Isaías 2 - Bible in Quechua of South Conchucos（qxo）

Jerusalénman Tayta Diosta adoraq aywayänanpä ninqan Miqueas 4.1-3

1Kaychömi qellqashqa kaykan Amóspa tsurin Isaíasta Tayta Dios revelanqan. Tsay revelacionchömi rikatsirqan shamuq watakuna Judá nación y Jerusalén marka imanö kananpä kanqanta.

2Shamuq watakunachömi Tayta Diospa wayin kaykanqan jirkanqa wakin jirkankunapita mas respitashqa kanqa.

Tsaymanmi maytsay nacionpitapis Tayta Diosta adorayänanpä runakuna aywayanqa.

3Tsaynöllam Sión jirkanpita Tayta Diospa yachatsikuyninta maytsaymanpis apayanqa.

Jerusalénpitam palabranta willakuyanqa.

Maytsay nacionpita runakuna Jerusalénman aywarmi niyanqa:

< akranqan jirkanman llapantsik witsäshun.

Jacobpita miraq runakuna yärakuyanqan Tayta Diospa wayinman yaykushun.

Tsaychömi kikin yachatsimäshun mandamientunkunata imanö cumplinantsikpä kanqantapis.

Tsaynöpam pay munanqannö llapantsik kawashun>>.

4Atska nación runakuna chikinakuyaptinpis Tayta Diosmi arreglanqa.

Tsay nacionkuna jatun kaptinpis paymi juzganqa.

Juk markawan juk marka guërrata manam rurayanqanatsu.

Guërrachö pelyayänanpäpis manam alistakuyanqanatsu.

Maytsaychöpis runakuna espädankunapitam takllatana ruratsiyanqa.

Lanzankunapitanam ösita ruratsiyanqa.

5Jacobpita miraq runakuna, shayämuy.

Tayta Dios ninqanta cäsur kawashun.

Mana cäsukuqkunata castigananpä ninqan

6Tayta Dios, kuyanqayki runakunam rupay yarqamunan läduchö täraq runakunanö suerti qatiyta yachakuyashqa.

Tsaynöllam filisteo runakunanö brüju kayta yachakuyashqa.

Jäpa runakunawan juntakarmi paykunanö llutanta rurar kawayan.

Tsaynö kayaptinmi Jacobpita miraq kuyanqayki runakunata dëjarquyki.

7Judá nacionchö runakunapa qorinkuna, qellayninkuna y imayka riquëzankunam atska.

Caballunkunapis y guërra carrëtankunapis yupayta mana atipaypämi kaykäyan.

8Tsaynöllam maytsaychöpis ïdulunkunata rurayashqa.

Kikinkuna rurayanqan ïdulutam qonqurikuykur adoraykäyan.

9Tsaynö rurarmi penqakuypä kaykäyan.

Taytay, paykunata ama perdonaytsu.

10¡Qaqakunapa uchkunkunaman y patsa rurinmanpis pakakuyay!

¡Espantaypä, chipipiykaq y poderyuq Tayta Diospita pakakuyay!

11Runa tukuqkunatapis penqakuymanmi churanqa.

Allish tukuqkunatam rugakatsinqa.

Tsay junaqqa Tayta Diosllatam pïmaypis alabayanqa.

12Llapanta mandaq Tayta Dios castiganan junaqmi allish tukuqkunata, mana cäsukuqkunata y runa tukuqkunatapis tsoqpakatsinqa.

13Líbanuchö jatunkaray cedru qerukunata y Basánchö encina qerukunatam Tayta Dios ushakätsinqa.

14Altu jirkakunata jatun jirkankunatam ushakätsinqa.

15Amparakuyänanpä ruratsiyanqan jatun törrikunatapis ushakätsinqam.

Marka tsaparaq murällakunatapis ushakätsinqam.

16Tarsispita shamuq kuyayllapä büquikunatapis ushakätsinqam.

17Tsaynöpam runa tukuqkunatapis penqakatsinqa.

Y allish tukuqkunatapis rugakatsinqa.

Tsay junaqqa Tayta Diosllatam pïmaypis alabayanqa.

18Tsay witsanqa runakuna adorayanqan llapan ïdulukunatam illakätsinqa.

19Espantaypä, chipipiykaq y poderyuq Tayta Diosmi runakunata castigananpä kay patsaman shamunqa.

Tsayta rikarmi pasaypa mantsakar qaqakunapa uchkunkunaman y patsa rurinmanpis pakakuyanqa.

20Tsay junaqqa qoripita qellaypita rurayanqan ïdulunkunata manana adorarmi ukushkuna y tseqtsikuna kayanqan uchkukunaman jitariyanqa.

21Pasaypa mantsarirmi qaqakunaman y machaykunamanpis pakakuyanqa.

Tsaynö pakakuyanqa chipipiykar poderyuq Tayta Dios castigananpä shamuqta rikarmi.

22Runakunamanqa amana yärakuyaynatsu.

Runakunaqa jamaynö ushakaqllam kaykäyan.