Zacarías 10 - Bible in Quechua of South Conchucos（qxo）

Kuyanqan runakunata Tayta Dios salvananpä promitinqan

1Mikuykuna wiñayanqan witsan tamyatsimunanpä Tayta Diosta mañakuyay.

Mañakuyaptikiqa illaqukatsimurmi tamyatsimunqa.

Tsaynöpam chakraykikunachö qewa shumaq wiñamunqa.

2Ïdulukunapa jutinchö willakuqkunaqa llullakuyanmi.

Tsaynöllam adivïnukunapis llullakuyan.

Imapä sueñuyanqanta tapukuyaptinpis llutankunallatam parlayan.

Janan shonqullam kuyapäyanpis.

Tsaynö engañaptinmi runakuna mitsiqniynaq üshakunanö maytsaypa mashtakashqa kaykäyan.

3 Tayta Diosmi nin:

<Tsaypitanam kuyanqä Judá runakunata kikï rikashä.

Yanapaptïmi guërrachö guërrata rurananpä allinnin caballunö kayanqa.

4<

Payqa kanqa cimientuchö maestra ruminö,

tolduta ichïtsinanpä estäcanö

y guërrachö pelyananpä flëchanömi.

Tsaynöllam Judá runakunapita wakin mandaqkunapis kayanqa.

5Paykunam alli chölullantä kayanqa.

Imayka nänichö mituta jaruyanqannömi chikiqninkunata guërrachö ushakätsiyanqa.

Yanapaptïmi pelyachö vinciyanqa.

Caballun muntashqa kaqkunatapis vincirmi penqakuyman churayanqa.

6<

Josépita miraqkunatam salvashä.

Paykunata kuyaparmi nacionninman kutitsishä.

Imaypis mana jaqishqanömi kayanqa.

Noqaqa paykunapa Tayta Diosninmi kä.

Mañakayämanqantam imaypis wiyashä.

7Efraín runakunaqa alli chölullantämi kayanqa.

Vïnuta upurkur kushikuqnömi kushishqa kawayanqa.

Kushishqa kaykaqta rikarmi tsurinkunapis kushikuyanqa.

Yanapanqäpita kushikurmi alabayämanqa.

8<

Wichyakur qayarmi mashtakashqa kaykäyanqanpita qorimushä.

Ñöpata mirayanqannömi yupaytapis mana atipaypä mirayanqa.

9Maytsay markakunaman mashtakätsiptïpis sirviyämänanpämi tantiyakuyanqa.

Karu nacionkunapitam tsurinkunawan kutiyämunqa.

10Noqam Egiptupita y Asiriapitapis kutitsimushä.

Kutitsimurmi Galaad y Líbano partikunachö täyänanpä churashä.

Tsaychö atskaman mirayaptinmi täyänanpä sitiupis kanqatsu.

11<

Atskayashqa mayunö ñakaykuna kaptinpis tranquïlu kawakuyänanpämi yanapashä.

Asiria runakuna allish tukuyaptinpis y Egipto runakuna poderyuq kayaptinpis penqakuymanmi churashä.

12Cäsumar alli kawayänanpämi kuyanqä runakunata valuratsishä.

Noqa Tayta Diosmi tsaynö nï>>.