2 Corintios 7 - Bible in Quechua of South Conchucos（qxo）

1Kuyay wawqikuna y panikuna, Tayta Dios tsaynö nikämashqaqa llapan jutsantsikkunata dëjashun. Jutsata rurarmi cuerpuntsiktapis espïrituntsiktapis qanratantsik. Tsaynö kaykaptinqa Tayta Diosta mantsapakur pay munanqannö imaypis kawashun.

Pablo yätsinqanta cäsukuyanqan

2Wawqikuna y panikuna, yarpaykayällämay. Qamkunata manam mayqaykitapis mana allita rurayarqütsu ni llullapäyarqütsu ni engañayarqütsu.

3Qamkunata tsaynö nï manam manakaqman churartsu, sinöqa ñöpata ninqänöpis qamkunata kuyayämi. Tsaymi imaypis mana qonqaypa yarparäyäshayki.

4Ninqäkunata chaskiyänaykipä kanqanta tantiyarmi qamkunaman yärakü. Tsaymi ima päsamaptinpis llakikunäpa rantin pasaypa kushikü.

5Macedonia provinciaman chäyanqäpita manam jamaytapis tariyarqütsu. Tsaypa rantinqa runakuna conträ shäriyaptin y qamkunapä y Titupä yarpachakurmi pasaypa llakikuyarqü.

6Peru tsaynö kaykäyaptïmi Tito chämuptin llakishqa kaykaqkunata valuratsiq Tayta Dios valuratsiyämashqa.

7Manam Tito chämunqallanpitatsu kushikuyarqü, sinöqa qamkuna kaqpita Tito kushishqa kutimunqanpitapis kushikuyarqümi. Paymi willayämashqa qamkunaman watukaq shamunäta munaykäyanqaykita, qallayätsinakunqantsikpita llakikuyanqaykita y noqapä yarpachakuykäyanqaykitapis. Tsaynö willayämaptin masrämi kushikuyarqü.

8Apatsimunqä cartata liyir llakikuyanqaykita musyarpis manam llakikütsu. Peru qellqamunqä höram sïqa pasaypa llakikurqä cartachö ninqäta liyir llakikuyänaykipä kanqanta musyar.

9Kananqa pasaypam kushikü. Manam qamkunata llakikatsinqäpitatsu kushikü, sinöqa tantiyakur Tayta Diosta cäsuyanqaykipitam. Cartata apatsiyämunqä manam manakaqllapätsu kashqa, sinöqa Tayta Dios munanqannö llakikuyänaykipämi.

10Tayta Dios munanqannö llakikurqa jutsa ruraytam dëjantsik. Jutsa rurayta dëjaqkunatam Tayta Dios perdonan. Tsaynö perdonta tarirqa manam llakikuntsiknatsu, sinöqa kushikuntsikmi. Peru mana criyiqkunam sïqa llakikurpis jutsa rurayta mana dëjar wanushqanö kaykäyan.

11Tayta Dios llakikuyman churayäshunqayki allipämi kashqa. Tsaymi kananqa perdonta mañakayämarquyki, conträ shäriq runapä rabyanäyarquyki, Tayta Diosta mantsapakuyanki, noqawan tinkuytana munaykäyanki, noqapä yarpachakuyanki y jutsayuq runata corrigiyarquyki. Tsaynö kayaptikim tantiyakuyä llapanta sitiunman churayanqaykita.

12Tsay apatsimunqä carta manam conträ shäriq runata corrigiyänaykillapätsu ni noqa kushikunällapätsu kashqa, sinöqa tantiyatsiyanqäta chaskikur rasunpa kuyayämanqaykita Tayta Diospa puntanchö tantiyayänaykipämi.

13Kuyayämanqaykita musyarmi pasaypa kushikuyarqü. Peru masrämi kushikuyarqü Tituta alli chaskiyanqaykipita y valuratsiyanqaykita kikin willamaptin.

14Manarä qamkuna kaqman Tito shamuptinmi payta valuratsir nirqä: <>. Tsay ninqänöllam llapanpis kashqa. Tsaymi qamkunata imaypis rasun kaqta ninqänö qamkunapä payta ninqäkunapis rasun kaqlla kashqa.

15Kananqa cäsukuyanqaykipita y payta alli chaskikuyanqaykipitam Titupis qamkunapä yarparaykan.

16Tsaynöllam yärakuypä kayanqaykipita noqapis kushikü.