2 Crónicas 33 - Bible in Quechua of South Conchucos（qxo）

Judá nacionchö Manasés rey kanqan 2 Reyes 21.1-18

1Manasés chunka ishkay watayuq kaykarmi rey kayta qallaykurqan. Payqa pitsqa chunka pitsqa (55) watam Jerusalénpita mandarqan.

2Manasésqa Tayta Diosta mana cäsurmi unay runakunanö jutsata rurar kawarqan.

9Tsaynö nikaptinpis Judá runakuna y Jerusalénchö täraq runakunaqa manam cäsuyarqantsu. Tsaypa rantinmi rey Manasés mas animatsiptin Tayta Dios ushakätsinqan nación runakunapitapis mas peorrä jutsata rurayarqan.

10Tsaynö karmi Manasés y mandanqan runakunaqa Tayta Dios parlapaptinpis cäsuyarqantsu.

11Tsaynö kanqanpitam Judá runakunapa contran shärir Asiria soldädukunapa capitanninkunata Tayta Dios mandarqan Manasésta prësu tsariyämunanpä. Tsaymi senqanpita ganchuwan tsarirkur y bronci cadënawan watarkur Babiloniaman prësu apayarqan.

12Tsaynö pasaypa ñakarrämi Manasésqa jutsata ruranqanta pësakur papänin y unay castankuna yärakuyanqan Tayta Diosta perdonta mañakurqan.

13Mañakunqanta wiyarmi Jerusalénman Tayta Dios kutitsimurqan yapay rey kananpä. Tsaynö ñakarrämi Manasésqa tantiyakurqan Tayta Dios llapanpä poderösu kanqanta.

14Tsaypitanam Manasésqa Davidpa Markan waqtanpa altu murällata shäritsirqan. Tsay murällatam shäritsirqan Gihón pukyupita rupay yarqamunan kaq lädu raqrata päsar Pescädu niyanqan punkuyaq y Ofel jirkanyaq. Tsaypitanam Judáchö alli murallashqa markakunaman capitankunata churarqan soldädunkunawan täpayänanpä.

15 Tayta Diospa templunpitanam jäpa runakunapa diosninkunata y ruratsinqan ïduluta jitatsirqan. Tsaynöllam Jerusalénchö y templu kanqan jirkanchö ïdulukunapä ruratsinqan altarkunata juchuskatsir markapita jukläman jitatsirqan.

16Tsaypitanam Tayta Diospa altarninta allitsarkatsir alli päsakuy sacrificiukunata y agradëcikur apamunqan sacrificiukunatapis rupatsirqan. Tsaynöllam Judá runakunata mandarqan Israel runakunata kuyaq Tayta Diosta adorayänanpä.

17Manasés ninqannö Tayta Diosta adorarpis runakunaqa markakunachö kaq altarkunachömi sacrificiukunata rupatsiyarqan. Peru manam ïdulukunata adorarnatsu tsay sacrificiukunata rupatsiyarqan, sinöqa Tayta Diosta adorarmi.

18Manasés imata ruranqankuna, Tayta Diosta mañakunqankuna y profëtankunawan Tayta Dios payta willakatsinqankunapis llapanmi Israel reykunapa acta librunchö qellqashqa kaykan.

19Tsaynöllam profëtakuna qellqayanqan libruchö qellqashqa kaykan Tayta Diosta perdonta Manasés mañakunqan y Tayta Dios imanö yanapanqanpis. Tsaynöllam tsaychö qellqashqa kaykan manarä perdonta mañakur jutsata ruranqankuna, altarkunata maychö shäritsinqankuna, Asera diösapä raku qerukunata maychö jawitsinqankuna y wakin ïdulukunata mayman churatsinqankunapis.

20Wanuskiptinmi Manasésta palaciu jardinman pampayarqan. Paypa trokinnam tsurin Amónna rey karqan.

Judá nacionchö Amón rey kanqan 2 Reyes 21.19-26

21Amón ishkay chunka ishkay (22) watayuq kaykarmi rey kayta qallaykurqan. Payqa ishkay watam Jerusalénpita mandarqan.

22Amónpis papänin Manasésnöllam Tayta Diosta mana cäsur jutsata rurarqan. Tsaynö karmi papänin ruratsinqan ïdulukunata adorar sacrificiukunata rupatsirqan.

23Peru tsaynö karpis manam papänin Manasésnötsu Tayta Diosta perdonta mañakurqan. Tsaypa rantinqa mas peormi jutsata rurarqan.

24Kikinpa yanapaqninkunallam contran shärir jinan palaciullanchö Amónta wanuskatsiyarqan.

25Tsayta musyaskirmi wanutsiq runakunata wanutsiyarqan. Tsaypitanam Amónpa tsurin Josíastana rey kananpä churayarqan.