1 1 (1b) Tayta Diosnï y mandamaqnï rey, qamtam imaypis alabashayki.
Imaypis jutikichömi agradëcikushayki.
2Qoyay qoyaymi alabashayki.
Imaypis jutikita joqarirmi alabashayki.
3Llapanpä poderyuqmi kanki.
Cantukunata cantarmi adorashayki.
Poderösu kanqaykiqa mana tantiyaypämi.
4Milagru ruranqaykikunatam tsurïkunatapis willashä.
Paykunapis espantaypä ruranqaykikunatam tsurinkunata willayanqa.
5Poderösu y mantsaypä kanqaykitam imaypis yarparäshä.
Kushikuypä ruranqaykita manam qonqäshätsu.
6Poderösu kanqaykitam willakushä.
Podernikiwan ruranqaykikunatam pïmaypis parlayanqa.
7Kuyapäkuq kanqaykitam maychöpis willakuyanqa.
Allillata ruranqaykipitam cantar alabayäshunki.
8 Tayta Diosqa alli shonqu y kuyapäkuqmi.
Kuyakuq karmi rasqa rabyantsu.
Kuyakuq kayninqa manam imaypis ushakantsu.
9 Tayta Diosqa pïmaypäpis allitam ruran.
Llapan kamanqantam kuyar cuidan.
10 Tayta Dios, llapan kamanqaykikuna alabaykuyälläshuy.
Munanqaykinö kawaqkuna llapanpis adoraykuyälläshuy.
11Alli mandaq kanqaykitam parlayanqa.
Espantaypä ruranqaykikunatam willakuyanqa.
12Tsaynöpam poderösu kanqaykita entëru munduchö musyayanqa.
Podernikiwan mandanqaykitam pïmaypis musyayanqa.
13Rey kanqaykiqa imaypis mana ushakaqmi.
Imayyaqpis mandaqmi kanki.
Promitinqaykitaqa imaypis cumplinkim.
Ruranqaykiqa llapanpis allim.
14Ishkiqkunatam shäritsinki.
Llakishqa kaykaqkunatam kushikatsinki.
15Qamtam llapan kawaqkuna höranchö mikuyta qaranaykipä shuyäyäshunki.
16Kuyaparmi llapan kawaqkunapäpis bendicionnikita churamunki.
17 Tayta Dios ruranqankunaqa llapanpis allim.
Kuyapäkuq karmi imatapis allillata ruran.
18Llapan shonqunkunawan mañakuqkunapa puntanchömi Tayta Dios kaykan.
19Payta mantsapakuqkunatam imata munayanqantapis alistapan.
Ausiliuta mañakuyaptinpis rasmi salvan.
20 Kuyar cäsuqkunatam cuidan.
Peru mana alli ruraq runakunatam sïqa ushakätsin.
21Noqaqa Tayta Diostam alabashä.
Llapan runakunapis paypa jutinchö imaypis alabayätsun.
Who We AreWhat We EelieveWhat We Do
2025 by iamachristian.org,Inc All rights reserved.
