Miqueas 7 - Bible in Quechua of South Conchucos（qxo）

Israel runakuna jutsa ruraychö kayanqan

1¡Allaw, noqallä!

Cosechashqa chakraman yaykur üvata y hïgusta ashiq runanömi kaykä.

Chakrachö imatapis mana tarir mallaqaq runa llakikunqannömi llakikü.

2Kay nacionchöqa manam pipis Tayta Diosta cäsuyantsu.

Alli ruraq runaqa manam ni jukllayllapis kantsu.

Wanutsinakuyllapämi yarpachakuyan.

Juknin jukninpis ushakätsinakuytam munayan.

3Jutsa ruraychöqa manam ni pipis paykunata gänantsu.

Autoridäkunapis y juezkunapis chaskipakurmi shumaq arreglayantsu.

Rïcu runakunaqa pägaykurmi munayanqanta ruratsiyan.

Tsaynöpam wakin runakunapis jutsa rurayllaman churakashqa kayan.

4Paykunachöqa mas respitashqa runakunapis kashanörämi kaykäyan.

Mas confiakuypä runakunapis turuna kashanörämi kaykan.

Tsaynö karmi pasaypa jutsayuq kayan.

Willakuq profëtakuna willakuyanqannöllam castigashqa kayänanpä kaq junaq chaykämunna.

Tsay witsanqa mananam ima ruraytapis puëdiyanqatsu.

5Ama pimanpis criyiyaynatsu.

Mas kuyanqayki amïguykikunamanpis amana yärakuyaytsu.

Warmikikunatapis llutallaqa imatapis ama willayaytsu.

6Ollqu tsurinmi papäninta manakaqman churan.

Warmi wamrannam mamanpa contran shärin.

Llumtsuyninnam suegranta chikin.

Tsaynö karmi tsay wayillachö tarpis kikinkunapura chikinakuyan.

7Tsaynö kaptinpis noqaqa Tayta Diosmanmi yärakü.

Salvamaqnï Tayta Diosmanmi imaypis yärakushä.

Payqa mañakunqätam wiyaman.

Israel runakunata Tayta Dios salvananpä ninqan

8Tsay witsanmi Israel runakuna niyanqa:

<

Ishkirpis shärishämi.

Mantsariypä tsakaychönö kaptïpis Tayta Diosmi noqapä aktsi kanqa.

9Tayta Diosta rabyanätsirmi jutsata rurarqü.

Tsaymi castigamaptinpis awantashä.

Tsaypitanam perdonamar aktsiman jipimanqa.

Salvamaptinmi kushishqa kawashä>>.

10Chikimaqnïkuna rikamänanpämi Tayta Dios yanapamanqa.

Tsayta rikarmi pasaypa penqakushqa kayanqa.

Tayta Dios castigamanqanta rikarmi paykunaqa kushipämar niyämarqan: <<¿Maychötä kaykan Diosniki?>>

Tsaynö niyämanqanpitam cällichö mitunö llutskashqa kayanqa.

Tsaynö kaykaqta rikarmi noqapis paykunata kushipäshä.

11Jerusalén marka, jiruruypa corralaraq pirqaykikuna allitsashqa kananpä junaq chaykämunnam.

Lindëruykikunapis mas jatunmi kanqa.

12Tsay witsanqa maytsaypitam runakuna qamman shayämunqa.

Tsaymi shayämunqa Asiriapita, Egiptupita, Nilo mayupita, Éufrates mayupita, lamar kuchunpita, jallqakunapita y maytsaypitapis.

13Jutsata rurar kawayanqanpitam markankuna tsunyaq quëdanqa.

Tayta Diosta mañakuyanqan

14Tayta Dios, kuyanqayki runakuna kaykäyaptïqa cuidaykayällämay.

Noqakunaqa üshaykikunanömi kaykäyä.

Allin sitiuchö tarpis munti rurinchö oqrakashqanömi kaykäyä.

Unay castäkunata cuidanqaykinö noqakunatapis cuidaykayällämay.

Basánchö y Galaadchö alli qewakuna kayanqanman yapay pushaykayällämay.

15Unay castäkunata Egiptupita jipimur milagrukunata ruranqaykinö noqakunapäpis milagrukunata ruraykullay.

16Milagrukunata ruranqaykita wakin nación runakunapis rikayätsun.

Tsayta rikarmi paykunapis tantiyakuyanqa qam japallayki poderösu Dios kanqaykita.

Kikinkuna poderniynaq kayanqanta tantiyaskirmi pasaypa penqakushqa kayanqa.

Mantsakashqa karmi ima ruraytapis puëdiyanqatsu.

17Paykunaqa culebrakunanömi allpata mikuyanqa.

Pakaräyanqanpita yarqamurmi puntaykiman tsuktsukyarrä chäyämunqa.

18Tayta Dios, qamnöqa manam juk dios kantsu.

Kuyanqayki runakuna perdonta mañakuyäshuptikim perdonanki.

Jutsankunatapis qonqankim.

Rabyar imayyaqpis castiganaykipa rantinmi salvanqayki runakunata kuyapar yanapanki.

19Taytay, yapay kuyapaykayällämay.

Jutsata rurayanqätapis amana yarpaykullaytsu.

Jutsäkunata mas jondunnin lamarman jitarpuy.

20Abrahamta, Jacobta y wakin unay castäkunata kuyapar awninqaykita cumpliykullay.