1 1 (2) Tayta Dios, rabyashqa karpis amana ñakaykatsillämaytsu.
Rabyashqa karpis amana castigaykallämaytsu.
2 2 (3) Castigamanqaykiwanmi pasaypa ñakaykä.
Flëchaykiwanmi däñamarquyki.
3 3 (4) Jutsata ruranqäpita castigamaptikim entëru cuerpüpis nanaykan.
Tullükunapis chipyaqmi tumshuykan.
4 4 (5) Jutsata ruranqäpita alläpa ñakar manam awantänatsu.
Lasaq qepita aparikushqanömi kaykä.
5 5 (6) Mana cäsukur jutsata ruranqäpitam qerïkunapis pasaypa ismur asyaykan.
6 6 (7) Alläpa penqakur purirmi llakishqa umpuykachaykar qoyarküpis.
7 7 (8) Fiebriwanmi waqtäpis pasaypa achachan.
Entëru cuerpümi pasaypa nanäman.
8 8 (9) Kallpäpis manam kannatsu.
Shonqüpis llakikuywanmi pasaypa antsaykan.
9 9 (10) Tayta Dios, imata munanqätapis musyaykankim.
Llakikunqätapis musyaykankim.
10 10 (11) Shonqüpis tiktikyaykanmi.
Kallpäpis chipyaqmi ushakashqa.
Ñawïpis tsakaykannam.
11 11 (12) Qerïkuna antsanqanta rikarmi amïgükunapis y castäkunapis witipäyämantsu.
12 12 (13) Conträkunaqa wanutsiyämänanpämi willanakuyan.
Chikimaqnïkunaqa ushakätsiyämänanpämi parlayan.
Paykunaqa imay hörapis atacayämänanpämi yarpachakuyan.
13 13 (14) Peru noqaqa conträ parlayaptinpis manam wiyaq tukütsu.
Upa tukurmi imatapis parlakütsu.
14 14 (15) Mana wiyaq runanömi y defiendikuyta mana puëdiq runanömi kaykä.
15 15 (16) Tayta Dios, qamllamanmi yärakamü.
Noqapa favornï parlaykullay.
16 16 (17) Imapis päsamaptin ama kushipäyämätsuntsu.
17 17 (18) Pasaypanam wanunaykä.
Kay nanayqa manam ni juk rätullapis päsantsu.
18 18 (19) Mana allikunata ruranqäpitam confesakü.
Jutsäkunapitam pasaypa penqakü.
19 19 (20) Chikimaqnïkunaqa atskanam kaykäyan.
Achäquita mana ashipaykaptïmi chikiyäman.
20 20 (21) Yanapaykaptïpis conträmi shäriyan.
Allita ruraptïpis conträmi kaykäyan.
21 21 (22) Tayta Dios, japalläta ama dëjaykallämaytsu.
Ama qonqaykallämaytsu.
22 22 (23) Imaypis salvamaq Tayta Dios, salvamaqnï ras shamuykullay.
Who We AreWhat We EelieveWhat We Do
2025 by iamachristian.org,Inc All rights reserved.
