Salmo 44 - Bible in Quechua of South Conchucos（qxo）

Salmo 44 (43)Yanapananpä Tayta Diosta mañakunqan 1 (1) Cantaqkunapa mandaqninpämi. Corépita miraqkuna qellqayanqan salmum.

1 1 (2) Tayta Dios, awilükunam willayämashqa espantaypä kaqkunata rurar unay castäkunata imanö yanapanqaykita.

2 2 (3) Kay nacionchö täyänanpämi unay runakunata qarqur ushakätsirquyki.

3 3 (4) Manam kikinkunapa kallpankunawantsu kay nacionta qechuyarqan.

Ni espädankunawantsu kaychö täraq runakunata vinciyarqan.

Qammi derëcha kaq makikiwan vincirquyki.

Unay castäkunata kuyarmi yanaparquyki.

4 4 (5) Tayta Dios, qammi mandamaqnï rey kanki.

Qammi conträkunata vinciyänäpä yanapayämarquyki.

5 5 (6) Yanapayämaptikim conträkunata vinciyä.

Qampa jutikichömi atacamaqkunata ushakätsiyä.

6 6 (7) Vinciyänäpäqa manam flëchakunämantsu yärakuyä.

Tsaynölla manam espädäkunatsu salvayäman.

7 7 (8) Qam yanapayämaptikim conträkunata vinciyarqü.

Qammi chikimaqnïkunata penqakuyman churarquyki.

8 8 (9) Qamtam imaypis kushishqa agradëcikuyäshayki.

Jutikita joqarirmi imaypis alabayäshayki. Selah

9 9 (10) Peru kananqa ¿imatä päsashqa jaqiskayämänaykipä?

Jaqiskayämaptikim pasaypa penqakushqa puriykäyä.

Soldädükunatapis mananam yanapankinatsu.

10 10 (11) Atacayämänanpä conträkunata yanapaptikim qeshpir aywakuyarqü.

Tsaymi paykunaqa imaykäkunatapis munanqan kaqta apakuyashqa.

11 11 (12) Pishtananpä kaykaq üshatanömi conträkunapa makinman churayämarquyki.

Juklä nacionkunachö mashtakashqa kayänäpämi qarqayämarquyki.

12 12 (13) Kuyanqayki runakuna kaykäyaptïpis barätullachömi rantikayämarquyki.

Rantikayämanqaykiwan imatapis manam gänarquykitsu.

13 13 (14) Pïmaypis ashlliyämänanpämi dëjayämarquyki.

Juklä nacionkuna wajupäyämarmi manakaqman churayäman.

14 14 (15) Tsay nación runakuna jamuyämänanpämi dëjayämarquyki.

Rikaskayämarmi umankunatapis awirrä burlakayäman.

15 15 (16) Tsaymi imay hörapis pasaypa penqakuyä.

Cäräkunapis chipyaqmi pukayashqa kaykan.

16 16 (17) Tsaynö kayä conträkuna chikiyämaptin y ashlliyämaptinmi.

17 17 (18) Tsaykunam päsayäman pactu ruranqantsikta cumpliykäyaptï.

18 18 (19) Ninqaykikunataqa imaypis mana qonqaypam cumpliyarqü.

19 19 (20) Tsaynö kaykäyaptïmi imapis mana kanqanman qarqayämarquyki.

Pasaypa mantsariypä tsakaychönö kayänäpämi dëjayämarquyki.

20 20 (21) Qonqaskirniki juk diosta adorayaptïqa

21 21 (22) musyankimanmi karqan.

Tayta Dios, qamqa llapantam musyanki.

22 22 (23) Munanqaykinö kawayaptïmi chikiyämar imaypis wanutsiyäman.

Pishtayänanpä üshanömi kaykäyä.

23 23 (24) ¡Rikchay, Tayta Dios!

¿Imanirtä punukunki?

¡Amana dëjayämaytsu!

24 24 (25) ¿Imanirtä noqakunapita pakakunki?

¿Imanirtä qonqaskayämarquyki?

¡Imanö ñakatsiyämanqantapis rikaykullay!

25 25 (26) Vinciyämaptinmi ima ruraytapis puëdiyänatsu.

Penqakuywanmi umpukashqa puriykäyä.

26 26 (27) Taytay, yanapaykayällämay.

Kuyapäyämar salvaykayällämay.