1Tsay witsanmi desiertupis y tsaki pampakunapis kushikuyanqa.
Tsunyaq pampakunachöpis imaykaläya qewam lloqllurrä tuktunqa.
2Waytakunapis pasaypam tuktuyanqa.
Pampakunapis kushishqam cantayanqa.
Muntikunapis Líbano muntikunanö kuyayllapämi kanqa.
Chakrakunapis Carmeluchö y Sarónchö kuyayllapä kanqannömi kanqa.
Tsaymi Tayta Diosnintsik poderyuq kanqanta pïmaypis tantiyanqa.
3Qelanäyaptiki makiki warkukäkushqanö kaptinpis
y alaychö qonqurniki watakaqnö kaptinpis valorta tsariyay.
4Mantsariqkunata nishun:
<<¡Ama mantsariyaytsu!
¡Valorta tsariyay!
¡Tayta Diosnintsikmi yanapayäshunki!
Ñakatsishuqnikikunatam castiganqa.
Kikinmi shamur salvayäshunki>>.
5Tsaymi qaprakunapis rikayanqa.
Mana wiyaqkunapis wiyayanqa.
6Weqrukunapis lluytsunörämi saltayanqa.
Mana parlaqkunapis shiminkuna pashtaptinmi kushikur cantayanqa.
Desiertukunachöpis atskam yaku pashtamunqa.
Tsaki jirkakunapapis mayunörämi yaku aywanqa.
7Tsaychömi qochakunapis kanqa.
Yakukunam pashtamunqa.
Chacalkuna kayanqanchöpis carrïzuwan ututunam jeqamunqa.
8Tsaymanmi nänipis aywanqa.
Tsay nänipa jutinmi kanqa Diosman Chäna Sagrädu Näni.
Jutsa ruraq runaqa manam tsay nänipa purinqatsu.
Mana yachaq runakunaqa tsay näniman manam jaruyllapis jaruyanqatsu.
Tayta Dios munanqannö kawaq runakunallam tsay nänipa puriyanqa.
9Tsaypaqa leonkunapis manam puriyanqatsu.
Jatusaq chucaru ashmakunapis manam yaykuyanqatsu.
Tsay nänipaqa salvashqa kaq runakunallam puriyanqa.
10 Tayta Dios salvanqan runakunam tsay nänipa Jerusalénman kutiyämunqa.
Kushishqa cantaraykarmi Siónman yaykayämunqa.
Tsaychömi imaypis kushishqalla kawayanqa.
Kushishqa alli kawayaptinmi llakikuypis ni waqaypis kanqanatsu.
Who We AreWhat We EelieveWhat We Do
2025 by iamachristian.org,Inc All rights reserved.
