Cantares 7 - Bible in Quechua of South Conchucos（qxo）

Jövin:

1 1 (2) Reypa tsurinnörä jipash, sandaliaykita jatikuskiptiki chakikipis kuyayllapämi.

Adornu rurayta yachaqkuna rurayanqan adornunömi tseqllaykipis kuyayllapä.

2 2 (3) Pupuykipis alli vïnu cöpaman junta wiñashqanömi.

Pachaykipis liriu waytawan entëru lädunpa tsapashqa trïgu qoturaykaqnömi.

3 3 (4) Chuchuykipis millish llullu lluytsukunanömi kuyayllapä.

4 4 (5) Kunkaykipis marfilpita rurashqa törrinömi kuyayllapä.

Ñawikipis Hesbón markachö kaykaq Bat-rabim punku lädunchö ishkay yaku estanquinömi.

Senqaykipis Damascuman rikaraykaq Líbanuchö kaykaq törrinömi kuyayllapä.

5 5 (6) Umaykipis Carmelo jirkanömi kuyayllapä.

Aqtsaykipis fïnu jïlunö karmi reytapis löcuyätsin.

6 6 (7) Kuyay jipashnï, qamqa kanki pasaypa kuyayllapämi.

Mana dëjaypa kuyakuyllapämi kanki.

7 7 (8) Palmëra ichiraykaqnömi kuyayllapä jatunkaray kanki.

Chuchuykipis palmërapa wayuynin warkuraqnörämi.

8 8 (9) Wayuyninta pallanäpämi palmëraman yarkuyta munä.

Tsaychömi tarishä sartanpa üvanö chuchuyki kaykaqta,

jamayniki poqushqa manzänanö mushkuykaqta

9 9 (10) y shimiki alli kaq vïnunö pasaypa mishkiykaqta.

Mutsamaptikim vïnuta upuptï kirüpa y qallüpa mishkir päsaqnö kaykan.

Jipash:

10 10 (11) Noqaqa kuyaynïllapämi kä.

Paypis lädullächö kaytam munan.

11 11 (12) Kuyaynï, markapita juklla yarqushun.

Kuyayllapä mushkuq waytakunapa chawpinchö warämushun.

12 12 (13) Patsa waraskiptinnam üva chakrakunaman aywashun.

Tsaychömi rikamushun mä üvakuna maynakush wayuykäyan y granadïllapis maynakush tuktuykäyan.

Tsaychömi shonqüta entregashayki.

13 13 (14) Tsaychömi mandrägoraspa mushkuyninpis mushkuykan.

Tsaychöqa tukuyläya frütakunam kaykan.

Kuyaynï, reqinqayki y mana reqinqayki frütakunatapis tsaychömi yawatsishayki.