Proverbios 14 - Bible in Quechua of South Conchucos（qxo）

1Yachaq warmiqa wayinchö täraqkuna alli kawananpämi imatapis allikunata ruran.

Peru mana tantiyakuq warmim sïqa wayinchö täraqkunata qallayätsin.

2Cäsukuq runaqa Tayta Diostam mantsapakun.

Peru mana cäsukuq runam sïqa Tayta Diostapis manakaqman churan.

3Mana yachaq runaqa runa tukurmi imatapis parlan.

Peru yachaq runam sïqa imatapis allillata parlan.

4Murukunanpä yunta mana kaptinqa mikuy churakunanpis jäkunmi.

Peru jarukunanpä yunta kaptinmi sïqa mikuypis atska kanqa.

5Alli testïguqa rasun kaqllatam parlan.

Peru mana alli testïgum sïqa pitapis manakaqkunata tumpan.

6Mana alli ruraq runaqa tantiyakuq kayta munarpis manam puëdintsu.

Peru respitösu runam sïqa shumaq tantiyakun.

7Mana alli runawan purirqa manam imatapis allita yachakunkitsu.

Payta qatiränaykipa rantinqa witikuy.

8Tantiyakuq runaqa jutsata rurarpis tantiyakunmi.

Peru mana tantiyakuq runam sïqa ni jutsata ruranqantapis musyantsu.

9Mana tantiyakuq runaqa jutsata rurarpis alabakunmi.

Peru tantiyakuq runam sïqa jutsata rurarpis Tayta Diosta perdonta mañakun.

10Runaqa kikillanmi musyan shonqun llakishqa kanqanta.

Manam pipis musyantsu jukpa shonqun imanö kushishqa kanqanta.

11Mana alli ruraq runapa wayinchö taqkunapis wakpa kaypam aywakuyan.

Peru alli ruraq runapa wayinchömi sïqa yanapanakur shumaq kawayan.

12Wakin runakunaqa llutanta rurarpis allita rurayanqantam yarpäyan.

Tsaynölla kawarqa wanurmi ushakäyanqa.

13Asikurpis wakinqa shonqunkunachö llakishqam kaykäyan.

Tsaynö kushikurpis waqaymanmi chäyan.

14Mana alli ruraq runaqa llutanta rurarpis kushikunmi.

Peru alli ruraq runam sïqa allita ruranqanpita kushikun.

15Mana tantiyakuq runaqa pï imata ninqantapis rasmi criyin.

Peru tantiyakuq runam sïqa ni pï imata ninqantapis rasllaqa criyintsu.

16Yachaq runaqa Tayta Diosta mantsapakurmi jutsa ruraytapis dëjan.

Mana yachaq runam sïqa mana mantsapakuypa jutsata ruran.

17Imallapitapis rabyanaq runaqa llutantam ruran.

Peru tantiyakuq runam sïqa imata niyaptinpis awantakun.

18Mana tantiyakuq runaqa imaypis llutan rurayllachömi kawan.

Alli tantiyakuq runam sïqa mas yachaq tikran.

19Llutanta ruranqanta tantiyakurmi mana alli ruraq runapis alli runakunapa makinta mutsanqa.

Ima ruraytapis mana puëdirmi puntanman qonqurikunqa.

20Pobri runataqa imanpis mana kaptinmi kuyanqan amïgunpis chikin.

Peru rïcu runatam sïqa imanpis atska kaptin pïmaypis qatiran.

21Runa mayinta chikiq kaqmi jutsata ruran.

Peru pobrikunata yanapaq runatam sïqa Tayta Dios yanapan.

22Llutanta rurananpä yarpachakuq runaqa mana allim kawan.

Peru allita rurananpä yarpachakuq runatam sïqa pipis kuyar yanapan.

23Arukuq runapaqa imaykanpis kanmi.

Parlakullar kakuq runam sïqa pobriyan.

24Yachaq runakunapaqa yachaq kayninmi corönan.

Peru mana yachaq runakunapam sïqa upa kayllan corönan.

25Rasun kaqta parlaq testïguqa pitapis salvanmi.

Peru mana alli testïgum sïqa pitapis wanuyman churan.

26Payta mantsapakuq runatam kikintapis wamrankunatapis Tayta Dios yanapan.

27 Tayta Diosta mantsapakuq runaqa alli kawaytam tarin.

Tsaynöpam wanuypitapis qeshpin.

28Mandanqan nacionchö atska runakuna kaptinqa rey kushikunmi.

Wallkaqlla kayaptinmi sïqa llakikun.

29Tantiyakuq runaqa rasllaqa manam rabyakuntsu.

Peru mana tantiyakuq runam sïqa imallapitapis rabyakun.

30Alli shonqu runaqa sänum kawan.

Peru chiki runam sïqa qeshyapäkullar kawan.

31Pobrita ñakatsiq runaqa kamakuq Tayta Diostam rabyanätsin.

Peru pobrita yanapaq runam sïqa Tayta Diosta respitan.

32Mana alli ruraq runaqa llutanta ruranqanpitam mana alli kawan.

Peru alli ruraq runam sïqa allita ruranqanpita alli kawan.

33Yachaq runaqa shumaqmi tantiyakun.

Peru mana yarpachakuq runam sïqa tantiyakuntsu.

34Nacionchö respitanakur alli kawarqa pïmaypis kushikunmi.

Jutsata rurar kawayaptinqa tsay naciontam manakaqman churayan.

35Sirviqnin cäsukuq kaptinmi rey kuyan.

Peru mana cäsukuptinmi sïqa rabyanan.