Proverbios 26 - Bible in Quechua of South Conchucos（qxo）

1Usya tiempuchö rashta y cosëcha tiempuchö tamya mana alli kanqannömi upa runata alabaypis allitsu.

2Oqrakashqa pichuychanka y oqrakashqa wayanïtu qeshunman mana chanqannömi jutsaynaq runamanpis maldicionayanqan chanqatsu.

3Caballutam bozalwan amansantsik.

Ashnutam wiruypa manshuyätsintsik.

Mana tantiyakuq runataqa asutaypam corrigintsik.

4Mana tantiyakuq runawan shimi shimi ama rimanakuytsu.

Rimanakurqa paynö mana tantiyakuqmi kanki.

5Allish tukuq runataqa mana allish tukunanpä sitiunman churay.

6Mana yärakuypä runata ima encargutapis encargakurqa imayka chakikita pakikuqnömi kaykanki.

Tsaynö runataqa rabyakunallaykipämi encargakunki.

7Chankan pakishqa runa puriyta mana puëdinqannömi mana tantiyaq runapis shumaq yätsiyta puëdintsu.

8Warakaman rumita watanqan upa yarpay kanqannömi mana tantiyaq runata alabanqanpis kaykan.

9Machashqa runa kashawan runa mayinta wirunqannömi mana tantiyaq runa yätsinqanpis kaykan.

10Pïmayta llutalla flëchaptin mana alli kanqannömi mana tantiyaq runata minkakunqanpis mana alli.

11Allquqa gumitanqantam yapay mikun.

Tsaynöllam mana tantiyakuq runapis jutsa rurayman yapay ishkin.

12Alabakuq runaqa mana yachaq runapitapis peormi kaykan.

13Qela runaqa aruyta mana munarmi nin:

<>.

14Bisagrawan punku tumanqannömi qela runapis cämallanchö tikrakuskir tikrakuskir jitaräkun.

15Qela runaqa plätun churapakushqa kaykarpis manam mikunallanpäpis chaqarkuntsu.

16Qela runaqa qanchis yätsikuq runakunapitapis mas yachaq kanqantam yarpan.

17Juk rimanakunqanman mëtikurqa kanikuq allquta rinripita tsariqnömi kaykan.

18Löcu runa pitapis llutalla flëchaqnömi

19amïgunta llullapar brömapaqkunaqa kayan.

20Yanta mana kaptinqa nina upinmi.

Tullu shimi mana kaptinqa rimanakuypis manam kantsu.

21Carbón kaptinrämi shanshapis rupan.

Yanta kaptinrämi ninapis tsarin.

Tullu shimi kaptinrämi rimanakuypis kan.

22Runapa wasan rimayqa imayka mishkinörämi runata gustan.

Tsaymi wiyaqkunapa shonqunyaq chan.

23Mitu mankata yuraq qellaywan enchapaptinpis rurinpaqa kanqannöllam kaykan.

Tsaynöllam mana alli ruraq runaqa alli shimillanpa parlarpis shonqunchöqa mana allita yarpaykan.

24Runa mayinta chikiq runaqa allitupaypa parlaparpis shonqunchöqa rabyapaykanmi.

25Alli shimillanpa parlapäshuptikipis ama criyiytsu.

Shonqunchöqa contrayki shärinanpämi yarpachakuykan.

26<> nishuptikipis llapanmi musyayan rabyapaykäshunqaykita.

27Juk jeqananpä uchkuta uchkurqa kikinmi tsayman jeqanqa.

Jukta ñitinanpä rumita churaptinqa kikintam ñitinqa.

28Llullakuq runaqa rasun kaqta parlaqkunatam chikin.

Llullakuq runaqa pitapis rabyanätsinmi.