Isaías 59 - Bible in Quechua of South Conchucos（qxo）

Jutsa ruraq kanqantsik

1Ama yarpäyaytsu salvayäshunaykipä Tayta Dios poderniynaq kanqanta.

Payqa manam upatsu mañakuyanqaykita mana wiyayäshunaykipä.

2Tsaypa rantinqa jutsaykikunam imayka jatun pirqanöpis paypita rakiyäshunki.

Tsaymi jutsata rurayanqaykipita Tayta Diosnintsik rikayäshunkinatsu.

Mañakuyaptikipis manam wiyayäshunkitsu.

3Wanutsikuq kayaptikim makikikunapis yawarllana kaykan.

Dëduykikunapis runa wanutsiqmi.

Shimikikunapis pasaypa llullam.

Qalluykikunapis mana allillatam parlan.

4Manam pipis allita rurananpä yarpachakuntsu.

Demandakuqpis manam rasun kaqtaqa parlantsu.

Autoridäkunapis llullakuqkunatam criyiyan.

Manam pipis rasun kaqtaqa parlantsu.

Jutsata rurallarmi kaykäyan.

5Llikanta pachka awaqnö y culebrapa runtunta oqllaqnömi kaykäyan.

Tsay runtukunata mikurqa wanunmi.

Runtuta pakiptinmi culebrakuna yarqayämun.

6Röpata rurayänanpä pachkapa llikan mana alli kanqannömi tsay runakuna llapan rurayanqanpis mana alli.

Paykunaqa mana alli ruraykunatam rurayan.

7Tsaymi mana allita rurayänanpä ras cörriyan.

Jutsaynaq runata wanutsiyänanpämi empëñu aywayan.

Mana allita rurayänallanpämi yarpachakuyan.

Maypa aywarpis llutankunata rurallarmi puriyan.

8Alli kaway imanö kanqantapis manam musyayantsu.

Manam imatapis allitaqa rurayantsu.

Paykuna kawayanqannö kawarqa manam pipis alli kawayta tarinqatsu.

9Tsaymi salvakuyta munarpis puëdintsiktsu.

Runa mayintsikwan alli kawaytapis manam puëdintsiktsu.

Atsikyayta shuyarashqapis tsakayllam kaykan.

Aktsichönö kawayta munarpis tsakaychönöllam kawaykantsik.

10Qaprakuna pirqata yatayllapa puriqnömi kawaykantsik.

Rikayta mana puëdiqnömi lamkayllapa puriykantsik.

Pullan junaqpis paqaspa tapraykachar ishkiqnömi kaykantsik.

Kawaykarpis wanushqanömi kaykantsik.

11Pasaypa llakikurmi ösunörä waqaykantsik.

Paluma waqaqnömi llakishqa waqaykantsik.

Alli kawayta shuyashqapis manam chämuntsu.

Salvakuyta munarpis manam salvakuntsiktsu.

12Imaypis jutsata rurarmi Tayta Diosta rabyatsintsik.

Llapan ruranqantsikmi jutsayuq kanqantsikta willakun.

Jutsa rurayta dëjayta mana puëdirmi jutsayuq kanqantsikta musyantsik.

13 Tayta Diosnintsik ninqankunata manakaqman churarmi cäsuntsiktsu.

Llutanta ruranantsikpä y runa mayintsikta engañanallantsikpämi willanakuntsik.

14Juezkunapis alli runapa contranmi shäriyan.

Allita rurananpä manam pipis yarpannatsu.

Rasuntanörä parlarmi pïmaytapis criyitsiyan.

Pïmaypis suwapänakullarmi kawayan.

15Llapanpis llullapänakuyanmi.

Alli runakunataqa carcelmanmi wichqayan.

Tsayta rikarmi Tayta Dios pasaypa rabyan.

16Mana allikunata rurayaptin pipis mana michaqta rikarmi Tayta Dios pasaypa rabyan.

Tsaymi ñakaqkunapa janan kikin Tayta Dios shärishqa.

17Guërrachö tsapakuna chalëcutam jatikushqa.

Tsay chalëcuqa alli rurayninkunam.

Tsaynöllam umanman cascu jatikunqan salvación kaykan.

Runa mayinta ñakatsiqkunata castigananpämi pasaypa rabyar yarqushqa.

18Mana allita rurayanqanpitam cada ünunta castiganqa.

Pasaypa rabyarmi contran runakunata jutsa rurayanqanman castiganqa.

Lamar kuchun markakunachö täraqkunatapis castiganqam.

19Mayu atskayar bunyaypa bunyar aywaqnörämi castigananpä Tayta Dios shamunqa.

Tsaymi rupay yarqamunanpita rupay ullunanyaq Tayta Diosta mantsapakuyanqa.

20 Tayta Diosmi nin:

< shamunqa.

Jacobpita miraqkuna jutsa rurayta dëjayaptinqa llapantam salvanqa>>.

21 Tayta Diosmi nin:

< rurarmi nishä:

Kay pactutam imaypis yarparäyanki.

Manam imaypis qonqayankitsu.

Tsurikikuna y willkaykikunapis manam qonqayanqatsu> >>.