2 Timoteo 2 - Bible in Quechua of South Conchucos（qxo）

Mana ajayaypa willakunanpä ninqan

1Timoteo, kuyay tsurïnö kaptikim qamta nï: Jesucristo yanapaykäshuptikiqa mana ajayaypa pay munanqannö kaway.

2Runakunapa puntanchö yachatsinqäta confiakuypä kaq wawqikunata yachatsiy paykunapis wakinkunata yachatsiyänanpä.

3Jesucristupa alli soldädun kaykarqa imanö ñakarpis pay munanqannö kaway.

4Manam pï soldädupis soldädu kanqanta dëjaskir juk rurayman aywantsu. Tsaypa rantinqa mandaqnin ninqantam ruran.

5Tsaynöllam llallinakuypa cörriqkunapis premiuta chaskiyänanpä reglamentu ninqannö cörriyan. Tsaynö mana cörrirqa manam ima premiutapis chaskiyantsu.

6Murukuq runapis murunqan wayuptinmi puntata yawan.

7Kay ninqäkunata shumaq yarpachakuptikiqa Señor Jesucristum yanapashunki shumaq tantiyakunaykipä.

8Timoteo, rey David castapita Jesucristo yurinqanta y wanurpis kawamunqanta mana qonqaypa willakuy. Tsaytam noqapis willakuykä.

9Tsayta willakunqäpitam pasaypa ñakaykä. Kananpis imayka runa wanutsiqnömi carcelchö wichqaraykä. Wichqaraptïpis Jesucristupa willakuynintaqa manam imapis tsapantsu.

10Tsaymi imanö ñakarpis mana ajayaypa Jesucristupa willakuyninta willakuykä. Tsaynöpam akranqan kaqkuna Jesucristuman criyikuyaptin Tayta Dios salvanqa gloriachö imayyaqpis kawayänanpä.

11Kay willakuyqa rasun kaqmi:

Jesucristuwan wanushqana kaykarqa paywanmi kawashun.

12Ñakayta awantarqa paywanmi mandashun.

Ñëgashqaqa paypis ñëgamäshunmi.

13Awninqantsikta mana cumplishqapis payqa cumplinmi.

Payqa awninqanta manam imaypis ñëgakuntsu.

Dios munanqannö willakunanpä ninqan

14Kay ninqäkunata wawqikunata y panikunata imaypis yarpätsiy. Tayta Diospa jutinchö tantiyatsiy llutan yachatsikuykunata mana chaskiyänanpä. Tsaykunata chaskirqa manam Tayta Dios munanqannötsu kawayan. Tsaynöllam wawqikunata y panikunata pasaypa qallayätsiyan.

15Tayta Dios munanqannö willakuyninta shumaq yachatsiy. Alli yachatsirqa alli arupakuq runa mana penqakunqannömi qampis penqakunkitsu.

16Llutan yachatsikuqkunawan ama rimanakuytsu. Paykunawan rimanakuptikiqa wawqikunapa y panikunapa shonqunmi mas chukruyanqa.

17Llutan yachatsikuyqa imayka cáncer qeshyanömi maytsaymanpis chan. Himeneuwan Filetum llutanta yachatsikur puriykäyan.

18Paykunam niyan Jesucristuman yärakur kawamushqanöna kar wanunqantsikpita manana kawamunantsikpä kanqanta. Tsaynö yachatsir pantakätsiyaptinmi wakin wawqikuna y panikuna Jesucristuman criyikuyannatsu.

19Peru wakinkuna mana criyiyaptinpis Tayta Dios akranqan kaqkunaqa alli cimientushqa wayinömi kaykäyan. Tsaymi Diospa palabranchö nin: <>>.

Tsaynöllam nin: <>.

20Rïcupa wayinchöqa manam qorillapitatsu ni qellayllapitatsu plätukuna, sinöqa qerupitapis mitupitapis kanmi. Qoripita y qellaypita plätukunaqa manam lluta üsanapätsu. Peru qerupita y mitupita kaqmi sïqa imaykachö üsanapä.

21Pipis qori plätunö kananpäqa jutsata mana ruraypa kawatsun y llutan yachatsikuyta ama chaskitsuntsu. Tsaynöpam qoripita rurashqa manëjuta rïcu runa utilizanqannö paytapis allita rurananpä Tayta Dios utilizanqa.

Timoteo imanö kawananpäpis ninqan

22Wakin jövinkuna llutanta rurayaptinpis qamqa ama ruraytsu. Tsaypa rantinqa Tayta Dios munanqannö kaway, payman yärakuy, pïmaytapis kuyay y llapan runakunawanpis alli kaway. Tsaynölla Señor Jesucristuta alabar limpiu shonquyuqkunawan imaypis qorikay.

23Llutan yachatsikuykunapita wakin runakuna rimanakuyaptinpis tsayman ama mëtikuytsu. Tsaynö rimanakurmi qallayätsinakuyan.

24Señor Jesucristupa sirviqnin kaykarqa piwanpis mana rimanakurnin kaway. Tsaynölla llapan runakunawan alli kaway, shumaq yachatsiy y pacienciaykipis katsun.

25Contrayki shäriqkunata alli shimillaykipa tantiyatsiy. Tsaynö tantiyatsiptiki capazmi Tayta Dios tantiyatsinqa jutsankunata dëjar pay munanqannöna kawayänanpä.

26Tsaynö kawarqa diablupa poderninchö kaykäyanqanpita qeshpirmi Tayta Diospa poderninchöna kawayanqa.