1 Tayta Diosmi nin:
< Rasunpa tsaynö kaptinqa ¿maytä rakikanqantsik papel? Tsaynölla quizás yarpäyanki pipapis jaqan kar esclävun kayänaykipä rantikunqäta. Tsaynö kaptinqa ¿maytä jaqa kanqä papel? Qamkunataqa jutsata rurayanqaykipitam rantikurqü. Qamkuna mana cäsukuq kayanqaykipitam mamaykita qarqurqü. 2<<¿Imanirtä yanapanäpä shamur yärakamaqtatsu pitapis tarirqütsu? ¿Imanirtä qayaptï contestayämarquykitsu? ¿Manaku criyiyanki yanapanäpä poderyuq kanqäta? ¿Manaku criyiyanki salvanäpä poderösu kanqäta? Poderyuq karmi juk shimilla lamartapis mayukunatapis tsakiskatsï. Tsaymi pescädukunapis yaku mana kaptin wanur ushakäyan. 3Poderösu karmi lütu röpata jatitsiqnö ciëlutapis tsakaskatsï>>. 4 Tayta Diosmi yachatsimashqa llakishqa kaykaqkunata parlapar kushikatsinäpä. Pay nimanqanta tantiyanäpämi cada wäray rikchatsiman. 5Cäsukuq kanäpämi Tayta Dios yanapaman. Tsaymi pay nimanqanta imaypis cäsü. 6Runakuna asutayämänanpäpis waqtätam kamaparqü. Shapräta llukir ushayaptinpis manam imatapis parlakurqütsu. Ashllir toqapäyämaptinpis cäräta manam tsapakurqütsu. 7 Tayta Dios yanapamaptinmi awantarqü. Mana penqakuypam Tayta Diosman yärakuykä. Tsaymi mana kuyukuq qaqanö kä. Tayta Diosman yärakunqäpita manam imaypis penqakushätsu. 8Lädüchömi Tayta Dios kaykan. Paymi musyan jutsaynaq kanqäta. ¿Pirä noqapa conträ shärinman? Conträ shäriqkuna qorikar mä imatapis tumpayämätsun. 9 Tayta Dios yanapaykämaptinqa ¿pirä imatapis tumpamanman? Röpa puyur ushakanqannömi llapan conträkunapis ushakäyanqa. 10Mayqaykipis Tayta Diosta mantsapakuq karqa shumaq tantiyakuyay. Sirviqnin willakunqanta cäsukuq karqa shumaq tantiyakuyay. Pasaypa llakikur tsakäpakushqanö karqa Tayta Diosman yärakuyay. Ima ruraytapis mana puëdirqa yanapayäshunaykipä payta rugakuyay. 11Tayta Diosmi nin: < Noqaman yärakayämunaykipa rantinmi qamkunaqa yarpaynikikunallaman yärakuykäyanki. Tsaynö kayanqaykipita castigaptïmi pasaypa ñakayanki>>.
Who We AreWhat We EelieveWhat We Do
2025 by iamachristian.org,Inc All rights reserved.
