Salmo 7 - Bible in Quechua of South Conchucos（qxo）

Salmo 7Contrankunata juzgananpä Tayta Diosta mañakunqan 1 (1) Kay salmuta David cantarqan Benjamín trïbu Cus jutiyuq runa contran shärishqa kaptinmi.

1 1 (2) Tayta Diosllä, qamllamanmi yärakamü.

Chikimar qatikachämaqkunapita salvaykallämay.

2 2 (3) Mana tsapämaptikiqa león rachikachar ushaqnöchi ushayämanqa.

Qam mana salvamaptikiqa ¿pirä salvamanqa?

3 3 (4) Tayta Dios, ¿imatatä mana allita rurarqü?

¿Ima jutsatatä rurarqü?

4 4 (5) ¿Amïgütatsurä rabyanätsirqü?

¿Conträ runakunatatsurä qallayätsirqü?

5 5 (6) Tsaynö kashqa kaptïqa conträkuna maypapis qatikachäyämätsun.

Taripaykayämar qarachashqa puritsiyämätsun.

Pasaypa penqakuyman churayämätsun. Selah

6 6 (7) Tayta Dios, rabyar chikimaqnïkunapa contran shäriykullay.

Janä shärir paykunata castigaykullay.

7 7 (8) Maytsay nación runakuna puntaykiman qorikäyämutsun.

Paykunata juzganaykipä trönuykiman jamaykullay.

8 8 (9) Qammi maytsay nación runakunata juzganki.

Pipapis contran mana kaykaptïqa janä shäriykullay.

9 9 (10) Pïmaytapis mana favornin shäriypa juzgaq Tayta Dios,

runakuna imata yarpäyanqantapis musyaykankim.

Jutsa ruraqkunaqa amana mas jutsata rurayätsunnatsu.

Jutsaynaq runakunataqa yanapaykullay.

10 10 (11) Mana allikunapita tsapämänanpä Tayta Diosmi escüdü kaykan.

Paymi alli shonqu runakunata salvan.

11 11 (12) Tayta Diosmi jutsata rurayanqanman pitapis castigan.

Payqa mana favornin shäriypam jutsa ruraqkunata imaypis juzgan.

12 12 (13) Jutsa rurayta mana dëjaptinqa castigananpä espädan aptashqam kaykan.

Flëchanwan flëchananpäpis alistakushqam kaykan.

13 13 (14) Jutsa ruraqta ushakätsinanpämi armankuna kaykan.

Nina lunyaykaq flëchankunapis apuntaraykanmi.

14 14 (15) Rikayay jutsata rurar runakuna imanö kawayanqantapis.

Paykunaqa mana allikunata rurayänallanpämi imaypis yarpachakuyan.

Runa mayintam imaykachöpis engañayan.

15 15 (16) Ñakayänanpä kikinkunam jutsayuq kaykäyan.

Kikinkuna uchkuyanqan pözuman jeqaqnömi kayanqa.

16 16 (17) Jutsata rurayanqanpitam paykunaman castïgu chanqa.

Runa mayinkunata ñakatsiyanqanpitam kikinkunata ñakatsiyanqa.

17 17 (18) Pïmaytapis mana janan shäriypa juzganqanpitam Tayta Diosta imaypis alabashä.

Poderösu Tayta Diostam kushishqa imaypis alabashä.