1 Tayta Dios, manam noqakunatsu alabashqa kayäman.
Tsaypa rantinqa qamta pïmaypis alabayäshuy.
Kuyapäkuq kanqaykipita y ninqayki rasun kaq kanqanpita alabayäshuy.
2¿Imanirtä runakuna asipämar niyäman: <<¿Maychötä Diosniki?>>?
3Tayta Diosnintsikqa ciëluchömi kaykan.
Payqa llapan munanqantam ruran.
4Runakuna adorayanqan ïdulukunaqa qoripita y yuraq qellaypitam.
Tsaykunataqa runakunallam rurayan.
5Shimin kaptinpis manam parlayantsu.
Ñawin kaptinpis manam rikayantsu.
6Rinrin kaptinpis manam wiyayantsu.
Senqan kaptinpis manam muskiyantsu.
7Makin kaptinpis manam yatayantsu.
Chakin kaptinpis manam puriyantsu.
Tsaykunaqa manam imatapis parlayantsu.
8Ïdulu poderniynaq kanqannömi ïdulukunata ruraqkunapis kayan.
Ïdulukunaman yärakuqkunaqa ïdulunöllam llapanpis kayan.
9Israel runakuna, ¡Tayta Diosllaman yärakuyay!
Paymi yanapamantsik y escüdunö imapitapis tsapämantsik.
10Aarón casta sacerdötikuna, ¡Tayta Diosllaman yärakuyay!
Paymi yanapamantsik y escüdunö imapitapis tsapämantsik.
11 Tayta Diosta mantsapakuqkuna, ¡payman yärakuyay!
Paymi yanapamantsik y escüdunö imapitapis tsapämantsik.
12 Tayta Diosmi yarparaykämantsik.
Paymi Israel runakunapä bendicionninta churamun.
Aarónpita miraqkunapäpis bendicionnintam churamun.
13 Tayta Diosqa payta mantsapakuqkunapämi bendicionninta churamun.
Rïcukunapä y pobrikunapäpis bendicionnintam churamun.
14Tsurintsikkunapä y willkantsikkunapä bendicionninta churaykallämutsun.
15Ciëluta y kay patsata kamaq Tayta Dios bendicionninta qamkunaman churaykallämutsun.
16Ciëluqa Tayta Diospam kaykan.
Kay patsataqa runakuna täyänanpämi kamashqa.
17Pamparaykaqkunaqa manam Tayta Diosta alabayannatsu.
18Peru noqantsikmi sïqa Tayta Diosta imaypis alabashun.
¡Aleluya!
Who We AreWhat We EelieveWhat We Do
2025 by iamachristian.org,Inc All rights reserved.
