1 Timoteo 6 - Bible in Quechua of South Conchucos（qxo）

Esclävukuna patronninta respitayänanpä ninqan

1Esclävukuna patronninta shumaq respitayätsun. Tsaynöpam Tayta Diospä willakuyninpä ni pipis llutanta parlanqatsu.

2Patronnin yärakuq mayin kaptinpis ama yarpäyätsuntsu mana respitayänanpä kanqanta, tsaypa rantinqa yärakuq mayin kaptin masrä respitayätsun. Esclävukuna tsaynö kayänanpä shumaq yachatsiy.

Imantsikpis kanqallanwan kushishqa kawanantsikpä ninqan

3Pipis Señornintsik Jesucristupa alli willakuyninta yachatsinanpa rantin y Tayta Dios munanqannö kawanantsikpä yachatsinanpa rantin llutanta yachatsirqa

4yachaq tukunmi. Tsay runakunaqa imatapis mana musyarmi llutan yachatsikuykunapita rimanakuyan. Tsaykunata chaskirmi runakuna chikinakur, rimanakur, qayapänakur y qallayätsinakur kawayan.

5Llutan yachatsikuqkunaqa kikinpuram manakaqkunapita rimanakuyan. Mana allikunapä yarparmi Jesucristupa willakuynin ima kanqantapis tantiyayantsu. Tsaynöllam Tayta Diosta sirvir rïcuyäyänanpä kanqanta yarpäyan.

6Imantsikpis kanqallanwan contentakur y Tayta Dios munanqannö kawarmi rïcu runapitapis mas alli kawantsik.

7Jinayllam yurirquntsik. Tsaynöllam wanurpis jinaylla aywakushun.Job 1.21; Sal. 49.17; Ecl. 5.15.

8Tsaynö kaykaptinqa mikunantsikpä y jatikunantsikpä kanqallanwan kushishqa kawashun.

9Rïcu kayta munaqkunaqa trampaman jeqaqnömi imayka llutan ruraykunaman jatikar yarquytapis puëdiyannatsu. Tsaynö karmi pasaypa ñakayan.

10Qellaypä mallaqashqa kaqkunaqa imayka jutsatam rurayan.Heb. 13.5. Wakin wawqikuna y panikunapis rïcuyayllapä yarpachakurmi Jesucristuman yärakuyannatsu. Tsaymi imayka tuksikushqanörä pasaypa ñakaykäyan.

Tayta Dios munanqannö kawananpä yätsinqan

11Timoteo, Tayta Diosta sirviq kaykarqa ama qellaypä mallaqashqa kaytsu. Tsaypa rantinqa Tayta Dios munanqannö imaypis kaway, payman yärakuy, runa mayikita kuyay, pacienciakuy y pitapis alli shimillaykipa parlapay.

12Guërrachö soldädukuna mana ajayaypa pelyayanqannö qampis mana ajayaypa Jesucristuman yärakuy. Mana ushakaq kawayta chaskinaykipä qayaykäshuptikiqa imaykanöpapis pay munanqannö kaway. Tsayta tantiyarmi Jesucristuman criyikunqaykita wawqikunapa y panikunapa puntanchö willakurquyki.

13Musyankim Poncio Pilatupa puntanchö Jesucristo mana mantsariypa willakunqanta.Juan 18.37. Tsaymi Jesucristupa jutinchö y llapantapis kamaq Tayta Diospa jutinchö qamta nï:

14Señornintsik Jesucristo kutimunqanyaq kay cartachö ninqäkunata llapantapis mana qonqaypa cumpliy.

15Tiempu chämuptinnam Jesucristuta kay patsaman Tayta Dios mandamunqa. Tayta Diosqa Reykunapa Reynin y señorkunapa Señornin kaykan.

16Pay kikillanmi imayyaqpis kawaq kaykan y pasaypa chipipiykaqchömi kaykanpis.Sal. 104.2. Payta manam pipis rikashqatsu ni rikaytapis puëdintsu. ¡Llapan runakuna imayyaqpis payta alabaykuyätsun! ¡Paypa poderninchö llapan runakuna imayyaqpis kaykuyätsun! Amén.

17Rïcu wawqikunata y panikunata niy mana runa tukuyänanpä y riquëzankunaman mana yärakuyänanpä. Riquëzakunaqa ushakaqllam. Riquëzankunaman yärakuyänanpa rantin Tayta Diosllaman yärakuyätsun. Paymi kushishqa kawanantsikpä imaykatapis alistapämantsik.

18Tsaynölla rïcukunata yachatsiy allikunata imaypis rurayänanpä y wakin runakunata riquëzankunawan yanapayänanpä.

19Tayta Diosman yärakur allikunata rurarqa mana ushakaq kawaytam tariyanqa. Tsaychörämi rasunpa alli kawayta tariyanqa.

Cartapa ushanan

20Timoteo, Tayta Dios willakuyninta willakunaykipä churaykäshuptikiqa llapan ninqäkunata shumaq cumpliy. Llutan yachatsikuqkunataqa ama cäsuytsu. Tsay runakunaqa yachaq kayanqanta yarparmi llutan yachatsikuykunata yachaykätsiyan.

21Wakinqa llutan yachatsikuqkunata cäsurmi Tayta Diosman criyikuyanqanpita witikuyashqa.

Qamta y qamwan kaykaqkunata Tayta Dios imaypis yanapaykuyälläshuy.