayta Dios yanapanqanta manam qonqayanqatsu.

Paypa mandamientunkunata llapantam cumpliyanqa.

8Unay kaq castantsikkunanöqa mana cäsukuq y mana wiyakuq manam kayanqatsu.

Unay castantsikkunaqa mana wiyakuq chukru shonqum kayarqan.

Paykunaqa kullu rinrim kayarqan.

Tsaynö karmi Tayta Dioswan pactu rurayanqantapis cumpliyarqantsu.

9Efraín trïbu runakunaqa flëchayta yachaq soldädukunam kayarqan.

Tsaynö karpis guërrapita qeshpirmi aywakuyarqan.

10Tayta Dioswan pactu rurayanqantapis manam cumpliyarqantsu.

Yachatsinqantapis manam cäsuyarqantsu.

11Tayta Dios yanapanqantapis qonqaskiyarqanmi.

Espantaypä milagrukuna ruranqantapis chipyaqmi qonqaskiyarqan.

12Unay castantsikkuna rikaykäyaptinmi espantaypä kaqkunata Tayta Dios rurarqan.

Tsaynö rurarqan Egiptuchö kaykaq Zoán partichömi.

13Lamarta ishkayman rakiskirmi chawpinpa paykunata päsatsirqan.

Päsayänanpämi lamarta ishkayman rakir murällatanö ichïtsirqan.

14Junaqpam pukutaywan pusharqan.

Paqaspanam lunyaykaq ninawan pusharqan.

15Desiertuchömi qaqatapis partikätsirqan.

Upuyänanpämi atska yakuta pashtatsimurqan.

16Qaqapita pashtatsimuptinmi mayunörä yaku aywarqan.

17Tsaynö yanapaykaptinpis paykunaqa Tayta Diospa contranmi shäriyarqan.

Desiertuchömi poderösu Tayta Diosta rabyatsiyarqan.

18Munayanqallanta mikuyta munarmi Tayta Diosta shonqunkunachö tentayarqan.

19Tayta Diospa contran parlarmi niyarqan:

<

20Musyantsikmi Tayta Dios qaqata partikätsiptin mayunörä yaku yarqamunqanta.

Tsaynö rurashqa karpis ¿maypitatä mikuyta alistamunqa?

Aytsatapis ¿maypitatä alistamunqa?>>

21Tsaynö parlayanqanta wiyarmi Tayta Dios rabyarqan.

Jacobpita miraq runakunapämi pasaypa rabyarqan.

22Paykunaqa Tayta Diosman manam yärakuyarqantsu.

Yanapananpä kanqantapis manam criyiyarqantsu.

23Tsaynö kayaptinpis Tayta Diosmi paykunaman pukutayta mandamurqan.

Kikinmi ciëlu punkutapis kicharqan.

24Kuyanqan runakunapämi tamyatanö manáta shushutsimurqan.

Tsayqa ciëlupita shushumuq mikuymi karqan.

25 Angelkuna mikuyanqan tantatam mikuyarqan.

Pacha junta mikuyänanpämi mikuyta Tayta Dios alistaparqan.

26Tsaynöllam rupay yarqamunan lädupita y sur lädupita vientuta vientütsimurqan.

27Tsay vientuwanmi codornizkunata chätsirqan.

Lamar kuchunchö arënanörämi tsaytsika aytsa karqan.

28Tsay codornizkunatam Tayta Dios chätsirqan runakuna taykäyanqan campamentuman.

Toldunkuna ñöpanmanmi ishniqtarä chätsirqan.

29Tsaymi pasaypa melanäyanqanyaq mikuyarqan.

Tsaynöpam Tayta Diosqa mañakuyanqanta alistaparqan.

30Peru wakin kaqtam pachan manarä juntaptin y aytsan amushqa kaykäyaptin

31Tayta Dios rabyar ushakätsirqan.

Mas kallpasapa kaq runakunatam wanutsirqan.

Israel runakunachö mas kallpasapa kaq runakunatam ushakätsirqan.

32Tsayta rikaykarpis jutsata rurallarmi kayarqan.

Milagrukunata ruranqanta rikaykarpis manam Tayta Diosman yärakuyarqantsu.

33Tsaymi Tayta Dios paykunata jamaytanölla desgraciawan ushakätsirqan.

34Wakinta wanutsinqanta rikarrämi Tayta Diosman yärakuyarqan.

Tsaynöpam llapan shonqunkunawan perdonta mañakuyarqan.

35Tsayrämi Tayta Dios qaqanö tsapaqnin kanqanta yarpäyarqan.

Tsaynöllam poderösu Tayta Dios salvaqnin kanqanta yarpäyarqan.

36Peru tsaynö yarpaykarpis paykunaqa Tayta Diostam llullapäyarqan.

37Tayta Diosta cäsuyänanpä awnirkurpis manam cäsuyarqantsu.

Tayta Dioswan pactu rurayanqantapis manam cumpliyarqantsu.

38Peru tsaynö kayaptinpis Tayta Diosmi paykunata kuyaparqan.

Jutsa rurayanqanta perdonarmi ushakätsirqantsu.

Atska kuti pasaypa rabyarpis manam castigarqantsu.

Rabyarpis pacienciakurqanmi.

39Runalla kayanqanta musyarmi kuyaparqan.

Vientunö päsaqlla kayaptinmi kuyaparqan.

40Paykunaqa atska kutim Tayta Diospa contran shäriyarqan.

Atska kutim desiertuchö rabyatsiyarqan.

41Kutin kutinmi Tayta Diosta tentayarqan munayanqanta rurananpä.

Tsaynöpam santu Diosninta pasaypa rabyatsiyarqan.

42Tayta Dios poderyuq kanqantam qonqaskiyarqan.

Chikiqninkunapa poderninpita salvanqantapis manam yarpäyarqannatsu.

43Egiptuchö kaykaq Zoán partichö espantaypä milagrukunata ruranqantapis manam yarpäyarqannatsu.

44Tsaychömi mayukunatapis yawarman tikratsirqan.

Tsaymi Egiptuchö täraq runakuna upuyta melanäyarqan.

45Upukrukunatapis

47Runtu tamyawanmi üvakunatapis ushakätsirqan.

Qajapawanmi hïguskunatapis chipyaq ushakätsirqan.

48Runtu tamyawan y maqakuywanmi wäkakunata y üshakunatapis wanutsirqan.

49Tayta Dios rabyarmi Egipto runakunata tsaynö castigarqan.

Wanutsikuq angelkunatam paykunaman mandamurqan.

50Mana kuyapaypam paykunata ushakätsirqan.

Mana perdonarmi wanutsirqan.

51Egiptuchömi llapanpa mayor ollqu tsurinkunata ushakätsirqan.

52Tsaypitanam kuyanqan Israel runakunata üshata mitsiq runanö Egiptupita jipimurqan.

Desiertupam paykunata pusharqan.

53Mana mantsariyänanpämi shumaq pusharqan.

Peru chikiqninkunatam sïqa lamarchö ushakätsirqan.

54Tsaypitam kuyanqan runakunata awninqan nacionman pushamurqan.

Paykunata entregananpämi tsaychö täraq runakunata kikin vincirqan.

55Kuyanqan runakunapa puntanpitam tsay runakunata qarqurqan.

Paykunapa chakrankunata y markankunatam Israel runakunatana aypurqan.

56Peru tsaynö yanapaykaptinpis poderösu Tayta Diosta tentarmi pasaypa rabyatsiyarqan.

Tayta Dios ninqantapis manam cäsuyarqantsu.

57Unay castankunanömi paykunapis Diosta awniyanqanta cumpliyarqantsu.

Flëcha wiksunqannömi paykunapis kayarqan.

58Markakunachö altarkunata rurarmi Tayta Diosta rabyatsiyarqan.

Ïdulukunata adorarmi ajanätsiyarqan.

59Tsayta rikarmi Tayta Dios pasaypa rabyarqan.

Israel runakunata jaqiskir manam yanaparqannatsu.

60Kay patsachö täkunan tolduntapis jaqirqanmi.

Silo markachö kaykaq toldunchö mananam tarqannatsu.

61Contran runakuna apakuyänanpämi Pactu Babultapis jaqiskirqan.

62Kuyanqan runakunata espädawan wanutsiyänanpämi permitirqan.

63Nina rupar ushaqnörämi jövinkunatapis guërrachö wanutsiyarqan.

Tsaymi jipashkunawan casarayänanpä jövinkunapis karqannatsu.

64Sacerdötikunatapis espädawanmi wanutsiyarqan.

Viüdankunapis wanutsiyänanta mantsarmi lütuyarqannatsu.

65Tsaymi punukashqanö kanqanpita tantiyaskir kuyanqan runakunata Tayta Dios yapay yanaparqan.

Vïnuta upur valorta tsariq runanömi

66chikiqninkunata Tayta Dios vincir qatikacharqan.

Tsaynöpam tsay chikiqninkuna imayyaqpis penqakuychö kayanqa.

67Tayta Dios manam munarqannatsu Josépita miraq Efraín trïbu runakuna täyanqan partichö templun kananta.

68Tsaypa rantinmi Judá trïbu runakuna täyanqan partita akrarqan.

Tsaychömi kuyanqan Sión jirkanta akrarqan templunta shäritsiyänanpä.

69Templunta shäritsirmi ciëluyaq altu kananpä shäritsirqan.

Kay patsanö mana ushakaq kananpämi shäritsirqan.

70Üshata mitsikur puriykaqtam sirviqnin Davidta akrarqan.

71Jacobpita miraq kuyanqan Israel runakunata cuidananpämi üshata mitsir puriykaqta akrarqan.

72Tsaymi Davidqa llapan shonqunwan paykunata shumaq cuidarqan.

Shumaq yarpachakuykurmi paykunata mandarqan.