Salmo 17 - Bible in Quechua of South Conchucos（qxo）

Salmo 17 (16)Chikiqninkunapita salvananpä mañakunqan 1a (1a) Kay salmuqa Tayta Diosta David mañakunqanmi.

1 1 (1b) Tayta Dios, mañakamunqäta wiyaykallämay.

Qayakamunqäta chaskiykallämay.

Rugakamunqäta wiyaykallämay.

Llapan shonqüwanmi qamta mañakamü.

2Qammi musyanki imanö kanqätapis.

Tsaymi janä shärinaykipä mañakamü.

3Junaqpapis paqaspapis shonqü imata yarpanqantapis musyaykankim.

Manam ima jutsätapis tarirquykitsu.

Llutankunataqa manam imaypis parlarqütsu.

4Mandamientuykikunata cäsurmi runakuna llutanta rurayaptinpis llutantaqa rurarqütsu.

5Tantiyatsimanqaykinömi imaypis kawarqü.

Ninqaykikunatam imaypis cäsurqü.

6Taytay, mañakamunqätaqa imaypis wiyamankim.

Tsayta musyarmi imaypis mañakamü.

Rugakamunqäta wiyar yanapaykallämay.

7Llapan shonqunkunawan yärakayämuptinmi contrankunapita salvanki.

Kuyamanqaykita tantiyanäpä noqallätapis salvaykallämay.

8Ñawi nïñuykitanö cuidaykallämay.

Chipshanta älan rurinman wallpa pakanqannö noqatapis pakaykallämay.

9Mana alli ruraq runakunapa makinpita tsapaykallämay.

Conträkuna jiruruypa tsapäyämaptinpis salvaykallämay.

10Conträkunaqa mana kuyapäkuqmi kayan.

Runa tukurmi imatapis parlayan.

11Maypa aywaptïpis rikaraykäyämanmi.

Llutankunaman ishkitsiyämänanpämi shuyaraykäyäman.

12Leonnö pakakuykurmi pitapis atacayänanpä shuyaräyan.

13 Tayta Dios, tsay mana alli ruraq runakunata castigaykullay.

Qonqurninkunatapis tumaskatsiy.

Espädaykiwan salvaykallämay.

14Podernikiwan tsapaykallämay.

Tsay runakunata kay patsapita ushakaykatsillay.

Paykunapa herenciankunaqa kay patsachö kaqkunallam kaykan.

Paykunaqa rïcuyarpis jina rïcuyäyätsun.

Wamrankunapis empachanqanyaq mikuyätsun.

Willkankunapäpis sobray sobray katsun.

15Peru noqam sïqa puntaykiman chämushä.

Qamta rikaykurnikim kushikushä.