1 Timoteo 5 - Bible in Quechua of South Conchucos（qxo）

Criyikuq mayinkunata respitananpä yätsinqan

1Rukukunata ama ollqu tupaytsu. Tsaypa rantinqa papänikitanö respitarnin alli shimillaykipa tantiyatsiy. Jövinkunatapis wawqikitanö shumaq tantiyatsiy.

2Chakwankunatapis mamaykitanö respitarnin tantiyatsiy. Tsaynölla jipashkunatapis panikitanö respitay.

Viüdakunata yanapayänanpä ninqan

3Castaynaq viüdakunata imallawanpis yanapayay.

4Peru mayqan viüdapapis wamrankuna o willkankuna karqa paykuna yanapayätsun. Kuyar wätanqanta ama qonqäyätsuntsu. Tsaynö yanapaptinmi Tayta Dios kushikun.

5Castaynaq viüdakunaqa Tayta Diosman criyirmi paqaspa junaqpapis mañakuyan.

6Peru wakin viüdakunam sïqa munanqannö purikur imayka wanushqanö kaykäyan.

7Castankuna viüda kaptinqa yanapayänanpä wawqikunata y panikunata yachatsiy. Yanapayaptinqa manam pipis despreciayanqatsu.

8Mamanta, awilanta y wayinchö täraqkunata imallatapis mana yanapaptinqa Tayta Diosman criyinqanpis manakaqllapämi kaykan. Tayta Diosta mana cäsuq runapitapis mas peormi kaykan.

9Viüdakunapa jutinkunata joqta chunka (60) watayuq kayaptinrä listaman qellqay. Tsaynöllam kayanman juk runallawan tashqa,

10allita rurayanqanpita shumaq respitashqa, wamrankunata shumaq wätashqa, wayinman chaqkunata patsatsiq, Tayta Diosman yärakuqkunata alli shonqunwan yanapaq, muchuqkunata kuyapaq y allita ruraq.

11Peru manarä joqta chunka (60) watayuq viüdakunataqa listaman ama qellqankitsu. Paykunaqa mana runäkuypa Jesucristuta sirviyänanpä awnirkurpis runayuq kaytam yapay munayan.

12Yapay runäkurmi Jesucristuta awniyanqantapis mana cumplir jutsayuq kaykäyan.

13Qela karmi imayka rurayninkunata dëjaskir wayin wayin puriyan. Tsaynöllam runapa wasanta rimar y imaykamanpis mëtikurnin manakaqkunata parlar puriyan.

14Tsaynö mana kayänanpä jipashllarä viüdakunaqa yapay runäkur wamrankunata wätayätsun y wayinchö rurayninkunata rurayätsun. Tsaynö kawayaptinqa contrantsik kaqkuna manam despreciamäshuntsu.

15Wakin viüdakunaqa Jesucristuman criyikuyanqanta jaqiskirmi Satanás munanqannöna kawayan.

16Mayqan mayqan panipapis castanchö viüda kaptinqa paykuna wätayätsun. Tsaynöpam wawqikuna y panikuna qoriyanqan aypanqa castaynaq viüdakunata yanapayänanpä.

Mayor wawqikuna shumaq rikashqa kayänanpä ninqan

17 Mayor wawqikuna Diospa willakuyninta willakuyaptin y yachatsiyaptin shumaq respitar alli pägayätsun. Tsaynölla llapanpis mayor wawqikunata alli mandayaptin respitar pägayätsun.

18Tayta Diospa palabranmi nin: <<Ërachö trïguta trillar töruta ama shenqawayankitsu>>.

19Mayor wawqi jutsata ruranqanta ishkaq o kimsaq nishuptikirä cäsunki. Juk runalla niptinqa ama cäsunkitsu.Deut. 17.6; 19.15.

20Jutsa ruranqanta mana dëjaptinqa llapanpa puntanchö payta rimanki. Tsaynö rimaptikim wakinpis mantsapakur jutsata mana rurayänanpä tantiyakuyanqa.

21Tayta Diospa, Señor Jesucristupa y payta sirviq angelkunapa puntanchömi qamta nï: Pipapis favornin mana shäriypa kay ninqäkunata cumplinki.

22Mayor wawqi kananpä pipa umanmanpis makikita ama llutallaqa churankitsu. Jutsa ruraqta churarqa qampis jutsayuqmi kanki. Kikikipis Tayta Dios munanqannö kaway.

23Pacha nanaywan jinalla qeshyarqa yakullata upunaykipa rantin wallkallata vïnuta upunki.

24Wakin runakuna jutsata rurayanqanqa manarä tapuptikim jinan höra musyakan. Wakin runakuna jutsata rurayanqanmi sïqa tsaypitarä musyakan.

25Tsaynöllam wakin runakuna allita rurayanqanpis jinan höra musyakan. Peru wakinpam sïqa tsaypitarä musyakan.