Romanos 7 - Bible in Quechua of South Conchucos（qxo）

Diospa leyninkunapa poderninpita yarqunqantsik

1Wawqikuna y panikuna, Diospa leyninkunata yachaykarqa musyayankim kawaqkunalla leykunata cumpliyänanpä kanqanta.

2Tsaynöllam majayuq warmipis runan kawanqanyaqlla runanpa poderninchö kaykan. Runan wanuskiptinqa librinam quëdanqa.

3Runan kawaykaptin juk runawan kakurqa adulteriu jutsatam ruran. Peru runan wanuskiptinmi sïqa tsay leypita librina kar juk runawanpis kakunman.

4Wawqikuna y panikuna, Jesucristo cruzchö wanushqa kaptinmi noqantsikpis Diospa leyninkunapä imayka wanushqanö kantsik. Tsaymi tsay leykunapa poderninchö kanqantsikpa rantinqa Jesucristupa poderninchöna kaykantsik. Paytam wanunqanpita Tayta Dios kawatsimurqan pay munanqannö kawanantsikpä.

5Unayqa jutsa ruraypa poderninchö kawashqam Tayta Diospa leyninkuna yarpätsimarqantsik jutsata mas ruranapä. Tsaynö jutsata rurarmi imayka wanushqanö karqantsik.

6Kananqa tsay leykunapa poderninchö kanqantsikpita yarqurmi tsay leykunapä wanushqanöna kaykantsik. Tsaynö karqa manam tsay leykunata cumplirtsu Tayta Diosta sirviykantsik, sinöqa Espíritu Santu yanapamashqam.

Poderninchö jutsa ruray tsararämanqantsik

7Tsaynö kaptinpis ama yarpäshuntsu Diospa leyninkuna mana alli kanqanta. Diospa leyninkunaqa allim kaykan. Tsay leykunata mana yacharqa jutsa ima kanqantapis manam musyämantsu karqan.

Tsay leykunachömi nin: <>.

Tsaynö mana niptinqa jukpa imantapis munapanqä jutsa kanqanta manam musyämantsu karqan.

8Peru tsaynö kaptinpis tsay leyta jutsa ruray utilizaptinmi masrä imaykatapis munaparqä. Diospa leyninkunata mana musyaptïqa jutsa ruray wanushqa kar manam yarpätsimanmantsu karqan.

9Unayqa tsay leykunata manarä musyarmi kushishqa kawarqä. Peru Diospa leyninkunata musyaptïnam sïqa jutsa ruray poderyuq tikraptin imayka wanushqanöna karqä.

10Tsaymi Tayta Diospa leyninkunata musyarpis alli kawayman chänäpa rantin wanuyman charqä.

11Tsaynöpam jutsa ruray engañamar wanutsimänanpä Diospa leyninkunata üsarqan.

12Tsaynö kaptinpis Tayta Diospa leyninkuna y mandamientunkuna rasunpa allim y sagrädum.

13Imayka wanushqanö kanäpä manam Diospa leyninkunatsu jutsayuq kaykan, sinöqa jutsa ruraymi. Diospa leyninkunata üsarmi wanuyman apamarqan. Tsaynöpam jutsa ruray pasaypa mana alli kanqanta tantiyä.

14Musyantsikmi Tayta Diospa leyninkuna alli kanqanta. Peru noqaqa runalla karmi jutsa ruraypa poderninchö kaykä.

15Tsaynö karmi imanir jutsata ruranqätapis tantiyätsu. Allita rurayta munarpis mana munanqä kaqtam rurä.Gál. 5.17.

16Mana munanqä kaqta rurarmi tsay leykuna alli kanqanta tantiyä.

17Jutsa rurayta mana munaptïpis shonqüchö jutsa ruraymi mana allikunata ruratsiman.

18Noqaqa allikunata rurayta munarpis manam puëdïtsu. Tsaymi musyä shonqüchö imapis allillaqa mana kanqanta.

19Tsaynö karmi Tayta Dios munanqanta rurayta munaykarpis mana allikunata rurä.

20Jutsa rurayta mana munaptïpis shonqüchö jutsa ruraymi jutsata ruratsiman.

21Tsaynöllam imaypis päsaman. Allita rurayta munarpis mana allitam rurä.

22Shonqüchö Tayta Diospa leyninkunata cäsuyta munaptïpis

23jutsa ruraymi alli yarpaynïwan maqanakuykan. Vincimar prësutanö tsararämarmi jutsaman ishkitsiman.

24-25Noqaqa Tayta Diospa leyninkunata cäsuyta munarpis jutsa ruraypa podernillanchörämi kaykä. ¡Allaw noqallä! Alläpa llakipaypämi kaykä. Wanushqanö kanqäpita ¿pirä salvamanqa? ¡Gracias, Tayta Dios! ¡Señor Jesucristum salvaman!